Алматы облысының Талғар қаласынан орын тепкен «BARON FOOD» ЖШС іргесінің қаланғаны көп бола қойған жоқ. Осыдан үш жыл бұрын, яғни  2013 жылы Калинин Сергей Алексеевичтің жетекшілігімен құрылған компания мұздатылған полуфабрикаттар өндіреді.

Екі жүзге тарта еңбеккері бар  «BARON FOOD» ЖШС-нің өндірістік қуаттылығы жылына 700 тоннаны құрайды. Мұнда мұздатылған полуфабрикаттар өндірудің автоматтандырылған  BARON 700A желісі  жұмыс істейді. Аталған зауыттың өзінің жекеменшік техникалық қызмет көрсету станциясы бар, бұл шығарылған өнім бағасына қосылатын қосымша құнның болмауын қамтамасыз етеді. Сондай-ақ, өзінің технологиялық құрылғыларды өндіру мен жөндеуден өткізу цехы және шығарылатын өнімге қажетті экологиялық таза ауылшаруашылық өнімдерін өсіретін жекеменшік шаруа қожалығы бар. Осындай жетістікке ие компанияның алға қойған негізгі мақсаты – өндіріліп жатқан өнімнің барлық тұтынушыға қолжетімді болуы. Олар бұл үдеден шығып жүр. «BARON  FOOD» ЖШС-нің тауарлары бүгінгі таңда көрші Ресей рыноктарында да саудалануда.

Бұл туралы Алматы облысының өңірлік коммуникациялар қызметі ұйымдастырған Талғар ауданындағы көшпелі брифингте зауыт директоры Ю. Литвинова айтты.

Жалпы, Талғар ауданында бүгінгі таңда осы «BARON FOOD» ЖШС секілді 8800-ден астам шағын және орта бизнес нысаны жұмыс істейді. Олар өндірген өнімдер көлемі 9,1 млрд. теңгені құраған.Нәтижесінде бюджетке 5,1 млрд. теңге қаражат түсіп, жалпы түсімнің 42,5 пайызын құраған. Бұл салада қазіргі таңда аудан бойынша 26 мыңнан астам адам жұмыспен қамтылған.