Jas.kz

Қазақ Ұлттық өнер университеті 6 сәуір сағат 15.00 -де Қазақстан Республикасы тәуелсіздігінің 25 жылдығына және Алаш қайраткерлерінің бірі Ә.Бөкейхановтың 150 жылдық мерейтойына орай «Ұлы даланың ұланымын» атты студенттер айтысын өткізгелі отыр.

Айтысқа оқу орнының «Дәстүрлі ән» кафедрасы «Айтыс» мамандығының студенттері және Астана қаласы жоғары оқу орындарының таңдаулы  айтыскерлері қатысады.

 Қазақ Ұлттық Өнер университетінің ректоры, ҚР Еңбек Ері, Әлем әртісі Айман Мұсахаджаеваның қолдауымен 2014 жылы ашылған «Айтыс» мамандығында қазіргі таңда 7 студент білім алуда. Атап айтқанда 2 курс студенттері: Аруна Керімбек, Бек Шымат, Дәурен Ысқақ, Сырым Әділбек;    1-курс студенттері: Рай Дөңбай, Төрехан Совет, Сұлужан Таубалды сынды жас талап ақындар жыр додасында өз бақтарын сынап көрмек. Сонымен қатар Л.Н. Гумилев атындағы Еуразия Ұлттық университетінің магистранттары – Рауан Хайдаров, Нұрқанат Қайрат; 2015 жылғы республикалық жастар айтысының жеңімпаздары: Еуразия Гуманитарлық институтының студенті Таңжарық Ержан, Қазақ Гуманитарлық Заң университетінің түлегі Данияр Алдаберген;  сондай-ақ Ардакерей Кәп, Дәурен Полатбаев, Нартай Тілеуқұл сынды жас айтыскерлер қатысады деп күтілуде.

Айтыстың мақсаты –  от ауызды, орақ тілді ақындардың жүрекжарды жырымен тәуелсіздіктің қадірін ұғындыру және азаттық жолында алтын бастырын бійгеге тіккен Алаш ардагерлерін еске алу, атамұра өнерді дәріптеу болып табылады.

ҚазҰӨУ қабырғасында тұңғыш рет өткізілгелі отырған айтысқа көрнекті мемлекет және қоғам қайраткері, ғалым Мырзатай Жолдасбеков, академик, ғалым Сейіт Қасқабасов, ақын, ҚР Еңбек сіңірген қайраткері Жүрсін Ерман, жыршы, ҚазҰӨУ профессоры Алмас Алматов бастаған Аманжол Әлтай, Серікзат Дүйсенғазы, Жібек Болтанова, Дәулеткерей Кәпұлы, Балғынбек Имаш, Айнұр Тұрсынбаева, Шырынбек Қойлыбаев,  Қалқаман Сарин, Әсем Ережеқызы, Еркебұлан Қайназаров, Иран-Ғайып Күзембаев, Сара Тоқтамыс  Жандарбек Бұлғақов, сынды елге танымал ақындар қонақ ретінде келмекші.

Айтысты ұйымдастырушы Қазақ ұлттық өнер университеті Дәстүрлі музыкалық өнер факультетінің «Дәстүрлі ән» кафедрасы. Қорқыт Ата атындағы ғылыми-зерттеу институты мен Айтыс ақындары мен жыршы, термешілердің халықаралық Одағы қолдау да білдіріп, өз жүлделерін тағайындап отыр.

 Үздік өнерімен дараланған ақынға – Қазақ Ұлттық Өнер университетінің ректоры, ҚР Еңбек Ері, Әлем әртісі Айман Мұсахаджаеваның арнайы  жүлдесі табысталады. Қатысқан ақындарға айтыс ардагерлері атындағы арнайы жүлделер тағайындалып отыр.

Келем деушілерге есік ашық.

2016 жылдың 8-12 сәуір аралығында «Нұр Отан» партиясы жанындағы «Жас Отан» жастар қанаты Астана қаласы жастар саясаты мәселелері жөніндегі басқармасының қолдауымен «Жастар Жалыны – 2016» атты шығармашыл жастардың ауқымды фестивалі өтеді. Дәстүрлі іс-шара Қазақстан Республикасының 25 жылдығына арналады.

Фестиваль аясында жастардың өнерлері, белсенділіктері, білім технологиялары және өзге де бағыттары бойынша 10 номинациядан тұратын байқаулар ұйымдастырылады.

