Кеңес одағының батыры, авиацияның генерал-майоры Талғат Бигелдиновтің мүсіні Ресей Ұлы Отан соғысының орталық музейіне табысталды.
Қазақстан мен Ресейдің мұндай ортақ бастамасына еліміздің Ресейдегі елшілігі де қолдау көрсеткен.
Атақты қаһарманды еске алу үшін ардагерлер мен қоғам қайраткерлері жиналды. Салтанатты рәсімге Ресейдегі қандас бауырларымыз бен мектеп оқушылары да қатысты. Талғат Бигелдиновтің жеке құжаттарының көшірмесі де ресейлік әріптестердің қолына берілді. Батырдың мүсіні «Берлин үшін шайқас» залының алдында орнатылмақ. Өйткені Бигелдинов Берлин шайқастарында эскадрильяға жетекшілік жасағаны үшін «Алтын Жұлдыз» медалін алған еді.
Соғыстан кейін ол қоғамдық жұмыстармен айналысып, қайырымдылық қорының президенті болды. Бұл қор Ұлы Отан соғысының мүгедектеріне көмектесіп, жетім балаларға жәрдемдескен.