Ұлы ғалым Шоқан Уәлиханов жасаған экспедиция Қазақстанға шамамен 2 млн. туристi тартуға мүмкiндiк бередi. Бұл жөнiнде ҚР Президентi жанындағы Орталық коммуникациялар қызметiнде өткен баспасөз мәслихатында Қазақстан ұлттық география қоғамының «Шоқан Уәлихановтың керуен жолымен» экспедициясының жетекшiсi Орденбек Мазбаев мәлiмдедi, деп хабарлайды Baq.kz.
«Бiз Шоқан Уәлихановтың туылғанына 180 жыл толуына орай өткен жылы осыдан 150 жыл бұрын ғалым болған Қашқар қаласында болып қайттық. Жалпы, ұлттық география қоғамының демеушiлiгiмен бiз бұған дейiнгi он шақты экспедиция барысында Шоқанның барлық экспедицияларын жүрiп өттiк және мақсат толықтай орындалды дей аламыз. Экспедиция қорытындысы бойынша бiз «Ұлы Шоқанның керуен жолымен» атты кiтапты үш тiлде басып шығардық. Сонымен қатар, қысаша фильм жарық көрдi. Сондай-ақ, жақында Қытай Халық Республикасы осы өткен маршрутты «Тянь-Шань дәлiзi» деп атап, оны туристiк маршрутқа айналдырмақшы. Егер, ҚҰГҚ өткiзген маршруты туристiк маршрутқа айналса, онда бұл Қазақстанға 2 миллионға жуық туристердi тартуға мүмкiндiк бередi», — дедi О.Мазбаев.