Жартығасырлық тарихы бар кәсіпорында 800-дей адам жұмыс істейді.
Бронды киім мен авиасалаға қажетті бөлшектер шығаратын зауыт 300 түрлі өнім шығарады.
Жаңа киім жинағы бұқаралық ақпарат құралдары өкілдерінің адамдар шоғырынан ерекшеленбеуін қамтамасыз етеді. 10 келі тартатын бронды күртешенің полиция қызметкерінің сақтық сауытынан бірнеше айырмашылығы бар. Қалқан киімде микрофон салатын қалталарға дейін қарастырылған. Кез келген мата түрін бұйымға айналдыратын Көкшетау тігін цехы қажетті қондырғыларын бірер жыл бұрын әкелген. Соңғы тапсырыс осы – журналистерге арналған 100 оқсауыт. Мамандар оның сапасына 7 жыл кепілдік беріп отыр.
Өткен жылы зауыт қуаттылығы 100 тонналық балқыту-құю цехын ашты. Енді кәсіпорын өрт сөндіру құралдарын, авиациялық бөлшектер және медициналық-геосинтетикалық бұйымдар шығаруда. Жаңа жобаға шамамен 1 миллиардтан астам қаржы құйылған.
Соңғы 5 жылда кәсіпорынның таза табысы еселеп өскен. Ағымдағы жылы зауыт 5 миллиард теңгенің өнімін өндірді. Алдағы жылы өндіріс ауқымы арта түспек.