- Мүмкіндіктерді жасауыңыз және іздеуіңіз керек.
Мүмкіндіктерді іздемеген адамға сәтті мүмкіндіктердің есік қағуы сирек кездеседі. «Университетте не үшін оқып жүрміз? -Мүмкіндіктер үшін». Бірақ сол мүмкіндіктерді өз дәрежесінде қолданып жүрміз бе? Ай, қайдам. Қандай да бір ұсыныс түссе, қорқып, бас тартуға дайын тұрамыз. Қателіктердің біз үшін сабақ болатынын ескеріп, мүмкіндікті қолдан жіберіп алмауға тырысыңыз. - Көңілдің толмауы — көңіл толмайтын жағдайларға алып келеді.
Егер бір заттың тек жаман жағын ойласаңыз, міндетті түрде соны көресіз. Айтады ғой, ағаштан түсіп жатқан жапырақты көрсең де қуан деп. Барлық жағдайға позитивпен қарамайтын болсаңыз, өміріңізде кездескен керемет жақсылықтарды да аңғармай, тек жаман жағын байқап қалуыңыз мүмкін. Сонымен қатар, көңілдің толмауы жалғасын табады, дер кезінде тоқтатпаса. Көңілді, қуанышты, риза болып жүргенге не жетсін! - Сіздің қазіргі жай-күйіңіз болашағыңызды анықтамайды.
Жеке үйіңіздің болмауы немесе кең сарайдай үйде тұруыңыз, бай не кедей екендігіңіз, орта балдың 4 немесе тым нашар болуы, тағы басқалар ешқандай маңызға ие емес. Ең бастысы өз бойыңыздағы талпыныс, талант, қалау. Егер бойыңыздан осы қасиеттер табылса, сіз ала алмайтын қамал жоқ. Кедейдің бай болуы, байдың кедей болуы туралы күнде естіп жүрміз емес пе? Яғни, бәрін жасайтын тек өзіміз, құрдымға кетсек те, биік белеске жетсек те. - Егер сіз басқаларға көмек көрсетпесеңіз, өзіңізге де көмектесе алмайсыз.
Ең қарапайым көмек түрлері де ғажайыптар жасай алады. Жәй ғана есікті біреу үшін ашып тұрғаннан да өзіңізді керемет сезіне аласыз. Біреуге көмегің тисе — өзіңнің де көңілің көтеріліп қалады емес пе? Соңында міндетті түрде сізге де біреудің көмегі тиеді. Өмір алма кезек. Үнемі өзіңді ғана ойлап, ешкімге қол ұшыңды бере алмасаң, жауап та солай болады. - Хобби- ең жақсы жұмыс.
Өзің айналысып жатқан іс тек ақша үшін емес, өз қалауыңды қанағаттандыру үшін болса, үлкен нәтиже берері анық. Бұны жұмыс деп айтуға да келмес. Жасап жатқан ісің өзіңе ұнайтын болса, оны дамытудан рахат аласың. Ерте ме кеш пе ол сіздің табыс көзіңізге айнала алады. Ал жасап жатқан іс тек ақша үшін болса, қалағаныңызға жете алмайсыз, себебі, ол кезде тек санға мән беріліп, сапа жайында қалады.
Назерке Сүлен