Jas.kz

Алматы облыстық перинаталдық орталықта 16-шы желтоқсан күні 13 сəби дүниеге келді. Оның 7-і ұл, 6-ы қыз бала. Ал мерекенің екінші күнінде 20 нəресте дүние есігін ашты. Олардың 13-і ұл бала. Алакөл ауданының тұрғыны Гүлнұр Байбатшанова егіз қыз балаларды дүниеге əкелді.

Айта кету керек, Талдықорған қаласында орналасқан перзентхана өңірдің 7 ауданы мен екі қаласына қызмет көрсетеді.

Орталықтың бас дəрігері Қанат Қалиханұлының айтуынша, биылғы жылы да табиғи өсім бар. Жыл басынан бері 5 мың 300-ден астам бөбек туып, олардың басым бөлігі ер бала болды. Жалпы бұл жерде 23 дəрігер жəне 154 орта буын мамандары жұмыс істейді.

ҚазАқпарат

Мемлекет басшысы Нұрсұлтан Назарбаевтың халықтың әл-ауқатын арттыруға байланысты тапсырмасын жүзеге асыру бойынша Ақтөбе облысының басшылығымен бірқатар іс-шаралар атқарылуда, деп жазады Ақтөбе облысы әкімінің баспасөз қызметі.

Тұрғын үйлер, әлеуметтік нысандар құрылысы, жодарды жөндеу – бұл тек өңірде жасалып жатқан жұмыстардың бір бөлігі ғана. Осы жылы облыста «Қолжетімді баспана», «Өңірлерді дамыту» мемлекеттік бағдарламасы аясында және «ТҚЖБ» салымшыларының арасындағы тұрғын үй құрылыс жинақ желісі бойынша 5000 астам жайлы пәтер кілттері табысталды.

Айта кетейік, соңғы 5 жылда барлық қаржыландыру көздері есебінен 2,3 млн. шаршы метр тұрғын үй пайдалануға берілді. Яғни, 19 мыңнан астам отбасы баспанамен қамтылды. Облыстың тұрғын үй құрылысына барлық қаржыландыру көздерінің есебінен 163 млрд. теңгеден астам инвестиция тартылды. Ағымдағы жылы 580 шаршы метрден кем емес тұрғын үйді пайдалануға беру жоспарлануда.

«Өңірлерді дамыту» бағдарламасы аясында «Нұр Ақтөбе» шағын ауданында 2016 жылы тағы да 23 блок-секциялы үйдің құрылысы басталды. Бұл дегеніміз жалпы аумағы 75,9 мың шаршы метр болатын 1278 пәтер. Үйлердің құрылысы 2017 жылы аяқталады.

Бұдан өзге, облыс тұрғындарына 6000 астам жер телімдері берілді.

16 желтоқсан – Қазақстан Тәуелсіздігінің 25 жылдық мерейтойы күні Ақтөбе облысының перзентханаларында 59 сәби өмірге келді. Оның 38-і ұл балалар, 21-і қыз балалар. Облыс әкімі Бердібек Сапарбаев перзентханада жатқан 12 ананы құттықтап, сыйлықтар табыс етті.

— Мемлекет Басшысы Нұрсұлтан Назарбаевтың тапсырмасы бойынша Қазақстанда демографиялық ахуалды жақсарту үшін барлық жағдай жасалып отыр. Медицина саласы дамып, жаңа жұмыс орындары ашылуда, азаматтарды тұрғын үймен қамтамасыз ету жөніндегі мемлекеттік бағдарламалар жүзеге асырылып жатыр. Елімізде бала туу көрсеткіші жақсы, халықтың өсімі жоғарылап келеді. Тұрғындар санының табиғи өсімін арттыру үшін 2017 жылы облыстық балалар ауруханасының қасында құны 10 млрд. теңге болатын заманауи перинаталды орталық ашылады, — деді Бердібек Сапарбаев.

