2015 жылдың 9-13 қараша аралығында ҚР Инвестициялар және даму министірлігінің қолдауымен елімізде «Инновациялар апталығы» өтеді.
«Инновациялар апталығы» – Алматы қаласында басталып, Астанада өтетін Халықаралық инновациялық форуммен аяқталады. Апталық барысында ҚР ИДМ ұйымдастыруымен мемлекетіміздегі инвестиция және инновация мәселелеріне байланысты маңызды шаралар өтеді», — дейді ұйымдастырушылар.
Қолайлы экожүйе инновацияларының қалыптасуы – білімге баса назар аударатын жаңа экономиканың негізі саналады. Әлемдік қаржы дағдарысы мен жаһандану дәуірінің шарттарына орай бірегей білім көздерін және келешегі анық жобалар мен инвестицияларды елімізге тарту өте маңызды. Қазақстан экономикасы үшін білікті маман, жас ғалымдар, жаңашыл инженерлер мен өнертапқыштар қатары толығуы керек.
«Инновациялар апталығының» басты мақсаты – Қазақстанды технологиялық кәсіптерге қолайлы жаңа аймақтық хаб ретінде көрсету.
Апталық 9 қарашада Алматыда жыл сайын өтетін «Startup Day» (Стартап күні) шарасына дайындық ретінде жас инноваторларды үйрету семинарларынан басталады.
10 қараша күні Қазақстан-британ техникалық университетінде отандық және шетел сарапшыларынан құралған «Startup Day» қазылар алқасы жаңа энергетика аясындағы келешегі үлкен жобаларды қарастырады. Үздіктер мемлекет және инвесторлар тарапынан қолдау көрсетуге ұсынылады.
11 қарашада Showcase «Инновациялық технологиялар саябағы» жобасының көрсетілімі ұйымдастырылып, Алматы қаласындағы Tech Garden инкубаторының ресми ашылу салтанаты өтеді.
12 қараша күні Астанада «Қазақстан – жаңа жаһандық инновациялық хаб» атты Халықаралық инновациялық форум өтеді.
13 қарашада «Инновациялар аптасы» Астана қаласында өтетін «Инновациялық технологиялар паркі» Автономиялық кластерлік қоры мен IBM компаниясының «IBM SolutionsConnect 2015 сәтті пайдалан» тақырыбындағы бірлескен конференциямен аяқталады.