Астанада жас талантты дизайнерлердің арасында «Той көйлектері» атты авторлық «Сән мен сахна» халықаралық сахна киімдері фестивалі өтеді.
Фестивальді «Ханум агенттігі», «Астана қаласының әкімдігі», «Юнус Эмре» атындағы түрік мәдени орталығы, «EXPO & Women» халықаралық ұйымы ұйымдастырып отыр.
Ұйымдастырушылардың айтуынша, фестивальдің негізгі мақсаты – дарынды суретші-сәнгерлердің еңбектерін бағалау. Ұлттық киім үлгілерін заманауи сән әлемінде дәріптеу, отандық сәнгерлердің қызметін, сондай-ақ олардың шығармашылығын тұтынушылар арасында насихаттау. Аталмыш шараларды өткізу арқылы халықтар мәдениетін интеграциялауға, этномәдени диалогтың дамуына ықпал ету. Сонымен қатар, сәнгерлер арасында тәжірибе алмасу, мемлекеттің оң имиджін көтеру болып табылады.
Фестиваль қонақтарының қатарында Қазақстан Республикасының еңбек сіңірген қайраткерлері, қазақ эстрада жұлдыздары, Түркия және Ресей дизайнерлері, «Аида Кауменова» , «Наиль Байкучуков», «Тарбия», «Өрнек» Сән үйлері, «Шеберлі» зергерлік бренді бар.
Сондай-ақ, «EXPO & Women» Халықаралық төралқасының төрайымы Салтанат Рақымбекова, ҚР еңбек сіңірген қайраткері, этнолог, дизайнер Айдаш Ханум, Түркия елінің беделді дизайнері — Дурду Арыджы, Айнур Супероглу, Гүлфидан Түйсүз, якутиялық Анжелика Кириллина мен отандық «Әдемі-ай» компаниясының директоры — Бахаргуль Төлегенқызы қатысады.
Фестиваль 2 желтоқсан күні «Astana Music Hall» кешенінде сағат 18:00 де өтеді.