СҚО, Қызылжар ауданындағы алты бірдей кәсіпорынның жабылған күйі есігінен құлып алынар емес. Олардың болашағы не болмақ? Кәсіпорындардың жағдайы туралы жергілікті билік не дейді?  Jas.kz порталы аудандағы ахуалға үңіліп көрді.

Атап айтатын болсақ, Сивково селосындағы «Омаров» ЖК-нің диірмені, Прибрежный селосындағы 1,4 га жері бар мал ұстайтын нысан, Белое селосындағы техникалық қызмет көрсету станциясы, Соколовка ауылындағы бұрынғы нан зауытының ғимараты, Петерфельд ауылындағы бұрынғы шұжық кәсіпорыны мен Боголюбово ауылындағы «Леваш» дүкенінің есігі құлыптаулы.

Жұмыссыз тұрған кәсіпорындардың ендігі тағдыры не болатыны мүлде белгісіз. Себебі олардың барлығы да «Halyk Bank» АҚ, «БТА Банк» АҚ немес «БанкЦентрКредит» АҚ сияқты басқа да банктерде кепілде тұр. Олар өз кезегінде иеліктеріндегі нысандарының сату құнын белгілеп те тастаған. Мысалға 1611 кв.м ғимараты мен 1,4 га жері бар Прибрежныйдағы мал қорасын «БТА Банк» 10 миллионға бағалап отыр. Алайда болашағы бар іске ақша құюға ниетті инвесторлар банктердің бұл әрекеті ақылға қонымсыз, бағаны тым шарықтатып жіберген деп есептейді.

Б.Омаров, Қызылжар ауданы кәсіпкерлік бөлімінің басшысы:

— Жұмыс істемей тұрған барлық кәсіпорындар назарда тұр. Оларды қайта іске қосу мақсатында инвесторлар тартып көреміз. Болмаса ол жерлерде басқа өнім өндіру жолын да қарастырамыз. Ал иелеріне келетін болсақ, олар кәсіптерін әрі қарай алып жүруге мүлдем құлықсыз.