Қазақстан Республикасының Мемлекеттік хатшысы Гүлшара Әбдіқалықова «Болашақ» бағдарламасының жыл сайынғы халықаралық конференциясын (BARCEF-2015) ашты.
Конференция жұмысына Парламент депутаттары, орталық мемлекеттік органдар басшылары, отандық және халықаралық сарапшылар, «Болашақ» бағдарламасының серіктестері – Қазақстанның және шетелдік жоғары оқу орындарының өкілдері қатысты.
Құттықтау сөзінде Гүлшара Әбдіқалықова Қазақстан Президентінің бастамасымен ашылған «Болашақ» бағдарламасы арқылы бүгінге дейін 8 мыңнан астам жоғары білікті мамандар даярланғанын атап өтті. Қазіргі кезде олар ұлт экономикасының түрлі салаларында – 2000-нан аса маман өнеркәсіптік және аграрлық секторда, 2000-ға жуығы білім саласында, 1500-ге жуығы ақпараттық технологиялар және коммуникациялар саласында табысты еңбек етуде.
Г. Әбдіқалықова «Болашақ» бағдарламасы Бес институционалдық реформа, Ұлт жоспары, «Нұрлы жол» мемлекеттік бағдарламасы аясында дамып жатқанына тоқталды. Мемлекеттік хатшы елдің адами капиталының сапасын жоғары білікті кадрлар үшін бәсекелестік күрес жағдайында арттыру қажеттігіне назар аударды.
Гүлшара Әбдіқалықованың айтуынша, стипендиаттарды сапалы іріктеу, неғұрлым дарынды жастарды тарту және ұлттық экономиканы дамытудың басымдығы бар бағыттары бойынша ғылыми-зерттеу әлеуетін арттыру ісі басты назарға алынады.
Мемлекеттік хатшы конференцияға қатысушыларды «Болашақ» бағдарламасының жаңа бесжылдық даму жоспары аясында ұсынылған бастамаларды жан-жақты талқылауға шақырды. Соңында Г.Әбдіқалықова әрбір стипендиатқа жұмсалған мемлекеттік инвестиция ел экономикасын дамыту үшін және «Қазақстан-2050» стратегиясының басты мақсаты – әлемнің неғұрлым дамыған озық елінің қатарына қосылу үшін жаңа білім және машықтарды игеру арқылы еселеніп қайтатынына сенім білдірді.