Ұлы ойшыл Абай Құнанбайұлының мол мұрасының бірі — «Қара сөздері». Қашан да өміршең мұра кешегі күннің де, бүгінгінің де, тіпті болашақтың да тамырын дөп басады.
Түрлі отбасының ХІХ ғасырдың, ХХ ғасырдың 40 және 90-ыншы жылдарындағы үш ұрпағының өмірі туралы «Ақылдың кілті» телехикаясы Абайдың «Қара сөздерінің» мазмұнын қамтиды. Оның тұсаукесері 10 желтоқсан күні Қазмедиа орталығының киноконцерт залында өтті.
Қазақтың ұлы ақыны, философ, ағартушы Абайдың 170 жылдығына орай түсірілген 12 сериядан тұратын «Ақылдың кілті. Өмір дастаны» туындысы арқылы ойшылдың «Қара сөздерінен» жас ұрпаққа ұлағат айту көзделген.
Картинаға театр және кино актерлері Дулыға Ақмолда, Данияр Базарқұлов, Бауыржан Қаптағаев, Дархан Сүлейменов және басқалар қатысты.
Бірегей телетуынды «Хабар» телеарнасының эфирінен желтоқсанның соңында көрсетілетін болады, деп хабарланған телеарна сайтында.