Jas.kz

Кеше Астанада Алматы облысының күндері басталды. «Қуатты аймақ – қуатты Қазақстан» тақырыбымен өтетін мәдени-әлеуметтік шара барысында бірқатар игі істер атқарылу көзделген. Осы мәселеге орай Қазақстан Республикасы Ақпарат және коммуникациялар министрлігі жанындағы Орталық коммуникациялар қызметінде Алматы облысы әкімінің орынбасары Бахтияр Өнербаевтың қатысуымен баспасөз брифингі өтті.

Брифингте Қазақстан Тәуелсіздігінің 25 жылдығына орай өтіп жатқан облыс күндерінің аясында Жетісу жерінің жетістіктері жайлы сөз болды.

Брифингте облыс әкімінің орынбасары Алматы облысының әлеуметтік – экономикалық дамуы мен өңірдің тәуелсіздік жылдарындағы қол жеткізген жетістіктеріне тоқталды.

Журналистер алдында сөйлеген сөзінде облыс әкімнің орынбасары Б. Өнербаев Елбасының тапсырмасына сәйкес Алматы облысында аграрлық кешенді дамытуға үлкен көңіл бөлініп жатқандығын да тілге тиек етті.

Өздеріңіз жақсы білетіндей, біздің облыс аграрлы өңір болып санала ұзақ жылдар бойы еліміздегі қызылша өсіретін өңір мәртебесін иеленіп келді.

Былтыр 4020 гектарға тәтті түбір отырғызылса, биыл 6500 гектарға орналастырылды. Сондай-ақ, бірнеше жыл тұрып қалған Көксу қант зауыты былтыр инвесторлардың арқасында қайта іске қосылды. Биыл бұл кәсіпорында жаңғырту жұмыстары орындалды. Ал Ақсу қант зауытын қайта қалпына келтіру жұмыстары басталды. Биылғы жылы өңірдің қант қызылшасын өсірумен айналысатын шаруалары мол өнім алуды жоспарлауда. Атап айтар болсақ, өткен жылы орташа өнімділік гектарынан 300 центнерді құраса, ағымдағы жылы диқандар әр гектарынан 350 центнер өнім алуды көздеуде. Осылайша, Алматы облысы болашақта еліміз тұрғындарын өзіміздің қантпен қамтамасыз ету және біртіндеп экспортқа шығару мақсатында қолда бар мүмкіндікті белсенділікпен пайдалануда. Үстіміздегі жылдың 7 айында ауылшаруашылығы саласы жалпы өнімінің көлемі 176,4 млрд. теңгеге жетіп, нақты көлемнің индексі 102,7%-ды құрады, — деді облыс әкімінің орынбасары Бахтияр Әлтайұлы.

Алматы облысы әкімінің орынбасары өз сөзінде өңірге инвестиция тарту, туризмді дамыту, сондай-ақ мектепке дейінгі білім берумен қамтамасыз етуге үлкен көңіл бөлу, тұрғын үй және өзге де әлеуметтік нысандардың құрылысын белсенді жүргізу жұмыстары облыс басшылығының басты назарында екендігін жеткізді.

Брифинг барысында Бахтияр Өнербаев мемлекеттік қолдаудың арқасында облыс орталығы Талдықорған қаласын дамытуға үлкен көңіл бөлініп отырғандығын, оны соңғы кездегі қаладағы құрылыс жұмыстарының қарқынды жүргізіліп жатқандығымен түсіндіруге болатындығын түсіндірді.

Кеше Астанада Тәуелсіздіктің 25 жылдығына арналған Алматы облысының Астанадағы «Қуатты аймақ — қуатты Қазақстан» атты күндері аясында бірнеше ауқымды шаралар болып өтті. Ұлттық кітапханада «Жерұйық мекен – Жетісу» атты жетісулық ақын-жазушылар кітаптарының көрмесі ұйымдастырылды. Көрмеге келушілер киелі Жетісу жерінің ақын-жазушыларының қаламынан туған шығармаларымен кеңінен танысуға мүмкіндік алды.

Сондай-ақ осы күні Ұлттық мұражайда да көрме ұйымдастырылды. Көрмеге Алматы облысы мұражайларындағы экспонаттар, жыр алыбы Жамбыл Жабаевтың қолданған жеке заттары, көне ыдыстар, тұрмыстық және зергерлік әшекей бұйымдар, өзге де көптеген экпонаттар қойылды. Сонымен қатар көрмеге жетісулық қылқалам шеберлерінің портер, пейзаж және тарихи тақырыптағы шығармалары да қойылды. Бүгінгі күнге жоспарланған шаралар соңы «Жастар» театрының сахнасында Алматы облысының Б. Римова атындағы драма театры әртістерінің орындауындағы «Керей — Жәнібек» атты спектаклін қоюмен өз мәресіне жетті.

