Бүгін — Талдықорған қаласының туған күні. Талдықорған қаласы Алматы облысының орталығы болып табылады.

Қала ХІХ ғасырдың ортасында салынған Гавриловка селосының орнында пайда болды. 1920 жылы оның атауы Талдықорған болып өзгертілді.

1944 жылы бұл елді мекен қала мәртебесін алды.1944-1959 және 1967-1997 жылдары – Талдықорған облысының орталығы болды. Ал 2001 жылдан бастап – Алматы облысының орталығы. Тұрғындар саны 12о мың адамнан асады.

Талдықорған қаласы еліміздің оңтүстік-шығысында Жоңғар Алатаудың батыс жағында орналасқан. Орталық Азия, Ресей мемлекеттеріне шығуға мүмкіндік беретін аэропорт, теміржол станциясы бар. Жалпы мемлекеттік және облыстық маңызы бар автомобиль жолдары тораптарының жүйесі арқасында қала Қазақстанның басқа да қалаларымен, Орталық Азиямен, Ресеймен және Қытаймен байланысып жатыр.

Білім, мәдениет, туризм орталығы және халықаралық, өңіраралық өндірістік-қызмет көрсету орталығы ретінде аса тартымды қала. Қалада 4 жоғарғы оқу орны, 12 орта кәсіби білім мекемелері, 25 жалпы білім беру мекемелері жұмыс жасайды. Сондай-ақ, қалада драма театры, филармония, мұражайлар, мәдениет және демалыс парктері, кітапханалар мен кинотеатрлар, стадиондар, спорт кешені, аквапарк және ипподром бар.

Қаланың құрылыс индустриясын дамыту, балаларға арналған тағамдар, электр сорғылары, сүт өнімін, керамика-граниттан жасалған плиталар, жұмыртқа және құс етін өндіру әлеуеті бар.

Фотолар Arhun Arhunus