Лондондағы Брунель университетінің спорт кешенінде кеше қазақ күресінен «Болашақ Барысы» турнирі өз мәресіне жетті. Қазақ хандығының 550 жылдығына орай өткізілген бұл сайысқа «Болашақ» бағдарламасымен білім алып жүрген студент жастар қатысты.
Турнирге Британия университеттерінде оқып жүрген 16 стипендиат қатысты. Жарыстың өзі болса әдеттегідей бірнеше салмақ дәрежесінде емес, тек 70 келіден жоғары, яғни абсолютты салмақ дәрежесінде ғана өтті.
Айта кету керек, Англия астанасында өткен осынау спорттық шараны «Халықаралық бағдарламалар орталығы» АҚ мен ҚР Қазақ күресі федерациясы ұйымдастырып отыр.
Ал, палуандарға қолдау көрсету үшін Лондонға Шеффилд, Рединг, Манчестер, Бирмингем, Уорик қалаларынан қазақ студенттері мен Британиядағы қазақ диаспора өкілдері келді.
«Болашақ Барысы» жарысы нәтижесі мынадай:
I орын — Айдар Қойшыбаев (80 келі), Edgware Academy Language School;
II орын — Асқар Шарапатов (84 келі), University of Sheffield Master;
III орын — Дәурен Дүбербаев (87 келі), London School of Economics and Political Science.