Аймақ басшысы, сондай-ақ, облыстың ең түкпірінде тұратын әйелдерден бастап барлық жүкті әйелдердің денсаулығы туралы ақпарат жазылған бірыңғай мәліметтер базасын құру мәселесі қарастырылып жатқанын айтты. Орталықтандырылған база әйелдерге көмек көрсету туралы немесе аудандық, облыстық деңгейдегі арнаулы медициналық мекемелерге апару қажеттігі туралы жедел шешім қабылдауға ықпалын тигізуі тиіс.

Статистикалық мәліметтерге сәйкес, облыста халықтың өсімі көрсеткіші қалыпты. Перзентханалар мен босану бөлімдерінде күніге 70-80 сәби өмірге келеді, ал жылына 19-20 мың отбасы балалы болады. Сарапшылардың пікірінше, демографиялық ахуалдың жақсаруына көп жағдайда денсаулық сақтау саласын барынша қаржыландыру және аймақтағы перинаталдық көмектің деңгейін арттыру ықпал етіп отыр. 25 жылда Тәуелсіз Қазақстанның медицина саласы жаңа деңгейге көтерілді, жоғары жетістіктерге жетті. Біздің дәрігерлер 500 грамм болып өмірге келген сәбилерді аман алып қалуға қол жеткізді. Тәуелсіздік жылдары Ақтөбе облысында туу көрсеткіші 67,7 пайызға көбейген, халық саны – 15 пайызға, өмір сүру жасы 72 жылға артты.

Мемлекет Басшысы Нұрсұлтан Назарбаевтың тапсырмасы бойынша, 2017 жылдың 1 шілдесінен бастап бала тууға қатысты берілетін бір реттік мемлекеттік жәрдемақы мөлшері 20 пайызға көбейеді. Ана мен баланы қорғауға арналған шаралардың жоғары деңгейде жүргізілуі, тұрғындардың өмір сүру деңгейінің жақсаруы отбасыларға ұрпақ жалғастыру туралы шешімді сенімді түрде қабылдауға септігін тигізіп отыр. 1991 жылдан бастап мемлекеттік қазына есебінен облыста жалпы алаңы 61 млн. шаршы метр болатын 55 мың пәтер, 113 мектеп, 487 мектепке дейінгі мекеме, 700 спорт мекемесі, 122 денсаулық сақтау нысаны, 1000 шақырымнан астам автокөлік жолы салынды. 2016 жылы облыстағы барлық аудан орталықтарын газдандыру мәселесі толық шешілді.

Ақтөбе облысында облыс әкімі Бердібек Сапарбаевтың бастамасы бойынша өткізілген ел Тәуелсіздігінің 25 жылдық тойына арналған қайырымдылық акциясының қорытындысы шығарылды, деп хабарлайды Ақтөбе облысы әкімінің баспасөз қызметі.

Ел Тәуелсіздігінің ширек ғасырлық тойы жылы 380-нен астам қайырымдылық шарасы өткізілді, осы шаралар барысында 20 000-нан астам адам жалпы сомасы 16 млн. теңгеден астам көмекке ие болды.

Соның ішінде халықтың әлеуметтік осал топтарына, аз қамтылған және көп балалы отбасыларға, мүгедек балаларға, жалғыз басты аналарға киім-кешек, азық-түлік, мүгедекр азаматтарға техникалық құралдар алуға, тұрмыстық жағдайды жақсартуға, үйлеріне газ кіргізуге, т.б. көмек көрсетілді. Жетім балалардың Тұрғын үй құрылыс жинақ банкіндегі есепшоттары 7 млн теңгеге толтырылды. Жеке және мемлекеттік ұйымдар 200 ақтөбелік азаматқа тіс протездерін салу үшін стоматологиялық көмек көрсетті. Ақтөбеде екі қайырымдылық дүкені ашылды, бұл дүкендер арқылы алты айдан кем уақыт ішінде аз қамтылған 4500 отбасы балаларына бастан-аяқ күздік және қыстық киімдер алды.

