Қазақстандағы шоу-бизнес пен той-бизнестің арқасында шалқып өмір сүретін отандық продюсерлердің тобын Баян Есентаева бастап тұрғаны баршаға аян. Бірақ елімізде етек алған дағдарыс беделді продюсерді де айналып өтпепті. “Кешью” тобының жетекшісі оқырмандармен ақшаны қалай үнемдеу жайында және отбасы туралы ойымен бөлісті.
Соңғы кездері Есентаеваның бизнесінде бәсеңдеу байқалғандықтан, Баян қол астындағы адамдарды жұмыспен қамтамасыз ету үшін дағдарысқа қарсы бағдарлама дайындауда. Продюсер әншілермен бірге гастрольге шығып, қала мен ауылдарды аралауға қызу кірісті.
Бес жылда кино түсіріліп, бағдарламалар жасалып, әртістер үздіксіз өнер көрсеткен Баянның бизнесінде қазір қиын сәт туған секілді. Есентаева мұндай кезде соғыстың ең ауыр кезеңінде керемет киім дүкендерін ашқан Коко Шанельді еске алады. Дағдарысты нағыз ақша табатын уақыт деп айтқан Стив Джобстың сөзін жадында ұстайды.
Баян Есентаева Жанар Дұғаловаға қатысты пікірінде оның продюсері болғанына әлі де күмәнмен қарайтынын ашық айтты.
“Жанардың бір рет те көңілі толғанын көрген емеспін. Оның продюсері болғаным дұрыс болды ма, білмеймін,”- дейді Есентаева.
Жанар Дұғалованың “Шайн” орталығымен келісімшарты 1 қазанда аяқталған. Мерзімі таяған әртіс продюсерінен еркіндікке жіберуін сұраған. Баян Жанардың шешіміне қарсы болмай, тіпті Жанарға жұмсалған ақшаны кері қайтаруын да сұрамапты.
“Жанардың пәтері мен көлігін тартып алмаймын ғой енді. Жанар Дұғалова “Кешьюдің” құрамында болғанда, топ алты жылдың ішінде миллиондаған доллар табыс әкелді, қыздарға жұмсаған қаржымды шығарып алдым”. – дейді ол.
Баян Есентаева жеке тұлғалардың сауық кештерін ат басындай алтын берсе де жүргізбейтінін алға тартады. Үлкен сомадағы ақша ұсынса да, әртіс қашан да бас тартады екен.
Сырт көзге алаңсыз өмір сүретін Есентаева қиын сәттерді де талай басынан кешкен. Мұны продюсер отбасылық өмірімен байланыстырады.
“Қолыма шүберек алып, еден жуған, күйеуімнің жейдесін үтіктеген кездерім де болды. Бір күні таңертең оянсам, теледидардың астындағы шаңға көзім түсті. Онда “мынауың ұят емес пе” деп жазылған саусақ іздері жатыр. Содан кейін мұндай өмірге жаралмағанымды түсіндім”, – дейді Баян әңгімесінде.
Осы жағдайдан соң Баян жеті жыл бойы телеарналарда істеп, жақсы репортаж түсіру үшін қоқыс үйіндісінде де жүруіне тура келген.
Жан-жарының опасыздығына қатысты қойылған сұраққа Баян 21 жыл бойы күйеуінің махаббатын сезініп келгенін алға тартты. Әртіс жарының көзіне шөп салуы мүмкін екенін ойласа да, бұған аса мән бермеуге тырысады.
Баянның айтуынша, күйеуі өте қызғаншақ жан, олар жұбайлық өмірдің алғашқы кездері жиі ұрысып қалатын. Баян тіпті үш рет ажырасуға арыз берген көрінеді. Продюсердің пікірінше, отбасылық алғашқы он жыл соғыс секілді дейді. Ал қазір ерлі-зайыптылар бір-біріне қолдау көрсетеді.
“Күйеуім менен қарызға ақша сұраса, тиынына дейін қайтарып береді. Менің ұстанымым сондай. Егер мен тапқан ақша болса – ол менің ақшам, ал күйеуімнің табысы- жанұямыздың ақшасы. Менің табысым оған әлі күнге дейін құпия”, – дейді Есентаева.
Сырт болмысы қайратты болғанымен, Есентаеваның әлсіз тұсы балалары екен. Продюсер бұл күйгелектігінің кесірінен тіпті психологтың көмегіне жүгінген.
Бірақ қыздарының қалауы мен пікірін құрметтейтін Баян үлкен қызын Калифорнияға оқуға жіберген. Айсауле қазір медиа-менеджер мамандығы бойынша Америкада білім алуда. Оқуын бітірген соң, ол Есентаеваның бизнесін жалғастырмақ.