«2013 жылдан бері жас әкімдер саны 19 пайызға артты». Бұл туралы Орталық коммуникациялар қызметінде ҚР Білім және ғылыми вице-министрі Такир Балықбаев мәлім етті.
Оның сөзіне қарағанда, қазіргі уақытта Қазақстан xалқының 4,5 миллионы 14 пен 29 жас аралығындағы жастар болып табылады. Олардың 2,2 миллионы жұмыс істесе, 1,8 миллионы оқиды. Вице-министрдің айтуынша, жастар саясаты өзінің жемісін беруде, елде жастар арасындағы жұмыссыздық саны 5,5 пайыздан 4,5 пайызға дейін төмендеді. 2014 жылдың бірінші жартыжылдығындағы жағдаймен салыстырғанда жастар арасындағы қылмыс саны 10,7 пайызға азайды.
– Жастардың сайланатын билік органдарындағы үлесі де артуда. Елдегі 29 жасқа дейінгі жас әкімдердің саны 143-ке жетті. Бұл 2013 жылмен салыстырғанда 19 пайызға жоғары, – деп атап өтті вице-министр.
Такир Балықбаев атап көрсеткеніндей, Қазақстанда келесі жылы жастардың республикалық және аймақтық форумдары ұйымдастырылады. Олар жастар саясаты талқыланатын арнайы алаң болмақ.