Қ.Қуанышбаев  атындағы  Мемлекеттік  академиялық қазақ музыкалық драма театрында қарашаның 4-5  күндері, сағат 18.30-да  «Қараш-қараш» атты  әлеуметтік драманың  премьерасы өтеді.

Қазақ  халқының  әр перзентін  елін-жерін  сүюге  тәрбиелейтін драма  Елорда сахнасында тұңғыш рет сахналанбақ.

Авторы –  жазушы, драматург Қалиқан  Ысқақ, қоюшы  режиссері – ҚР еңбек сіңірген қайраткері Әлімбек Оразбеков. Пьесаны қазақтың ұлы жазушысы Мұхтар Әуезовтің «Қараш-қараш оқиғасы» повесті бойынша Қалиқан Ысқақ сахналық нұсқасын жасаған. Бұл режиссер Әлімбек Оразбековтің  Әуезов  әлеміне төртінші рет қадам басуы. Бұған дейін «Абай», «Айман-Шолпан», «Қорғансыздың күні» пьесаларын дүниеге әкеліп, бүгінгі таңға дейін көрерменнің  сүйікті қойылымдарына айналған болатын. Елін-жұртын ойлап, күн кешкен екі азаматтың достығы, туған жерге деген үлкен махаббаты, ар алдындағы адалдығы көрініс табады. Жарасбай ойдың адамы,  Бақтығұл істің адамы. Осы екі ұғым бірін-бірі түсінуде сәл жаңсақтық  жіберсе,  «сатқындық» дейтін  жау  тұтқиылдан шабуыл жасайды. Бүгінге дейін күрделі тақырып «жер» мәселесі қойылымның күретамыры. Ата-бабадан қалған аруақты даланы сақтап қалу — әр қазақтың адами парызы.