Биыл Ескелді аудандық «Жетісу шұғыласы» газетінің жарыққа шыға бастағанына — 85 жыл толды. Салиқалы да салмақты басылымның қазақ баспасөзінің дамуына қосқан үлесі ерен. Тиісінше, шығармашылық ұжымның Жетісулық оқырмандар арасында беделі — жоғары, абыройы зор. Мерейтойға орай, редакция атына лек-легімен құттықтаулар келіп жатыр. Біздің тілшілер де әріптестерімізді құттықтап қайтты.
«Жетісу шұғыласы» — жергілікті басылымның 7-ші атауы. Ең алғаш 1930 жылдың 13-қазанында жарыққа шыққанда «Вперед» деп аталыпты. 85 жыл бойында «Колхозшы», «Социалды еңбек», Сталин жолы», «Коммунизм жолы» сынды атаулар арқалап үздіксіз шығып тұрған. Соңғы атауы — 1962- жылы беріліпті. «Газет — өз заманының идеологиялық құралы. Шығармашылық ұжым қашан да алдына қойған мақсат-міндеттерді абыроймен атқарды»,-дейді басылымның бас редакторы Сәбит Биболов.
Сәбит Биболов — «Жетісу шұғыласы» газетінің бас редакторы:
— Газет жарыққа шыққалы қазақ -орыс тілдерінде басылып келеді. О баста, кеңестік саясат талабымен болған еді. Қазір көпұлтты аудан тұрғындары қалауымен аралас тілде шығады. Таралымы -3500 мың дана. Газетке әр жылдарда Николай Ягур, Михаил Давидович, Әбдіқадыр Алашбаев, Құрман Тайғараев сынды белгілі де беделді журналистер басшылық жасады. Қай кезеңде де газет — өз оқырмандарының рухани азық көзі бола білді. Халық пен биліктің арасындағы алтын көпір рөлін лайықты атқара білді. Ескелді ауданының қоғамдық-саяси, әлеуметтік-экономикалық дамуына ақпараттық тұрғыда үлкен үлес қосты.