Осы жылы еліміздің Тұңғыш президенті туралы “Елбасы жолы” киноэпопеясының бесінші бөлімі жарыққа шығады. Кинокартина “Балалық шағымның аспаны”, “Отты өзен”, “Теміртау”, “Тығырықтан жол тапқан” фильмдерінің желісін толықтырады.
Бұл бөлімде актриса Бибігүл Ақтан Динара Назарбаеваның рөлін ойнайды. Ал Дариға Назарбаеваның болмысын белгілі актриса Қарлығаш Мұхамеджанова сомдайды.
“Елбасы жолы” киноэпопеясының барлық бөлімдерінің сценарийін танымал отандық драматургтер Шахимерден Құсайынов пен Рүстем Әбдірашев Нұрсұлтан Назарбаевтың кітаптары желісімен жазған. Сондай-ақ, фильмде елбасының әріптестері, достары айтқан естеліктер де қолданылады.
Елбасы рөлін бұл фильмде есімі елге таныс, талантты актер Берік Айтжанов сомдайды. Ол “Махамбет”, “Мұстафа Шоқай” фильмдері арқылы киносүйер қауымға жақсы таныс. Елбасының өмір жолын баяндайтын кинотуындының жалғасы Қазақстан, Ресей, Еуропа, АҚШ және шығыс елдерінің аумағында көрсетілетін болады. Кинокартинаның креативті продюсері — Фархат Әбдірайымов.