Jas.kz

Оңтүстікте  Қазақстан Республикасы Тәуелсіздігінің 25 жылдығы аясында иран этносының тілі, мәдениеті және салт-дәстүрі күні аталып өтті.

Облыстық «Қоғамдық келісім» КММ-да өткен іс-шарада ұлттық тағамдар және қолөнер бұйымдарының көрмесі көпшіліктің назарына ұсынылды. Облыстық ассамблея хатшылығының инспекторы Ұлжан Айтубаева барша қатысушыларды мерекелерімен құттықтап, қоғамдық келісім мен тұрақтылық — біздің басты ұстанымымыз болуы тиіс екендігін айтып өтті. Өз кезегінде облыстық иран этномәдени бірлестігінің төрағасы Нұрысбек Капар-Пур  Қазақстанда әрбір этностың өз тілі мен мәдениетін сақтауына және дамытуына барлық жағдай жасалғанына ризашылығын білдірді. Салтанатты  жиын соңы концерттік бағдарламаға ұласып, елдің ынтымағы мен бірлігін нығайтуға үлес қосып жүрген азаматтар алғыс хаттармен марапатталды.

Айта кетерлігі, бүгінде Оңтүстік Қазақстанда 5 мыңға жуық иран этносының өкілі тұрады.  Облыста 1997 жылы ашылған иран этномәдени бірлестігі ел бірлігін бекемдеу, қоғамдық келісімді сақтау бағытында өңірде атқарылған барлық кешенді іс-шаралардың жанынан табылып келеді. Тағы бір тоқтала кететін жайт, біздің елімізде тұрып жатқан барлық этностың кең тыныстауына, өздерін еркін ұстап, салттарын сақтап, дәстүрлерін дәріптеулеріне, ана тілдерін ұмытпай, ұлттық құндылықтарын ұлықтауларына толық мүмкіндіктер жасалып отыр.

ҚазАқпарат

Оңтүстік Қазақстанда ел Тәуелсіздігінің 25 жылдығына орай, «Оңтүстік жолдары» мемлекеттік коммуналдық кәсіпорынына 25 бірлік арнайы техника табысталды. Шараның салтанатты ашылу рәсіміне қатысқан облыс әкімі Жансейіт Түймебаев берілген техникалармен аймақтағы автожолдарды күтіп ұстау жұмыстарын дер кезінде орындап, қауіпсіздікті қамтамасыз ету сапасының жақсаратынына сенім білдірді.

Атап айтқанда, бұл күні 2 бірлік автогрейдер, 1 бірлік «Урал» қар тазалағыш шнекороторы, аспалы қосалқы жабдықтарымен 4 бірлік МТЗ-82 тракторы, 2 бірлік «КамАЗ» жүк көлігі, 13 бірлік «Газель» маркалы жол жөндеу қызметінің жүк көлігі, 1 бірлік Жол таңбалау көлігі (разметочная машина «Газель»), 1 бірлік NISSAN TЕRANO (қызметтік көлік) және 1 бірлік НИВА — 21214 қызметтік көліктері берілді.

Жаңа техникаларды аралап көрген  аймақ басшысы өңіріміздегі барлық аудандарға берілетін техниканы қолдануда, әсіресе, қысқы мерзімде қауіпті саналатын Қазығұрт, Бәйдібек, Созақ, Түлкібас аудандарындағы асуларды үнемі назарда ұстап, қардан тазартып отыруды тапсырды.

Оңтүстік Қазақстан облысында «Оңтүстік жолдары» мемлекеттік коммуналдық кәсіпорнына» қарасты 4 330 шақырымды құрайтын облыстық маңызы бар автомобиль жолдары бар. Бүгінге дейін кәсіпорынның балансында жалғыз ғана техника болып, тиісті жұмыстар қосалқы мердігерлерді тарту арқылы және жалдаумен жүргізілген болатын.

  Айта кету керек, 1991-1999 жылдар аралығында автомобиль жолдарының жағдайы көбінесе ағымдағы жөндеу жұмыстары есебінен күтіп ұсталған. Автомобиль жолдарын салуға және қайта жаңартуға мүлдем қаражат бөлінбеген. Жалпы, 2000-2015 жылдары облыс жолдарына 151 млрд. теңге бөлініп, 9 176 шқ. жолда құрылыс-жөндеу жұмыстары жүргізілді. Оның ішінде 100 көпірдің жөндеу жұмыстары және 45 көпірдің құрылысы жүргізілді. Сонымен қатар, 2003 жылдан бері 70 шқ. жаңа жолдардың құрылысы жүргізіліп, пайдалануға берілді.

