Оңтүстік Кореядағы VI Дүниежүзілік әскери ойындарда Қазақстан Қарулы Күштері құрамасы жақсы нәтиже көрсетті.
Грек-рим стиліндегі балуандардың сайысында 59 келі салмақта Қазақстан Қарулы Күштері құрамасының спортшысы Мирамбек Айнағұлов үздік атанды. Өзінің қарсыластарың нық жеңе отырып, ол команданың қоржынын алтын медальмен толықтырды.
Сонымен қатар жүзушілеріміз де жаман нәтиже көрсеткен жоқ. Кіші сержант Александр Тарабрин 100 метр қашықтыққа арқамен жүзуден «күміс» медальді қанжығасына байлады. Осылайша, қазір армиялық құрамамыздың қоржынында бір алтын, екі күміс және төрт қола медаль. Бұл әскери ойынның бірінші күнінде 57 келіге дейінгі салмақта ҚР спорт шебері, әлем чемпионаттарының жүлдегері Владимир Кудрин командамыздың қоржынын күміс медальмен майлады. Екі қола медальді 74 келіге дейінгі салмақта халықаралық дәрежедегі спорт шебері, әлем чемпионы кіші сержант Ғалымжан Үсербаев пен 65 келіге дейінгі салмақта ҚР спорт шебері, әлем чемпионатының жүлдегері ефрейтор Азат Сақаев иеленді. Құрамаға тағы да екі «қола» медальді 61 келі салмақта еркін стильдегі балуан Қазақстанның чемпионы, әскери қызметшілер арасындағы 2014 жылғы әлем чемпионатының күміс жүлдегері ефрейтор Елдос Әбікенов пен оның серігі кіші сержант Әділет Даулумбаев әкелді.