«Астана Опера» театрының оркестрі 2 ақпанда Үлкен зал сахнасында көпке танымал «Симфоника» циклынан Симфониялық музыкадан концерт береді. Солист – Мәскеуден келген дарынды пианиношы, «Astana Piano Passion-2015» III халықаралық конкурсының лауреаты Виктор Маслов. Дирижері – Қазақстанның еңбек сіңірген қайраткері Абзал Мұхитдинов.
Тыңдаушыларға симфониялық және аспапты музыканың жауһарлары: Д. Шостаковичтің №5 d-moll симфониясы, 47 шығармасы (1937) және П. Чайковскийдің оркестр мен фортепианоға арналған №1 b-moll концерті, 23 шығармасы ұсынылады.
— Д. Шостаковичтің симфониясында өте көп жұмбақ жатыр. Біз бұл құпияның сырын сәл ашып, композитордың өмірінен оның туындыларын түсінетіндей қызықты деректер туралы әңгімелейміз. Мысалы, симфонияның бірінші бөлімінде неге Ж. Бизенің «Кармен» операсының тақырыбы жүретінін көпшілік біле бермейді. Өйткені, оның сүйіктісі – жүрегін ұсынғанына қарамай, белгілі режиссер Роман Карменді таңдаған испан әйелі, сондықтан музыка желісінде оның қарсыласына деген өшпенділігі мен испан сұлуына деген жауапсыз сезімі айшықталады. Концертті жүргізуші Маржан Жәкенова композитордың өмірінен оның шығармашылығына әсер еткен маңызды оқиғалар жайлы айтып береді. Д. Шостаковичтің музыкасы адамды рухани байытады. Ол адамның ішкі жан-күйін емдейтін әсер қалдырады: түрлі «эмоциялық тығырықтан» шығу және тазару арқылы сезімдерді қайтадан бастан кешуге мүмкіндік береді дер едім, — дейді маэстро.
Композитор симфониясына «Әділ сынға кеңестік суретшінің жауабы» деген тақырыпша береді. Бұл «жауап» сол кезде одан талап етілген ерлік классицизмінің үлгісіне жарар еді. Д. Шостакович өзінің музыкалық стилін өзгертті, сөйте тұра оның мазмұнын кеңейтіп, астарын тереңдетті. Егер бұрын Евгений Мравинский дирижерлік ететін шығарма масаттандырса, енді ол басқаша орындалды – шабыт кері мағына берді. Музыка тыңдарманға сұрақ қояды және жауапты өздерінен талап етеді.
Екінші бөлімде болашағы зор пианиношының өнері тамашаланады. Виктор Маслов – ресейлік жас музыкант, Парижде, Анконада, Мәскеуде, Киевте өткен халықаралық конкурстардың жеңімпазы. 2014 жылдан бері Лондонда Корольдіктің музыка колледжінде оқып жатыр (профессор Дмитрий Алексеевтің класы). 2015 жылы «Astana Piano Passion-2015» конкурсында екінші сыйлықты және екі арнайы жүлдені (арнайы жүлделердің бірі — «Астана Опера» Үлкен залының сахнасында өнер көрсету) иеленді.
П. Чайковскийдің оркестрмен фортепианоға арналған №1 b-moll концертінде, 23 шығармасында жеке орындайтын Виктор Масловты көпшілік алғашқы аккордтардан-ақ таниды. Айта кету керек, «Астана Опера» сахнасында музыкант өзінің туған күнінде өнер көрсетпек.
— П. Чайковскийдің концертін орындау – үлкен жауапкершілік, себебі оны Клиберн, Горовиц, Соколов сияқты мэтрлар әлемнің ең үздік залдарында ұсынған, сол себепті бұл музыкалық шығарманы солар орындаған деңгейге сәл де болса жақындай түссем деймін, шығарманың терең поэзиялық қыры мен драматургиясын жеткізгім келеді, — дейді пианиношы.