Jas.kz

Кеше өңір басшысы Б.Атамқұлов Рио Олимпиадасының жеңімпаздары – күміс және қола медаль иегерлері Жазира Жаппарқұл мен Отгонцэцэг Галбадрахты қабылдап, спортшыларды марапаттады, деп хабарлайды ОҚО әкімінің баспасөз қызметі.  Облыс әкімі халықаралық бәсекеде еліміздің намысын қорғап, көк туымызды желбіреткен спортшы қыздарға «Нұрсат» шағын ауданынан екі және бір бөлмелі пәтерлердің кілтін табыстап, кәсіпкерлердің атынан «Toyota Land Cruiser 200» және «Toyota Land Cruiser Prado» джип автокөліктерін мінгізді.

«Сіздер Рио олимпиадасында өнер көрсетіп жүргенде барша жерлестеріміз Өздеріңіз үшін жанкүйерлік танытып, күні-түні тілеулес болды. Сондықтан бұл сый-сияпатты бүкіл Оңтүстік жұртшылығының атынан берілген алғыс деп біліңіздер», — деді Б. Атамқұлов.

Өз кезегінде, спортшы қыздар – Жазира мен Отгонцэцэг саланы дамытудағы қолдаулары үшін  облыс әкіміне алғысын білдіріп, 2020 жылы Токиода өтетін халықаралық олимпиадада ел үмітін ақтап, барын салатындықтарын жеткізді.

Мемлекетіміздің Темірқазығы, азаматтығымыздың айшықты айғағы Конституциямыздың 21 жылдығына орай Түлкібас ауданында жаңа әлеуметтік нысандар ашылып, ел игілігіне берілді, деп хабарлайды ОҚО әкімінің баспасөз қызметі.

Мәселен, Күмісбастау мен Шарафкент ауылдарында 150 орындық жаңа білім  ордасы салынып, жаңа оқу жылында оқушыларға есігін айқара ашты.

Күмісбастау ауылындағы 1928 жылы  негізі қаланған мектепті  апатты деп танып, облыстық бюджеттен 272 млн 693 мың теңгеге жаңа мектептің құрылысы жүргізілді.

Ашылу салтанатына қатысқан аудан әкімі Ә.Тұрғымбеков барша тұрғындарды мерекемен құттықтап, ауыл халқының қуанышымен бөлісті.

Мерекелі күні Кемербастау ауылының тұрғындары қос қуанышқа кенелді. Мұндағы 1 мыңнан астам тұрғын таза ауыз сумен қамтылды.  Ауыз су құрылысына облыстық бюджеттен 48 млн. теңге қаржы қаралған. Су құбырларын тарту жұмыстарын жүргізген «OSER –A- Group» мердігер мекеме құрылысты уақтылы аяқтап ел игілігіне тапсырып отыр.

Бүгін ОҚО әкімі Б.Атамқұлов облысқа іскерлік сапармен келген израильдік «YR-Mitrelli Group» компаниясының өкілдерімен кездесті. Басқосуда облыстағы инвестициялық жобаларды жүзеге асыру мәселелері талқыланды.

Атап айтқанда, тараптардың өзара жиынында, АӨК және энергетика салаларына инновациялық технологияларды енгізу, «Сасықкөл» қоймасын тазалау және хауызын жаңарту мәселелері қаралды.

Айта кетейік, 20 жылдан астам уақыттан бері «YR-Mitrelli Group» компаниясы денсаулық сақтау, сумен қамтамасыз ету, энергетика, білім беру, тұрғын-үй құрылысы, ауыл шаруашылығы, ІТ және телеком жобаларын тұрақты қамтамасыз ету жүйесі саласында әлемнің түрлі мемлекеттерінде жұмыс жасап келеді.

Қазығұрт ауданында Тәуелсіздігіміздің 25 жылдығы мерекесіне және білім күніне орай ауданымыз алты мектепті сыйға тартып отыр, деп хабарлайды ОҚО әкімінің баспасөз қызметі.

Атап айтқанда, ауданның Қақпақ ауылынан 300 орындық бір мектеп, Көкібел, Қызылдихан, Жұмысшы және Еңбекші ауылдарынан 200 орындық бес мектеп пен Тесіктөбе елді мекенінен 150 балаға шақталған бір білім ошағы оқушылар үшін есігін айқара ашты. Төрт апатты, екі ыңғайластырылған білім ордаларының жойылуын мақсат еткен бұл құрылыстарға Ұлттық қор мен облыстық бюджеттен 2,5 млрд. теңге қаржы жұмсалды.

Соның бірі – Қақпақ ауылдық округінен «Нұрлы жол» бағдарламасы аясында салынған 300 орындық Қақпақ жалпы орта мектебі. Бұл мектепке Ұлттық қордан 540 млн. теңге қаржы бөлініп, мердігер мекеме 7 айдың ішінде құрылысты сапалы аяқтап шықты.

Ашылу салтанатына қатысқан облыс әкімінің орынбасары С.Тұяқбаев барша тұрғындарды мерекемен құттықтап, ауыл халқының қуанышымен бөлісті. Салтанатты жиын кезінде С.Тұяқбаев ауданда ашылып жатқан білім ошақтарының ұжымына облыс әкімінің сыйын тарту етті.

Жаңа мектептер  заман талабына  сай  мультимедиалық, лингофонды  кабинеттермен жабдықталған. Сондай-ақ, физика, химия, биология кабинеттері арнайы талапқа сай құрал-жабдықтармен қамтамасыз етілсе, қосымша спорт зал мен асхана жайлары да бар.

