Ертең Шанхайда «Диснейленд» ашылады.
Аумағы жағынан әлемдегі ең үлкен ойын-сауық орталығының құрылысы 2011 жылы басталған. Қытай тарихындағы ең ірі шетелдік инвестициялық жобаның құны – 5,5 млрд доллар. Жоспар бойынша былтыр пайдалануға берілуі тиіс «Диснейлендке» 2014 жылы қосымша 800 млн. доллар инвестиция құйылды.
Ал енді осы ауқымды жобаның қарапайым қытай тұрғындарына әсері қандай? Өзгенікін қайтесің, өзіңдікі тұрғанда. Шанхай «Диснейленді» қытай жұртына осылай деп ұран тастады және бұл маркетингтік ұран нәтиже берді де. Осыдан үш ай бұрын ашылу салтанатына алдын ала шығарылған билеттер бар-жоғы 20 минутта жоқ болды. Ал билет бағасы – 499 юань, яғни 26 мың теңгедей болғанын айта кетеу керек.
Ойын-сауық орталығы бір айдан бері сынақ ретінде жұмыс істеп тұр. Енді, міне есігін айқара ашпақ. Бұл сәтті балдырған балалар ғана емес, ересектер де ерекше күтті. Қытайдың түкпір-түкпірінен келушілер көп. Тіпті, ашылу салтанатына билетті алдын ала сататын ресми сайт халық нөпіріне шыдамай, істен шыққан болатын.
«Дисней» компаниясы жобаға 5,5 млрд АҚШ долларын салды. Егер ойын-сауық орталығына жылына 12-15 миллион адам келсе, тек 8 жылдан соң ол өзін ақтайды.