Астанада «Columbia» студиясы түсірген «Бондиананың» кезекті «Спектр» фильмінің қазақ тіліндегі нұсқасы көрсетіле бастайды. Әлемдік деңгейдегі туындыны әдеттегідей «Болашақ» қауымдастығының түлектері ана тілімізге аударған.
«Болашақ» қауымдастығы бес жылдан бері Голливудтың кинолары мен анимациялық фильмдерін қазақ тіліне аударып келеді. Әйгілі агент Джеймс Бонд туралы 24-ші фильм де бүгіннен бастап отандық кинотеатрлардан қазақша көрсетілмек. Бұл 2011 жылдан бері ана тілімізде дубляждалған 12-ші, ал 2015 жылдың үшінші премьерасы.
«Соңғы кездері кино саласындағы аудармаға көп сын айтылуда. Сын жұмыс жүрген жерде айтылады, сондықтан оның болғаны жақсы. Қазіргі қазақ тіліне аударылған кинолардың сапасы әлдеқайда түзелген, халықаралық талаптарға сай деп айта аламын. Алдағы уақытта біз бұл қауымдастықтың жұмысына қолдау білдіріп, одан әрі де бірге жұмыс істесетін боламыз. Негізі осы жобаның арқасында біздің тіліміз әйгілі Columbia Pictures кинокомпаниясы әзірлеген фильмдерді дубляждауда 7-ші әлемдік тіл болып бекітілді. Ал, атақты Walt Disney студиясында жасалған фильмдерді дубляждауда 7 мың әлем тілдерінің ішінде 39-шы орында тұр. Бұл – үлкен жетістік», — дейді Б.Уәли.
Айта кетейік, тұңғыш рет қазақ тілінде дыбысталған фильмдердің қатарында «Көліктер-2», «Батыл жүрек», «Құбыжықтар университеті», «Галактика сақшылары», «Күлбике», «Кек алушылар: Альтрон дәуірі» және т.б. әлем мойындаған туындалар бар.