«Славян базары -2015» халықаралық байқауының жеңімпазы Димаш Құдайберген Ыстамбұлда ABU TV Song Festival 2015-те ән шырқайды. Фестиваль 28 қазанда өтеді.
«Танымал жұлдыздармен бір сахнада өнер көрсететін боламын. Концерт әлемнің 50 елінде көрсетіледі. Оның ішінде Иран мен Кувейт те бар. Қазақстанда «Хабар» телеарнасы тікелей эфирде көрсететін болады. Мен халық әні «Дайдидауды» орындайтын боламын», — деп жазды әнші Инстаграмдағы өз парақшасына.
Азия-Тынық мұхиттық 2015 әндер телефестивалі (ағылшынша — ABU TV Song Festival 2015) — төртінші рет өтуде. Фестиваль жарыс түрінде өтпейді. 2015 жылғы 28 қазанда Стамбұлда (Түркия) өтеді. Шара 25-30 қазан кезеңінде Азия-Тынық мұхит хабар тарату одағының (ABU, «АВС») 52-ші ассамблеясымен бір уақытта өтпек.
Д. Құдайберген 2010 жылы «Звонкие голоса Байконура» халықаралық фестивалінің 1 сыйлығының лауреаты болса, 2012 жылы «Жас қанат» республикалық жас орындаушылар байқауының гран-приін иеленді. «Шығыс базары» халықаралық эстрадалық орындаушылар телебайқауының 1 сыйлығы лауреатының дипломын алды.