Жетісу өңірінің мақтанышына айналған ардагер спортшы Алматы облысының Көксу ауданында тұрады. Әбдуәлі Тастанов – салауатты өмір салтын насихаттаушы. Жастық шағында самбомен айналысса, егде тартқанда кір көтеру мен қол күресіне ден қойған. Нәтижелері көңіл сүйсінтеді.
Жақында спорт ардагерлерінің Мәскеуде өткен халықаралық жарысында чемпиондық атаққа ие болды. Ардагер спортшының апталық жаттығу кестесінде бос күн жоқ. Ауласындағы шағын алаңда кір тастарын көтереді, денесін шынықтырады, жүгіреді. Спорт ардагері – кір көтеру мен қол күресінен Қазақстанның бірнеше дүркін чемпионы. Азия құрлығында 5 мәрте жеңімпаз атанды. Халықаралық дәрежедегі спорт шебері бірнеше мемлекетте болып, ел намысын абыроймен қорғады. 40-қа жуық медалі бар, дипломдары да көп.
Әбдуәлі Тастанов, ардагер спортшы:
— Қаншама тер төгілді, қаншама темір көтерілді. Жаттығуларды айтып тұрмын. Мемлекеттің Туы желбіреп, Әнұраны шырқалғанда, еңбегіңіздің зая кетпегенін түсінесіз. Спорт – денсаулық кепілі. Ол жас талғамайды. Адамды салауатты өмір салтымен жүруге қалыптастырады деп отыр жуырда Мәскеуде өткен халықаралық жарыста «Алтын кубок» иегері атанған Әбдуәлі Тастанов. 57 жастағы чемпионның ең басты ұстанымы – елдің абыройын арттырып, артындағы жастарға үлгі көрсету.
Әбдуәлі Тастанов, ардагер спортшы:
— Бұл кісі 60-қа келсе де, 32 келі кірді бір саусақпен көтеріп жүр. «Неге бізге осындай болмасқа?» деген жастар нашақорлықтан, жаман әдеттерден арылып, маған ұқсаса, мемлекетке қосқан кішкене үлесім болар еді. Үлкен ұлы Асқар дзюдомен айналысқан. Қазір жаттықтырушы болып, шәкірт тәрбиелеп жүр. Ортаншы ұлы Асхат та дзюдоға құмар.
Асхат Әбдуәли, Ә. Тастановтың ұлы:
— Менің арманым — Елдос Сметов сияқты чемпион болу. Мен қазірден бастап дайындалып жүрмін. Спорт десе ішкен асын жерге қоятын Әбдуәлі Тастанов халықаралық жарыстарға демеушілердің көмегімен барады. Дей тұрғанмен кейде қаражат табылмағандықтан, жолға шыға алмай қалатынын да жасырмайды. «Биыл Болгарияда әлем чемпионаты өтеді. Сәті түсіп соған қатыссам, жанкүйерлерімді алтын медальмен қуантуға мүмкіндігім бар», — дейді ардагер спортшы.