Қ. Мұңайтпасов атындағы Орталық стадионда спорт пен салауатты өмір салты фестивалі ашылды. Шара кешкі сағ. 18-ге дейін жалғасады, сондай-ақ, ертең сағат 10.00-18.00 аралығында өз қонақтарын күтеді, деп жазады қалалық әкімдіктің баспасөз қызметі.

— Фестиваль елордада алғаш рет өткізіліп жатыр. Оны өткізу идеясы Астанада спортты дамыту қажеттілігіне орай туындады. Біз барлық жастағы астаналықтар үшін осындай алаң құрып отырмыз. Мұнда отбасыңмен, достарыңмен келуге болады, тіпті, жастар мен егде жастағы тұлғалар да қатысады. Мерекенің жыл сайын ұйымдастырылады деп үміттенеміз, — дейді «Астана жастары» жастар ресурстық орталығының талдау, мониторинг, ақпараттық және әдістемелік жұмыс маманы Әйгерім Бейсембаева.

Стадион аумағы шағын футбол, шахмат, үстел теннисі, стритбол ойнау үшін бірнеше аймаққа бөлінген. Кроссфитпен және армрестлингпен айналысатын алаңдар да бар. Жарыстар басталып кетті, жеңімпаздар сыйлықтармен марапатталады.

Сондай-ақ спорт тауарларының жәрмеңкесі өтуде. Мұнда спорт тауарлары мен киімдер туралы ақпарат алуға, жаттығу құралдарын сынап көріп, сатып алуға болады, елордалық спорт федерациялары жаттықтырушыларының шеберлік сыныптары өтеді. Мұнымен қоса, қатысушыларға қаладағы фитнесс-клубтар мен спорт ұйымдары туралы мәліметтер ұсынылады. Ди-джей жиналған қауымға көтеріңкі көңіл күй сыйлайды, сондай-ақ, баршаға палау ұсынылады.