Таразда «Қазақ елі тарихы» көрмесі М.Х. Дулати атындағы Тараз мемлекеттік университетінде Қазақ хандығының 550 жылдығына арналған «Ұлы дала елі» республикалық экспедициясының қорытындысы бойынша ашылды.
«Қазақ елі тарихы» көрмесінде «Ұлы дала елі» экпедициясы барған барлық облыстардан кітаптар, альбомдар, фотосуреттер, мақалалар мен тарихи жәдігерлер назарға ұсынылып, экспедиция туралы фильм көрсетілді. Қазақ елі тарихының түрлі кезеңін, экспедиция жүріп өткен жолды қамтыған көрме көптің көңілінен шықты.
Мемлекет тарихы институтының директоры, тарих ғылымдарының докторы, профессор Бүркітбай Аяған:
— Таразда ашылған бұл көрмеден көп мәлімет алуға болады. Бұған дейін де елімізде бірнеше экспедиция болған. Солардың арасында Мемлекет тарихы институтының экспедициясы бар. Біз сол кезде қазақ хандары жолымен жүріп өткен болатынбыз. Бетбақдала, Ұлытау, соның барлығын көрген едік. Ал осы жолғы экспедицияның бір маңызын айтсақ, біз бұрын Кеңес дәуірінде кейбір кезеңдерді ғана зерттеуге мүмкіндік алған едік, ал қазір жағдай басқаша. Бұл жинақталған мәліметтердің барлығы кейін зерттеліп, зерделеніп, кітаптарға енгізілсе жақсы болар еді.
Сондай-ақ, шараға келген меймандар Мұхаммед Хайдар Дулати ескерткішіне гүл шоқтарын қойып, тағзым етті. Тарихшылардың айтуынша, қазақ хандығының 550 жылдығы тікелей осы тарихи тұлғамен байланысты, себебі Дулати қазақ хандығының құрылған нақты жылын көрсеткен ғұлама ғалым.