Десе де, әлемде орын алып жатқан экономикалық дағдарысқа қарамай, облыста экономиканың күретамыры болып саналатын жол инфрақұрылымын дамытуға коп көңіл бөлініп келеді. Тек биылғы жылдың өзінде – Тәуелсіздіктің 25 жылдығында облыста 305 нысанның құрылыс-жөндеу жұмыстарына 25 млрд. теңге бөлініп, 639 шқ. жол мен елді мекен көшелері қамтылды.

ОҚО әкімінің баспасөз қызметі

Өзбекстан Республикасында желтоқсанның 4-і күні Президент сайлауы өтті. Мақтарал ауданының атынан аудан әкімінің кеңесшісі Ақан Әжібек, аудандық Мәслихаттың төрағасы Мұхтар Жалмшиев, аудандық Қоғамдық кеңестің төрағасы Тойым Жүніс т.б. өкілдер Өзбекстан астанасы Ташкент қаласында болып, сайлаудың өту процесін бақылап қайтты, деп хабарлайды аудан әкімдігінің баспасөз қызметі.

Ресми мәліметке сәйкес, Өзбекстан азаматтары жалпы саны 9383 сайлау учаскесінде (олардың 44-і шетелде ашылған) дауыс берген. Сайлаушылар тізіміне барлығы 20 миллион 428 мың 891 адам енгізілген. Сайлауға қатысып жатқан төрт кандидаттың бірі — қазіргі премьер-министр әрі президент міндетін уақытша атқарушы Шавкат Мирзияев бұрынғы президент Каримовтің саяси бағытын ұстанатынын мәлімдеген. Қалған үш кандидатта билікті қолдайтын саяси ұйымдардан ұсынылғандар: Өзбекстан халықтық-демократиялық партиясынан Хотамжон Кетмонов, «Милли тикланиш» («Ұлттық жаңғыру») партиясынан Сарвар Отамурадов және «Адолат» социал-демократиялық партиясынан Наримон Умаров. «Өзбекстан студенттері 1-5 желтоқсан аралығында сайлауға байланысты демалысқа жіберілді. Сонымен қатар, Ташкентте сайлау күні қоғамдық көлікте жүру тегін болады. Автобус бағдарлары мен метрополитен жұмысы сайлау учаскелері ашылғанға дейін бір сағат бұрын, яғни сағат 05.00-де бастады. Сайлаудың нәтижесін ОСК бүгін жария етеді. Мақтарал ауданының атынан 6 өкіл келіп отырмыз, сондай-ақ Сарыағаш, Шардара, Қазығұрт аудандарының атынан да өкілдер келді» — дейді Мақтарал ауданы әкімінің кеңесшісі Ақан Әжібек.

«Оңтүстік — Батыс» ғылыми зерттеу институтының мамандары Отырар ауданындағы сортаңданған жерлерді игеру ісін қолға алып отыр. Жоба аясында аталмыш ауданның 110 гектар жеріне осыдан 1 жыл бұрын өсімдіктің 8 түрін еккен болатын. Нәтиже көңіл қуантады.Облыста 1 миллиион 300 гектар жер сортаңданып біткен, деп жазады облыстық әкімдіктің баспасөз қызметі.  Бұл сала мамандарының алаңдатушылығын тудыруда. Сондықтан да Ызакөл ауылындағы «Фасо» шаруа қожалығының 110 гектар жеріне мемлекет тарапынан сексеуіл, изен, кереуік пен қараматау және чагон өсімдіктері егіліп отыр. Мақсат айқын. Жайылым жердің көлемін арттырып, мал азығын молайту қажет.

«Оңтүстік-Батыс» ғылыми зерттеу институтының бөлім меңгерушісі Талғат Ибрагимовтың айтуынша қазір нәтиже алынған. Сексеуілдің өзі  50-60 см-ге дейін өскен. Бұл өсімдіктер ертең өсіп, жан-жаққа желмен тарайды. Сөйтіп, осы аймақтың барлығына жайлайды. Енді осы жолы қардың үстіне қарамтау мен чагонды екпек. 110 гектар жерді қоршап, мал өтіп кетуінен сақтай отырып егіп отырмақ. Бүгінде 800 келі өсімдік ұрығы сатып алынды. Мамандар сексеуілдің «Жансая» сұрпы мен кереуіктің «Сән» түрін өздері өндіруге кіріскен. Бұған жергілікті шаруалар қуанып отыр. Облыс әкімдігі мен жергілікті ауыл шаруашылығы бөлімі мақұлдаған жоба алдымен Арыс және Ордабасы аудандарында бастау алған.  Қазір міне, Отырар топырағында қарқын алды. Тиімділігі жоғары жобаны өзге аудандарға да енгізу жоспарда бар.

inform.kz