Шаш адамға көрік беріп, келбетін аша түседі. Дей тұра, шаш күтімі деген тек сусабынмен жууды  ғана білдірмейді.  Сондықтан біздің мына кеңестеріміз Сіздерге пайдалы болар деген үміттеміз.

1. Шаштың ұштарын үш ай сайын қиып отырыңыз.
2. Қолданатын тарағыңызды жиі ауыстырып тұрыңыз. Тарақ табиғи материалдан (ағаштан) жасалғаны дұрыс. Темір тісті тарақ шашқа зиян!
3. Басыңызды еңкейтіп тұрып, күніне екі рет шашыңызды тарап тұрыңыз. Бұл бас терісінің қан айналымын жақсартатын массаж ретінде денсаулыққа өте пайдалы.
4. Шашыңызды тарағанда, асықпаңыз. Шашты тарауды шаштың ұшынан бастаңыз. Шатасқан тұстарын тарақпен емес қолмен дұрыстаңыз.
5. Сусабынды (шампунды) шашыңыздың типіне қарай дұрыс таңдаңыз. Шашыңызға нәр беретін маскаларды жасап жүруге дағдыланыңыз.
6. Шашыңызды жұмсартып, қалыпқа келтіру үшін кәдімгі шикі жұмыртқаны қолданыңыз. Жұмыртқаның ақ уызы майлы шашқа, ал сары уызы құрғақ және көп түсетін шашқа пайдалы.
7. Шаш кептіру үшін фен қолданбауға тырысыңыз.
8. Дұрыс тамақтануды әдетке айналдырыңыз. Себебі шаштың тез өсіп, әдемі болуына ғана емес, жалпы өзіңізді сергек сезінуіңізге де күнделікті тағамыңыз көп әсер етеді. Мүмкіндігінше тәтті, ащы, ұннан жасалған және майлы тағамдардан бас тартыңыз. Күніне 2 литр таза су ішіп отырыңыз.