«Халық маркасы» жалпыұлттық жобасының жетекшісі Римма Тәжібаеваның мәлімдеуінше, 2017 жылы ЭКСПО көрмесінде осындай көрме павильоны жабдықталса, келушілердің саны көп болады.
– Біз ұлттық компанияға ЭКСПО көрмесінде «Қазақстанда жасалған» павильонын ашуды ұсындық. Қазір мәселе талқыланып жатыр, – деді ол.
Жоба жетекшісінің сөзінше, «Халық маркасы» жалпыұлттық байқауында жеңімпаз атанған кәсіпорындар Миланда өз өнімдерін әлем жұртшылығының назарына ұлттық бренд ретінде ұсынған. Олардың өнімдеріне шетелдіктер қатты қызыққан.
Жыл басында Мемлекет басшысының бастамасымен республика бойынша «Қазақстанда жасалған» акциясы ұйымдастырылып, оған 70-тен астам отандық өндіруші мен 100-ден астам марка қатысқанын атап көрсеткен жоба жетекшісі қазіргі таңда 27 кәсіпорын «Халық маркасы» деген атаққа лайық деп танылып отырғанын жеткізді. Оның айтуынша, Ақтөбе, Оңтүстік Қазақстан және Алматы қалалары азық-түлік өндірушілердің көшін бастап тұр.
Айта кетейік, «Халық маркасы» байқауының жеңімпаздары биылғы жылдың 9 қыркүйегі мен 8 қазаны аралығында Миланда өткен ЭКСПО көрмесінде өз өнімдерін көрсетті. Бұған қоса жеңімпаздар «Халық маркасы» белгісін өз тауарларында жарнама ретінде 2 жылға дейін қолдану құқығына ие болды.