Jas.kz

14 қараша күні Астана қаласы Жастар сарайында Республикалық Премьер лига сайыстарының шешуші финалдық бәсекесі өтті. Премьер лига топтары тегершігі кең тарихқа арналған маусымды аяқтады. Маусым бойы қазылардың көңілінен шығып,  жоғары бағаға ие болған 6 үздік топ сайысқа түсті. Олар:

1.«Қатынас жолдары университетінің құрамасы» —  Қазақ  қатынас жолдары университеті, Алматы қаласы

2.«Достар» — Қазақ инновациялық гуманитарлық-заң университеті, Семей «

3.«Тұран — Астана»  — «Тұран – Астана» университеті, Астана қаласы.

4.Боранқұл» — Маңғыстау облысы, Бейнеу ауданы, Боранқұл ауылы.

5.«Фемида» —  Құдайберген Жұбанов атындағы Ақтөбе өңірлік Мемлекеттік университеті, Ақтөбе қаласы

6.«Байдың балалары»  — Мұхтар Әуезов атындағы Оңтүстік Қазақстан Мемлекеттік университеті, Шымкент қаласы.

Ал ойынға баға берген қазылар алқасының құрамында — ардагер жайдарманшы Нұрмахан Мұқанұлы, ҚР Президенті жанындағы Жастар Кеңесінің мүшесі — Жарқын Түсіпбекұлы, ардагер жайдарманшы — Алдан Жылгелді,  тележүргізуші — Жасын Қанбаев және ҚР Білім және ғылым министрлігі Жастар саясаты департаменті директорының орынбасары — Ернат Мұхамадиұлы болды.

Республикалық деңгейде өнер көрсетіп, халықтың көзайымына айналып үлгерген үздік финалистер 3 кезең бойынша – сәлемдесу, жамбы ату, үй тапсырмасы бойынша сайысқа түсті. Қатысушы командалар үш кезең барысында өздерінің жан-жақтылығын көрсетті. «Сәлемдесу» кезеңінің тақырыбы — «Тарихтан табамын өзімді». Барлық командалар осы тақырып аясында әзілдер айтып, нағыз финалдық деңгейде ойын көрсетті. Екінші кезең – «Жамбы ату». Бұл кезеңде қазылар алқасы өзара ақылдаса отырып, әзілдері ұнамаған команданың реттік санын көрсетеді. Қазылар алқасының ортақ шешімімен  «Жамбы ату» сайысында «Қатынас жолдары университетінің құрамасы» жеңіске жетті. «Үй тапсырмасы» кезеңі бойынша әр команда «Тарих маусымының» финалдық сайысында тарихқа негізделген көрініс ойнатылды, әрине әзіл айтып көрерменді күлкіге кенелту қажет. Үш сайыстың қорытындысы бойынша үздіктер анықталды. Маусымның жеңімпазын анықтау оңай емес. Себебі финалдық бәсекеге тек қана «жүзден жүйрік, мыңнан тұлпар» командалар жолдама алған.

Жалпы, ойын жиналған көрерменнің қол қағысына қарағанда өте жоғары деңгейде өтті. Әрбір көрерменнің өз сүйікті командасы, өзінің «фавориті» болды. Десе де, «Тарих маусымының» шешуші финалдық бәсекесінде тек қана үздіктер ған жеңуге лайықты.

Сонымен, ойын қорытындысы төмендегідей:

«Үздік ойыншы» номинациясы «Фемида жайдарман тобының ойыншысы Есет Мырзагазиевке табысталды. Естеріңізде болса, Есет «Астана қаласы әкімінің кубогы – 2015» арнайы жобасында да ең үздік ойыншы атанған болатын.

ІІІ орын – «Тұран Астана» жайдарман тобы – 200 000 теңге

ІІ орын – «Қатынас жолдары университетінің құрамасы» және «Байдың балалары» (екі команда бірдей ұпай жинағандықтан, екі командаға бірдей орын табысталып,  әрқайсысына 300 000 мың теңге көлемінде сыйақы табысталды).

«Чемпион – 2015» — «Фемида жайдарман тобы – 400 000 теңге

Кеше Қазақстан Республикасы Мәдениет және спорт министрлігінің ұйымдастыруымен ҚР Ұлттық музейінің концерт залында көрнекті жазушы Ілияс Есенберлиннің 100 жылдық мерейтойына арналған салтанатты іс-шара өтті.

Ілияс Есенберлин – қазақ әдебиетінің өркендеуіне елеулі үлес қосқан, қазақтың көрнекті жазушысы. Қазақ әдебиетінде алғашқы болып тарихи зерде тамырына қан жүгіртіп, «Көшпенділер», «Алтын Орда» трилогияларымен ұлт рухын тірілткен қаламгер. Жазушының қаламынан туған «Ғашықтар», «Қатерлі өткел», «Маңғыстау майданы», «Алтын аттар оянады», «Көлеңкеңмен қорғай жүр», «Алыстағы арпалыс», «Аққу құстар қуанышы», «Махаббат мейрамы» романдары, өз заманының өзекті тақырыбындағы «Алтын құс», «Айқас» кітаптары тың тақырыпта жазылып, қазақ әдебиетіне серпін әкелген, оқырман сүйіспеншілігіне бөленген туындылар болып табылады.