Осылайша Алматы облысының делегациясы облыс күндері шеңберінде әзірлеген бағдарламасының бірінші күні Елордалық тұрғындар мен қала қонақтарының көңілінен шығып, ыстық қошеметіне бөленіп үлгерді.

Ертеңгі күні де астаналықтарды таңның атысынан кештің батысына дейін қызықты шараларға толы күн күтуде…

Қазақстан Республикасының Тәуелсіздігінің 25 жылдығына арналған Астана қаласында «Қуатты өнір — қуатты Қазақстан» атты Алматы облысы  күндеріне жоспарланған бағдарлама аясында Астана қаласы Оқушылар сарайы  ғимаратының жанында Алматы облысы ауылшаруашылық тауар өндірушілерінің қатысуымен облыстық ауыл шаруашылығы жәрмеңкесі  өтті. Оған Астана қаласының әкімі Әсет Исекешев пен Алматы облысының әкімі Амандық Баталов қатысты.

Жәрмеңкеге облыстың 16 ауданы, 3 қаласы және «Жетісу» ӘКК» ҰК» АҚ-ы  қатысты.

Астана тұрғындары мен қала қонақтарына жалпы көлемі 340 тонна ауыл шаруашылығы өнімдерінің 38-ден астам түрі ұсынылды. Алматы облысынан жеткізілген тауарлардың жалпы құны 160 млн. теңгені құрады.

Оның ішінде: жылқы еті — 1,8 тонна, құс еті — 7,0 тонна, балық өнімдері — 11,8 тонна, көкөніс — 100,2 тонна, алма, жеміс-жидек — 30,5 тонна, картоп — 47,0 тонна, сүт өнімдері — 13,8 тонна, шұбат пен қымыз — 2,9 тонна, күріш —16,5 тонна, ұн — 5,8 тонна, қант –6,0 тонна, бал — 3,9 тонна, жұмыртқа — 16,0 мың дана, бакалея өнімдері — 2,4тонна және басқа өнім түрлері 106,9 тонна.

Тұтынушылар жетісулық өнімдер бағасының қаладағы бөлшек сауда бағасынан 15-20 пайызға төмен және өнімдердің сапалы екендігі жайында ойларымен бөлісіп жатты.

Алматы облысының Астанадағы «Қуатты өңір – қуатты Қазақстан» атты күндерінің аясында Конгресс-холл ғимаратында өткен Алматы облысының тауарөндірушілерінің көрмесіне Алматы облысының әкімі Амандық Баталов пен Астана қаласының әкімі Әсет Исекешев қатысты.

Көрмеге өңірдің ірі кәсіпорындары өз өнімдерін шығарды. Оның ішінде «Голд продукт» АҚ, «Жаркент крахмал – сірне зауыты» ЖШС, «Талдықорған кабель зауыты» ЖШС, «Тиккурила» ЖШС және өзге де кәсіпорындардың өнімдері бар. Көрмеге қатысушылар қызығушылық танытқан көрме қонақтарына өз өнімдерін таныстырып, олардың ерекшеліктері, сапасы және жалпы кәсіпорын жұмысына қатысты ақпараттарымен бөлісті. Көрмеге қатысқан барлық кәсіпорындарға естелік сыйлықтар мен дипломдар табысталды.

Конгресс-холлдың кіре берісінде қонақтар назарына облыс орталығының даму тарихынан сыр шертетін «Талдықорған – кеше, бүгін, ертең» тақырыбында фотошежіре ұсынылды.

Осы күні Алматы облысының туризм саласындағы әлеуеті, өңірдің этномәдение орталықтар мен спорт саласындағы қол жеткізген жетістіктер де назардан тыс қалмады.

Көрменің жалғасы облыстың өнер ұжымдарының әзірлеген «Жетісу – жұмақ мекенім» атты әсерлі гала-концертіне ұласты.

Алматы облысының Астанадағы күндері аясында жыр алыбы Жамбыл Жабаевтың ескерткішіне гүл шоқтары қойылып, ақын рухына тағзым етілді.

Гүл қою рәсімінде облыс әкімінің орынбасары Бахтияр Өнербаев құттықтау сөз сөйлеп, Жетісу өренінің қазақ әдебиеті мен өнеріне сіңірген ерекше еңбегін атап өтті.

Шараға ардагерлер, мәдениет және өнер қайраткерлері, сондай-ақ журналистер қатысты.