Айта кеткен жөн, биылғы жаңа оқу жылында аудан бойынша 27 мыңнан астам оқушы білім алатын болса, соның биыл 2970-і 1-сыныпқа барды.

1-қыркүйек – Білім күніне орай, Мақтарал ауданында «Нұрлы жол» бағдарламасы аясында салынған 6 мектеп ғимаратының тұсауы кесілді, деп хабарлайды ОҚО әкімінің баспасөз қызметі.

Ел Тәуелсіздігінің 25 жылдығына орай пайдалануға берілген білім ұяларының ашылу салтанатына облыс әкімінің орынбасары Жақып Бөкенбаев қатысып, барша ұстаздар мен оқушыларды жаңа білім күнімен құттықтады. Білім күні 300 орындық төрт және 200 орындық екі мектептің есігі мақтаралдық оқушыларға айқара ашылды.

Жаңадан ашылған барша мектеп ғимараттары заманауи құрал-жабдықтармен қамтамасыз етілген. Мәселен мұнда лингафондық кабинеттер, интерактивті тақталар, мультимедиялық құралдар, жаңа үлгідегі химия және биология кабинеттері оқушылардың сапалы білім алуына мүмкіндіктер туығызары хақ. Сондай-ақ, спорт залдары мен шеберханалар, мәдениет залдары оқушылардың өздері қалаған кез келген спорт пен өнердің түріне баулиды.

Бүгін Сарыағаш ауданында Қазақстан Республикасы Тәуелсіздігінің 25 жылдығы мен 1 қыркүйек білім күні мерекесіне орай, 300 орындық 3 мектеп пайдалануға берілді, деп хабарлайды ОҚО әкімінің баспасөз қызметі. Білім нысандарының салтанатты ашылу рәсіміне облыс əкімінің бірінші орынбасары  Д. Сатыбалды қатысып, оқушыларды жаңа оқу жылымен құттықтады.

«Нұрлы жол» мемлекеттік бағдарламасы аясында салынған білім ұяларының бірі Дастан ауылынан ашылған №136 орта мектеп болса, екіншісі Атамекен елді мекенінен бой көтерген №64 мектебі. «Ұлттық қор» есебінен қаржы бөлініп жаңа оқу жылына тапсырылған білім мекемелері заманауи құрал-жабдықтармен толықтай қамтылған. Балалар санының өсіп, сынып тапшылығын жою мақсатында салынған мектептер өз мерзімінде ел игілігіне беріліп отыр.  Ал, Қабланбек ауылдық округі, Жонарық елді мекенінен ашылған жаңа мектеп облыстық бюджеттің қаржысы есебінен салынған. Бұған дейін ауыл балалары көрші ауылға қатынап, білім алып келген.

Жалпы Сарыағаш ауданында 144 оқу ордасы болса, онда биыл 80 мың 600 бала білім алады.

Оңтүстік Қазақстан облысында 2016-2017 жаңа оқу жылында 73 699 оқушы 1-сынып табалдырығын аттады. Демографиялық өсімі жоғары аймақта сауатын ашып, мектепке барған шәкірттер өткен жылмен салыстырғанда 4 мыңға жуық балаға артық, деп жазады ОҚО әкімінің баспасөз қызметі.

Жалпы, биылғы жаңа оқу жылында облыстағы «Алғашқы қоңырау соғылған» 1022 жалпы орта мектепте 611 мыңнан аса оқушы білім алатын болады. Бұл былтырғыға қарағанда 27 мың балаға артық.

Мектептерде жалпы саны — 66 412 педагог кадрлар қызмет атқарады, оның ішінде 52 мыңы (78%-ы) – санаты бар ұстаздар, қалған 22%-ы жас педагогтар. Сонымен қатар, жаңа оқу жылының бірінші күні әрбір бірінші сынып оқушысына Қазақстан Республикасының Президенті Н.Ә.Назарбаевтың атынан «Менің Отаным — Қазақстан»  кітабы салтанатты түрде сыйға тапсырылып, «Мәңгілік ел» патриоттық актісі шеңберінде бірыңғай «Мен өз Отанымның патриотымын» білім беру сабағы өткізілді.

Жаңа оқу жылындағы жаңалықтарға тоқталсақ. Биыл еліміздің 1 сынып оқушылары бес күндік оқу аптасына көшуде. Ал аптаның сенбі күні есебінен 1-сынып оқушылары мен мұғалімдеріне 34 демалыс күні беріледі.

Сондай-ақ, осы жылы білім ошақтарында бірыңғай оқулықты енгізу жұмыстары жүре бастайды. Бұл базалық оқулықтар жаңартылған білім беру мазмұнына көшу кестесіне сәйкес енгізіліп, республиканың барлық оқушыларының білім деңгейін теңестіруге жағдай туғызады.

Одан бөлек, биылдан бастап орта білімнің жаңартылған мазмұнына көшу жұмыстарына байланысты жаз мезгілінде облыстағы бастауыш сыныптың жалпы пәндер бойынша 10 мыңға жуық мұғалімі «Назарбаев Зияткерлік мектебі» дербес білім беру ұйымының «Педагогикалық шеберлік орталығы» мен «Өрлеу» біліктілікті арттыру ұлттық орталығында даярлық курсынан өтті. Жыл соңына дейін, яғни, 2016 жылдың қазан-желтоқсаны аралығында критериалды бағалау жүйесі бағытында облыс бойынша 1030 мектеп директорының орынбасарларын  мектептік үйлестірушілер ретінде және 30 білім бөлімдерінің әдіскерлерін аймақтық үйлестірушілер ретінде біліктілігін арттыру курстарынан өткізу жоспарланып отыр.