Елордада абаттандыру бағдарламасы аясында аулаларда жаңа футбол, балалар ойын алаңдары, спорттық тренажерлар, күркелер, орындықтар мен қоқыс тастайтын жәшіктер орнатылып жатыр. Қазіргі кезде кейбір аулаларда жөндеу жұмыстары аяқталды. Биыл тиісті жұмыстармен тұрғын үйлердің маңындағы 37 аумақ қамтылды, деп хабарлайды қалалық әкімдіктің баспасөз қызметі.
Алматы ауданы бойынша 10 аулада ойын алаңдары ауыстырылып, кір жаятын орындар, күркелер салынып, урналар мен орындықтар орнатылуда.
Сонымен қатар, таза ауада спортпен жаттығу үшін қолайлы жағдайлар жасауға баса назар аударылады.
– Футбол алаңы жасалуда, жасанды жабын немесе шөп төселген әмбебап алаң. Бізде бес тренажер кешені бар, кешенді абаттандыру жұмыстары жүргізіліп жатқан әр аулаға 10 тренажердан орнатылады, – дейді «Алматы» ауданы әкімі аппаратының абаттандыру бөлімінің басшысы Рамиль Досмағанбетов.
Оның айтуынша, металл гараждар мен заңсыз сауда павильондары алынып, олардың орнына жаңа тұрақ орындары жасалады.
Сол жағалауда сегіз аула кешенін абаттандыру жұмыстары жүргізіліп жатыр.
– Құрылыс-монтаждау жұмыстарын жүргізу кезінде қауіпсіз шағын сәулеттік пішіндер мен балаларға жарақат алуға жол бермейтін резеңке қиындылар пайдаланылады. Сонымен қатар, биіктігі 6 метрлік қоршаулармен және доптың сыртқа шығуына жол бермейтн тормен жасанды шөп төселген футбол алаңдары да жасалады, – дейді «Есіл» ауданы әкімі аппаратының абаттандыру бөлімінің басшысы Жарқын Айтжанов.
Оның айтуынша, жөндеу жұмыстары аяқталған соң тұрғындар алғыс айтып, әлеуметтік желілерге және хаттар жазып жатады.
«Сарыарқа» ауданында 19 аула абаттандырылып жатыр. Мұнда да балалар ойын алаңдары ауыстырылып, жасанды жабын төселген спорт алаңы жасалады, сондай-ақ, дене шынықтырумен айналысуға арналған 80 тренажер қойылады.
— 1 қыркүйекке дейін барлық жұмыстарды аяқтауды жоспарлап отырмыз. Қазір дайындық жұмыстары жүргізіліп, шағын сәулеттік пішіндер орнатылуда. Ауа райының қолайсыз болуына орай сәл кідіріп қалдық. Асфальт төселген жоқ, енді күн жылы кезде жұмыстар кесте бойынша жүргізіліп жатыр, – деді «Сарыарқа» ауданы әкімі аппаратының өндірістік-техникалық бөлім басшысы Эльдар Сәбитов.
Еске салайық, қазіргі кезде аула аумақтарын абаттандыру бойынша балалар және спорт алаңдары, тренажерлар қарастырылған жаңа қалалық бағдарлама әзірлену үстінде. Ең алдымен елорданың шалғай жатқан шағын аудандарындағы аулалар абаттандырылады.