Астана қаласының полицейлері жас инспекторлармен және бойшаң қуыршақтармен бірге «Жарқын бол» акциясын өткізді, деп хабарлайды қалалық әкімдіктің баспасөз қызметі. Шара жол-көлік оқиғаларының алдын алуға және санын азайтуға бағытталған.

Шара барысында тәртіп сақшылары жолда қауіпсіздік деңгейін жақсарту үшін балаларға жарық шағылыстырғыш білезіктер таратты.

– Астанада профилактикалық шаралар тұрақты түрде өткізіледі. Жүргізілген жұмыстардың нәтижесінде жол-көлік оқиғаларының саны төмендеді. Кәмелеттік жасқа толмағандардың қатысуымен орын алатын оқиғалар саны да азайды. Жыл басынан бері жасөспірімдер көз жұмған бірде-бір ЖКО тіркелген жоқ. Сондай-ақ, жалпы, ЖКО саны да 5% кеміді, – дейді Астана қаласының ІІД Жергілікті полиция қызметінің инспекторы Ләззат Бейсембаева.

Айта кетейік, елордада жол-көлік оқиғасы салдарынан қаза болғандар саны 19%-ға, жарақат алғандар саны 4%-ға азайды.

«Жарқын бол» акциясы кезінде танымал мультфильмдердің кейіпкерлері балаларға жарық шағылыстырғыш білезіктер мен жол жүру ережелері туралы жадынамалар таратты. Ал жас жол инспекторлары жүргізушілерге жаяу жүргіншілер өткеліне жақындағанда жылдамдықты азайту қажет екендігін ескертті.

Астана қаласының Жергілікті полиция қызметі ата-аналардан балаларға жол қозғалысы ережесін түсіндіруді сұрайды. Ал ең жақсы тәрбие – ересектердің үлгісі, дейді тәртіп сақшылары.