Шараға елорданың барлық жоғары және кәсіптік-техникалық оқу орындарының студенттері мен студенттік ұжымдары қатысады деп жоспарлануда.

Мақсат – жастардың азаматтық және шығармашылық белсенділігін арттыру, дарынды жастарды анықтау және тәуелсіздік тағылымын таныта отырып, патриоттық рухта тәрбиелеу болып табылады.

Фестивальдің қорытынды гала-концерті 13 сәуір күні астаналық Конгресс-Холл концерт-залында өтеді.

Бүгін ҚазМЗУ ғимаратында еліміздің табысқа жеткен танымал әйелдерімен кездесу-әңгімелесу кеші өтті. Астана қаласының «Жастар саясаты мәселелері басқармасы» мен «Қазақ Қызы» қоғамдық ұйымының бірлесе отырып ұйымдастырған іс-шараның басты мақсаты – елордамыздың жас аруларының мәдени-адамгершілік тәрибесінің жоғарылауына үлес қосу, олардың жеке және рухани әлеуетінің одан әрі дамуына, патриоттық сезімдерін нығайтып, ұлттық тәрбие қағидаларының қайта жандануына ықпал ету.  

Кешке шақырылған еліміздің танымал жеті аруы 7 әлеует бойынша өз ойларын ортаға салды. Атап айтсақ, Майра Мухамедқызы «Патриоттылық пен құндылық»,  Тамара Асар «Ерік күші мен талпыныс», Оразгүл Асанғазы «Адамгершілік пен тәрбие», Бірғаным Әйтімова «Ақыл мен білімділік», Салтанат Байқошкарова «Еңбекқорлық пен тәртіп», Аяулым Ерғазы «Сұлулық пен әсемдік», Жанар Байжулдинова «Қайырымдылық пен ризашылық» төңірегінде әңгіме өрбітті.

Тарихта есімдері алтын әріптермен өрнектелген – Тұмар ханым, Ұмай ана, Айша бибі, Домалақ ана секілді ұлтты тәрбиелеп, халықты қалыптастырып, еліміздің берекесін баянды етуге мол үлес қосқан аналарымызды үлгі ете отырып, сөз қозғаған спикерлер қазіргі қазақ қызы қандай болу керектігі жайында әңгіме тарқатты.

Бүгінгідей жаһандану кезінде қыз бала тәрбиесі, оның ішінде қазақ қызының тәрбиесі, қыз балаға аттап өтуге болмайтын әдеп пен инабаттылық талаптары туралы тәжірибесі мол, халықтың сүйіспеншілігіне бөленген қыз-келіншектермен пікір алмасу – шараға жиналған жас қыздардың қызушылығын тудырды.

Айта кетейік, аталмыш жоба ҚР Президенті Н.Ә.Назарбаевтың өсіп келе жатқан ұрпақтың мәдениетін, тәрбиесін және білімін дамыту тапсырмасын орындауға бағытталған.

Ұлттық КВН лигасы осыменен үшінші жыл жұмыс жасап келе жатыр. Екі күн ішінде редакторлар еліміздің түкпір-түкпірінен келген 36 команданың ойынын қарап, іріктеуден өткізген болатын. Лига ойындары телевизиялық форматта болғандықтан редакторлық талап өте қатал. Сондықтан болар, Астанаға келген командалардың тек қана 17 –і фестивальда өз өнерін ортаға салды.  

1. «Геоказахи» — Семей қаласы
2. «Проспект победы» — Астана қаласы
3. «Полицейская академия» — Қостанай қаласы
4. «Совершенно секретно» — Алматы қаласы
5. «Сборная школ Жаксынского района» – Ақмола облысы
6. «Сборная Коргалжына» – Ақмола облысы
7. «Сборная Кокшетау» — Көкшетау қаласы
8. «Интернешнл» — Алматы қаласы
9. «Вне закона» — Астана қаласы
10. «Железный район» — Ақтөбе қаласы
11. «Сборная ЕНУ» — Астана қаласы
12. «Сборная КазНУ» — Алматы қаласы
13. «НарХоз» — Алматы қаласы
14. «Голливуд» — Қостанай қаласы
15. «Сборная колледжа «Адилет» — Алматы қаласы
16. «Акцент» — Павлодар қаласы
17. «Сборная Караганды» — Қарағанды қаласы

Айта кету керек, гала-концерттің барлық қатысушылары сәуір айының 19-20 және 26-27 жұлдызында болатын  финалдың төрттен біріне жолдама алады.