Мемлекеттік қолдаудың арқасында Алматы облысында алма бақтарының аумағы 20 мың гектарға жетті.
Оның 1973 гектарында «апорт» алмасы өсірілмек. Бұл туралы Талдықорған қаласының І.Жансүгіров атындағы Мәдениет үйінде өткен Алматы облысының әкімі Амандық Баталовтың облыс халқымен өткізген есептік кездесуі барысында белгі болды.
Кездесу барысында ағымдағы жылы 1350 гектар алқапта ірі бақтар пайда болатындығы жайында айтылды. Атап айтар болсақ, Панфилов ауданындағы 1000 гектарды алып жатқан «Жаркент Фрукт» ЖШС, Еңбекшіқазақ ауданындағы 200 гектарды алып жатқан «Алма Грин Филд» ЖШС және Ұйғыр ауданында 150 гектарға бақ өсіруді қолға алған «Алма Продэкс» ЖШС.
Осы алқаптардың 681 гектар жер аумағы тамшылап суғарудың соңғы үлгідегі заманауи технологияларын пайдалану арқылы алма бақтарын өсіруге арналатын болады. Бұл өз есесінен алдағы 3 жылда қосымша жыл сайын 34 мың тоннадан астам өнім жинауға мүмкіндік беретін болады.