Қарағандылық физиктер қымбат тұратын құрылғылардың төзімділігін арттыратын тәсіл ойлап тапты.
Жаңа технология тау-кен, мұнай және энергетикалық компанияларды жабдықтауға кететін шығындарды екі есеге азайтады. Қазір ғалымдар қарағандылық жылу электр орталығындағы көмір ұнтақтайтын диірменнің төзімділігін арттырумен айналысып жатыр. Алдымен құрылғының бөлшектері тазартылып, одан кейін электрондық-сәуле балқымасынан өткізіледі. Соңында құрылғының үйкелісін азайту үшін оның сыртын арнайы жабындымен жабады. Мұндай тәсіл ғалымдардың айтуынша, құрылғының төзімділігін бес есеге арттырады.
Виктор Юров, ҚарМУ ғылыми-зерттеу орталығының директоры:
— Біз материалдарды қаптау тәсілін тауып алдық. Бұл тәсіл Қазақстанда патенттелген. Жаңа технология балқыма қаптау ұнтақтары арқылы кез келген құрылғының төзімділігін арттыра алады. Жаңа технологияны қолданысқа енгізбес бұрын қарағандылық физиктер жарты жыл бойы тер төкті. Технологиялық даму ұлттық агенттігі бұл бағытқа 3,5 млн теңге грант бөлген болатын. Электрондық-сәулелі балқыма қаптамасы қымбат құрылғылардың қызу төзімділігін де ұзартады.
Сергей Гученко, Ғылыми-зерттеу орталығының кіші ғылыми қызметкері:
— Алдыменен біз қатты емес бөлшекті алып, оған балқыту ұнтағын жағамыз. Бұл ұнтақ бөлшектің құрамына балқу арқылы енеді. Бұл тәсіл қымбат құрылғы бөлшектерінің қызмет көрсету мерзімін ұлғайтып, қалпына келтіруге мүмкіндігін береді. Қазір ғалымдар жаппай өнім шығару үшін өндірістік қондырғы жасауды қолға алды. Ірі компаниялар бұл өнімді сатып алып, өз құрылығыларын өздері жөндеу мүмкіндігіне ие болады.