Аталған шара барысында ғылыми-практикалық конференция, кітаптар мен әдебиет көрмесі және салтанатты концерт ұйымдастырылды. Ғылыми-практикалық конференцияға І.Есенберлиннің мұрасын зерттеуші тарихшылар, Қазақстанның беделді білім ордаларының ғалымдары мен профессорлары атсалысты. Іс-шараның қадірлі қонақтары Мемлекет тарихы институтының директоры, тарих ғылымдарының докторы, профессор Бүркітбай Аяған, жазушы, «Отырар кітапханасы» ғылыми-зерттеу орталығының директоры, филология ғылымдарының докторы Тұрсын Жұртбай, Мемлекет тарихы институты директорының орынбасары, тарих ғылымдарының кандидаты Амангелді Қашқымбев, атақты жазушының ұлы, техника ғылымдарының кандидаты Қозыкөрпеш Есенберлин, және басқалар Ілияс Есенберлиннің шығармашылығы, еңбектерінің қоғамдық жағдайға әсері мен Қазақстан тарихында алатын ерекше орны туралы ойларымен бөлісті.

Қозыкөрпеш Есенберлин әкесінің 100-жылдығын ұйымдастыруға атсалысқандардың барлығына ризашылығын білдіріп, «Ильяс Есенберлин әрдайым ғылыми ізденісте болды және бізді де сол ғылымға тартты. Сондықтан жастарды білуге, оқуға шақырамын, өйткені тек шынайы білім ғана адамды ең биік белестерге жетелейді», — деп сөз соңында жастарға ақылын айтты.

— Қазақ әдебиетінде Есенберлинге дейін де ұлы ақын, жазушылар болды, алайда тарихи романды және сол романның жүйесін қазақ әдебиетіне Есенберлин енгізді, — деп пікірімен бөлісті Тұрсын Жұртбай. – Оның танымал трилогиясының әр шығармасының көркемдік түйіні бар.

Конференция аяқталған соң, елімізге танымал сахна шеберлерінің қатысуымен салтанатты концерт өтті.

Қазақстан Республикасының Мәдениет және спорт министрлігінде  режиссер, Қазақстанның еңбек сіңірген қайраткері  70-ке толған өнер иесі Ерсайын Қандержанұлы Тәпеновке Министрдің  атынан Құрмет грамотасы, «Қазақ хандығының  550 жылдығы» медалі мен арнайы  сертификаты табыс етілді.

Е. Тәпенов 1968 жылы Мәскеу қаласындағы Мемлекеттік театр өнері институтының (қазіргі Ресейдің театр өнері академиясы) режиссерлік факультетін бітірген. 1974—1976 жылы Мәскеудің Сатира театрында тәжірибеден (В. Н. Плучектің жетекшілігімен) өтті. 1968—1974 жылы Семей облысы драма театрының (қазіргі Семей музыкалық драма театры) режиссері, 1976—1979 жылы бұрынғы Торғай облысы музыкалық драма театрының, 1979—1990 жылы Қарағанды облысы қазақ  драма театрының, ал 1990 жылдан Павлодар облысы музыкалық драма театрының бас режиссері болды.

Мұхтар Әуезовтің «Айман-Шолпан», «Дос-Бедел дос», Ғабит Мүсіреповтің «Ақан сері-Ақтоқты», «Қозы Көрпеш—Баян сұлу» («Махаббат туралы поэма» деген атпен), Е. Г. Брусиловский мен Мүсіреповтің «Қыз Жібек», Бейімбет Майлиннің «Шұға», Қалтай Мұхамеджановтың «Бөлтірік бөрік астында», Тахауи Ахтановтың «Махаббат мұңы» мен «Күшік күйеу», Әкім Таразидің «Жақсы кісі», Дулат Исабековтың «Әпке», Олжас Сүлейменов пен Баққожа Мұқайдың «Заманақыр», Мұхтар Шахановтың «Отырар дастаны», Маман Байсеркеұлының «Кене хан», Н. В. Гогольдің «Yйлену», Антон Павлович Чеховтың «Шағала», Еврипидтің «Медея», Уильям Шекспирдің «Асауға тұсау», «Король Лир», т.б. авторлардың шығармаларын сахнаға шығарды.

Министрлік басшылыға режиссердің  елеулі еңбегін атап өткен жауапты хатшы министрлік жанынан  құрылған көркемдік кеңесте де Е. Тәпенов жемісті еңбек атқарады деп сенім білдірді.