Қытайда 2-ші бүкіләлемдік интернет конференциясы өтуде. Оған ресми сапармен сонда жүрген Қазақстанның Премьер-министрі де қатысты. Кәрім Мәсімовтың өзі де ғаламтордан алыс емес. Кезінде қазақстандық шенеуніктердің ішінде әлеуметтік желілердің біріне алғашқы болып қосылған еді.
Бүгінде әлемде ғаламторды қолданушылар саны 3 миллиард 200 миллионнан асқан. Оның аз да болса бір бөлігі – Қазақстан азаматтары. Әлемді байланыстырып отырған желі 1969 жылы пайда болды. Оны Чарли Клайн Лос-Анджелес пен Калифорнияда тұрған екі компьютерді қосу арқылы ойлап тапты. Жаңалық әлемге тарағанымен оны әркім қолдана білмейтін.
Тәуелсіз желіге тәуелді болғанымыз соншалық күніміздің 126 минутын жансыз байланыс құралына арнайды екенбіз. Күндіз-түні экранына телміргендердің дені түрлі ауруға да шалдығып жатыр. Интернет арқылы айласын асырып отырғандар да баршылық. Алтын уақытты білдірмей жұмсап жіберетіні тағы бар.
Жаһан бойынша 7,2 миллиард адам бар болса, оның 3,2 миллиарды ғаламтор шырмауына енген. Оның ішінде 50 пайызы Азия елдерінде тұратындар. Интернетке 46 жыл болғанымен қазақстандықтар онымен шамамен 94 жылдардан бастап таныса бастады. Қолданушылар саны 12 миллионға жеткен.
Тағы бір статистика, 2000 жылы ғаламторға 6,5% адам қызығушылық танытса, қазір адамзаттың 43 пайызы онсыз тырп ете алмайтындай жағдайға жетті.