Мүмкіндігі шектеулі жандарға арналған «Шығармашылық үйі» шеберханасы жаңа маусымын бастады. Мұнда мүгедектігі бар елорда тұрғындары жанына жақын іспен шұғылданады. Ерлер ағаш ұстасы шеберлігін меңгеріп, қыш құмыра жасауды үйренсе, нәзік жандылар сәндік-қолданбалы өнермен танысады.  

Осы сияқты әлеуметтік-еңбек шеберханалары Астанада үш жылдан бері жұмыс істеп келеді, деп хабарлайды қалалық әкімдіктің баспасөз қызметі.

Биыл жаңа шығармашылық бағыт – қыш құмыра жасау ісі енгізіліп отыр. Оның аясында мүмкіндігі шектеулі жандар түрлі кәдесыйлар жасамақ.

Мұнда тәжірибелі шеберлер дәріс береді. Әйелдерге қағаздан гүл шоқтарын, әшекейлер, картиналардың қалай жасалатынын көрсетіп, тоқу мен ұсақ моншақтардан кесте тігуді үйретеді.

Мүмкіндігі шектеулі жандар «Шығармашылық үйіне» түрлі бағыттар бойынша  жазыла алады. Ал курстарды тәмамдаған соң шеберлік дәрістеріне қатысқандарға сертификаттар табысталады.