Алматы облысында спортпен шұғылдануға арналған 3294 спорттық құрылым бар, деп хабарлады облыстық дене шынықтыру және спорт басқармасының басшысы Тұратбек Чарапиев.
Оның ақпаратынша, аймақта 2 спорт сарайы, 1 теннис орталығы, 22 стадион, 21 спорттық кешен, 12 спорттық құрылымдар кешені, 255 ату тирі, 779 спорттық зал, 46 бассейн, 1949 жазықтық құрылым бар.
Жетісуда барлығы 500 мың адам жүйелі түрде спортпен шұғылданады. Бұл аймақ тұрғындарының 26% құрайды.
«Биыл Ақсу, Талғар, Қарасай, Райымбек аудандарында дене шынықтыру-сауықтыру кешендерінің, Жамбыл ауданы Қазыбек ауылы мен Қарасай ауданы Жалпақсай ауылында футбол алаңының,Райымбек ауданы Нарынқол ауылындағы балалар мен жасөспірімдерге арналған спорт мектебінде жасанды төсемі бар футбол алаңының, Талдықорған қаласында жабық бассейннің құрылысы үшін және Қаратал ауданындағы балалар мен жасөспірімдерге арналған спорт мектебінің спорттық базасын қалыпқа келтіру үшін жобалық-сметалық құжаттаманы дайындауға жергілікті бюджеттен қаражат бөлінді», — облыстық дене шынықтыру және спорт басқармасының басшысы Т. Чарапиев.