Аймақ басшысы Бердібек Сапарбаевтың бастамасы бойынша Қайрат Нұртас, «Музарт» және «Ағайынды Жүгінісовтер» секілді елімізге белгілі эстрада жұлдыздары қайырымдылық концерттерін өткізді. Енді міне бұл тізімге «Славян базары» халықаралық байқауының гран-при жүлдегері Димаш Құдайберген, әнші Ерболат Құдайберген мен «Алаш жолы» тобы да қосылды. «Қоныс» спорт сарайында өткен концертті облыс әкімі Бердібек Сапарбаев та тамашалады.

Аймақ басшысы қайырымдылық шараларының қоғам үшін маңыздылығына, соның ішінде оның қоғамдағы бірлік пен татулықты сақтаудағы ролі туралы айта келіп, әншілерге осы игі іске атсалысқандары үшін алғысын білдірді.

Концерттен түскен қаражат тұтастай көмекке мұқтаж ақтөбеліктердің әлеуметтік мәселелерін шешу үшін жұмсалады. Нақтырақ айтсақ, 7 отбасына (оның ішінде ауылдық жерде тұратын отбасылар да бар) үйге су мен газ кіргізуге, қажетті дәрі-дәрмек пен киім-кешек алуға қолдау көрсетіледі. Қаражаттың бір бөлігі бірнеше жылдан бері мүгедектік арбаға таңылған ақтөбелік Виктория Квашаның далаға өз еркімен кіріп-шығуы үшін — ол тұрып жатқан үйге пандус қондыру үшін жұмсалады.

Ақтөбеде көліктік-логистикалық орталықтың ашылуы өтті, деп хабарлайды Ақтөбе облысы әкімінің баспасөз қызметі.

— Ақтөбе облысы Орталық Азияның ірі транзиттік тораптарының бірі болып табылады. КЛО ашылуы өңір экономикасының барлық салалары үшін өзекті болып табылады және «Батыс Еуропа — Батыс Қытай» халықаралық транзиттік дәлізінің көліктік-логистикалық жүйесіне қызмет көрсетудің жалпы тізбегіне кіргізілді. Аумағы 15 мың шаршы метр болатын көліктік-логистикалық орталық Ақтөбе қаласында орналасқан және барлық қажетті инфрақұрылыммен жабдықталған. Кәсіпорында орташа еңбекақысы 100 мың болатын 250 жұмыс орын ашылды,-деді облыс әкімі маңызды жобаны жүзеге асырған компания басшылығына алғысын білдіре отыра.

Көліктік-логистикалық орталықтың басты артықшылығы оның әсіресе жаһандану жағдайында маңызы артқан қолайлы экономикалық-географиялық жағдайымен байланыстырылады. Нысанда тауарды тиеп, түсіретін темір жол торабы бар. КЛО жылына 70 583 тоннаға дейін жүкті қабылдап, өңдемек.

«Бизнестің жол картасы 2020» бірыңғай бағдарламасы аясында «Бектұрова Ж.А» жеке кәсіпкерлігіне орталық құрылысы үшін пайыздық мөлшерлеме мен субсидиялау түрінде 550 млн. теңге және құрал-жабдықтар сатып алуға 2070 млн. теңге көлемінде көмек көрсетілді.

Сонымен қатар, Ақтөбеде аумағы 16 000 шаршы метрді құрайтын «Шебер» гипермаркеті ашылды. Аталған жобаны қаржыландыруға 2,5 млрд. теңге бөлініп, 260 жұмыс орны ашылған. Жобаны жүзеге асыру барысында мемлекеттік қолдау аясында құны 630 млн. теңге болатын құрал-жабдықтарды сатып алып, айналымдағы қаржыны толтыру үшін несиенің пайыздық мөлшерлемесін субсидиялау бойынша жағдайлар жасалды.