Бурабай ауданында марал өсіріп, науқастарды пантымен емдеу тәсілі қарқынды дамып келеді. Осыдан бірнеше жыл бұрын құрылған марал шаруашылығының бұғылары жергілікті жерге тез бейімделіп кетті.
Жас маралдың мүйізінен алынған пантыларды облыстың сауықтыру мекемелері алады. «Бурабай» мемлекеттік ұлттық табиғи паркінің марал шаруашылығына бұғылар Шығыс Қазақстан облысынан әкелінді. 150 бас маралдың табиғи ортада өсіп өнуіне барлық жағдай жасалған. Бүгінде 600 гектар алқап маралдардың тұрақты мекеніне айналды.
Бурабайдың сауықтыру туризмі шетелдік туристер арасында танымал бола бастаған. Ұлттық парктің ендігі жоспары шаруашылықты кеңейтіп, өндірісті жолға қою. Онда пантыдан түрлі препараттар алуға мүмкіндік туады. Ақмола облысында емдеу-сауықтыру туризмімен қазір 50-ге жуық шипажай айналысады. Әзірге олардың 10-ы пантымен емдеу әдісін қолданады. Келешекте олардың саны артуы мүмкін.