Jas.kz

Елордада жастар арасында жұмыссыздықты төмендету, жұмысқа орналастыру және  кәсіптік бағдар беру бойынша жұмыстар белсенді жүргізіліп жатыр. Биыл «Астана жастары» ресурстық орталығы 2500 адамды қамтыған 8 шара өткізді, деп хабарлайды қалалық әкімдіктің баспасөз қызметі.

Орталық қызметінің маңызды бағыттарының бірі жұмысқа орналасу кезінде ішкі тосқауылдарды еңсеру, коммуникация машықтарын алу және сұхбаттарда өзін-өзі таныстыру бойынша тренингтер өткізу болып табылады. Тренингтер 2015 жылдан бері ай сайын ұйымдастырылып келеді, жалпы, 450 адам оқытылды.

Үстіміздегі жылы профильді бос орындар жәрмеңкелерін өткізу туралы шешім қабылданды. Л.Н. Гумилев атындағы Еуразия ұлттық университетінде өткен техникалық профильдегі алғашқы жәрмеңкеде 18 адам тұрақты жұмысқа орналастырылды. Сонымен қатар, М. Өтемісов атындағы Оқушылар сарайында гуманитарлық бағыттағы бос орындар жәрмеңкесі ұйымдастырылды. Шара қорытындысы бойынша 15 елордалық жұмыспен қамтылды. Жақында сауда-экономикалық профильдегі бос орындар жәрмеңкесі өтті. Мұндай шараларды жыл соңына дейін өткізу жоспарланған.

Қзіргі кезде «Астана жастарында» тіркелген жұмыс іздеушілер саны 385 адамды құрайды, 71 адам жұмысқа орналастырылды.

Айта кетейік, орталықта құқықтық көмек те көрсетіледі. Жыл басынан бері 90 адамға консультация берілді, соның ішінде 50% студенттер, 15% оқушылар, сондай-ақ, 35% жеке тұлғалар. Негізінен, адамдар еңбек қатынастары, отбасылық және азаматтық құқық, сондай-ақ тұрғын үй алу бағдарламаларына қатысты мәселелер бойынша жүгінеді.

Қыркүйек айының 8-10 күндері Астанада «Қазанат» атшабарында (Қабанбай даңғылы-1) ұлттық спорт түрлерінен Қазақстан Республикасы тәуелсіздігінің 25 жылдығына орайластырылған бірінші «Астана жұлдызы» республикалық турнирі өтеді. Жарысқа Астана, Алматы қалалары мен барлық 14 облыстың командалары қатысады, деп хабарлайды қалалық әкімдіктің баспасөз қызметі.

Турнирді ұйымдастырушылар — Астана қаласының әкімдігі мен  Қазақстан Республикасының Ұлттық спорт түрлері қауымдастығы.

Қалың жұртшылық үш күн бойы қазақтың ұлттық ойындарының сан түрін тамашалай алады. Атап айтқанда, орта қашықтықтағы жүйріктердің бәйгесі өтеді. Еліміздің таңдаулы 16 командасы үш тәулік  көкпар мен аударыспақ додасының көрігін қыздырмақ.

Теңге ілудің ең үздік шеберлері мен қыз қуудың теңдессіз жұптарының өнері назарға ұсынылады. Шу асауды жүгенсіз мінетін жүректі жігіттер асау үйрету сайысына түседі.

Құралайды көзге атқан садақшылар құйғыта шапқан ат үстінен жамбы атып, мергендік сынасады. Үш күн бойы тоғызқұмалақ пен асық атудың бәсекесі қызады. Қыран баптап түлкі, қасқыр аулаған, қаршыға мен сұңқар баптап сан түрлі құс ілдірген құсбегілер көрсетілімі болады.

Ор қоянды қыр асырмай ұстайтын жүйрік тазылар фестивалі «Астана жұлдызы»  турниріндегі жұрт айта жүрер қызықтың қатарын арттырады.

Осындай ұлттық ойындардан басқа да қалың қауым сүйсіне тамашалайтын тартымды қызықтар аз болмайды. Атшабар алаңын жағалай ақшаңқан киіз үйлер тігіліп, қазақтың байырғы тұрмыс-салты насихатталады. Желіде құлын жусатқан жылқылы ауылдың «Қымызмұрындығы», көгенге қой-ешкісін байлаған қойлы ауылдың, сиырлы, түйелі ауылдардың шынайы қарбалас тіршілігі қала жұртшылығына таңдай қақтырар көріністер болмақ. Шаңырақты шеңберлеп, морға салып уық иген, темір мен ағаштан түйін түйген қазақы ұсталар шеберлігі назарға ұсынылады.

Үш күндік турнир барысында әйгілі өнер иелерінің қатысуымен өтетін концерттік бағдарламалар, қол өнер көрмелері және  тойшы қауымға арнап ұлттық тағам  түрлерінен фестивальдер ұйымдастырылады.

Елордада санитарлық-эпидемиологиялық нормалар мен талаптарды сақтау үшін құрбандыққа шалынатын малды соятын арнайы орындар белгіленді: «Нұрбереке 555» ЖШС (Алаш тасжолы), «Айсу» ЖШС (Алаш тасжолы, 10 км), «Темеш» ШҚ («Астана – Алаш тасжолы», 7 км), «Агро Өнім Астана компаниясы» ЖШС, «Жайлау» (Алаш тасжолы, 33), «Мақсат 2007» тасжолы (Железнодорожный кенті Ажар к-сі, 20), «Шаушен» ЖШС (Алаш тасжолы, 10 км).

Қазіргі кезде өңірлерде адамдар мен жануарларға жұғатын аса қауіпті аурулар тіркеліп отырғандығын ескере келе, елорда тұрғындары мен қонақтарынан мал сатып алу кезінде мұқият болуларын сұраймыз, деп жазады қалалық әкімдіктің баспасөз қызметі.

Малдарды тек аталған мекен жайлар бойынша ғана сатып алыңыздар. Сатып алу кезінде сатушыдан малға жасалған вакциналар туралы тиісті белгілер қойылған ветеринариялық анықтаманы көрсетуін сұраңыз.

Екпе жасалған күнге баса назар аударыңыз. Екпе жасалғаннан кейін мал кем дегенде 15 күнкарантинде болады. Осылайша, соңғы екпе 15 күн бұрын жасалуы тиіс.

Заңнама нормаларына сәйкес, ішкі сауда объектілеріне, соның ішінде базарларға сату үшін түскен жануарлардан алынатын өнімдер оны тамаққа пайдаланудың қауіпсіз екендігін көрсететін ілеспе ветеринариялық құжаттар болмаса, тәркіленіп, жойылады.

Айта кетейік, биыл Құрбан айт қыркүйектің 12-нен басталады. ҚР Еңбек кодексінің 96-бабына сәйкес, Құрбан айттың алғашқы күні демалыс күні болады.

Құрбан айт Ораза аяқталған соң 70 күннен кейін аталып өтілетін мұсылмандардың ең ұлық мерекелерінің бірі. Бұл күні құрбандыққа мал шалынып, оның еті үшке бөлінеді: бір бөлігі кедейлерге таратылады, екіншісі отбасыда қалады, ал үшінші бөлігі қонақтарға ұсынылады.