Jas.kz

Талдықорғанда І. Жансүгіров атындағы Мәдениет сарайында «Нұр Отан» партиясының хатшысы З. Тұрысбековтің қатысуымен Алматы облыстық партия филиалының XIX есеп беру-сайлау конференциясы өтті. Жиын барысында Мәдениет сарайы фойесіне аймақтық партия ұйымдарының жұмысына арналған көрме қойылды.

Конференцияда облыс әкімі, облыстық партия филиалының төрағасы Амандық Баталов партия филиалы Саяси кеңесінің 2015-2016 жылдардағы атқарған жұмысы туралы есеп берді.

А. Баталов партия Елбасы Жолдауында айтылған стратегиялық міндеттердің орындалуына ерекше назар аударатынын атап өтті. Мәселен, Алматы облысында есепті кезеңде 513,9 млрд. теңгеге өнеркәсіп өнімдері өндірілген. 48 жаңа өнеркәсіп орны іске қосылып, 26 кәсіпорын кеңейтілген. Сонымен ауыл шаруашылығы, білім беру, денсаулық сақтау, жұмыспен қамту бағыттарында да атқарылған ауқымды жұмыстар аталып өтілді.

Облыстық мәслихат хатшысы, партия филиалы жанындағы Сыбайлас жемқорлыққа қарсы іс-қимыл жөніндегі қоғамдық кеңестің төрағасы С.Мұқанов, партияның Іле аудандық филиалы төрағасының орынбасары Е. Тұрымбетов, Рио Олимпиадасының қола жүлдегері К. Горичева, Түрген ауылдық округінің әкімі Б. Елеусізова және басқа да азаматтар баяндаманы талқылауға қатысып, сөз соңында партия Саяси кеңесінің жұмысына қанағаттанарлық деп баға берді. Конференцияға қатысушылар жарыссөзге шыққандардың бұл бағасын бірауыздан қолдап, көпшіліктің дауысқа салуымен конфенерцияның қаулысы қабылданды.

Күн тәртібіндегі екінші мәселе бойынша бақылау-тексеру комиссиясының атқарған жұмысы туралы В. Сапожниковтың есебі тыңдалды.

Конференция соңында Саяси кеңестің, бақылау-тексеру комиссиясының жаңа құрамы сайланды.

Алматы облыстық білім басқармасының басшысы Л. Базарқұлованың айтуынша, өрттен Бағанашыл балалар үйінің тәрбиеленушілері мен қызметкерлері зардап шеккен жоқ. Олардың барлығы да ғимараттың екінші блогына орналастырылып, барлық қажеттіліктермен қамтамасыз етілді.

Еске салсақ, Алматы қаласындағы Бағанашыл шағын ауданындағы балалар үйінен бүгін түнде өрт шыққан болатын.

—  Өрт болған кезде ғимаратта осында тәрбиеленетін 161 баланың 154-і болған. Себебі 161 баланың 3-еуі Есіктегі көзі нашар көретіндерге арналған мектеп-интернатта, 4-еуі «Бөбек» орталығында демалысқа жіберілген. 154 баланың 4-еуі ауруханаға жеткізілді. Олардың 3-еуі емдеу мекемесіне жеңіл жарақаттармен, 1-еуі сынықпен түскен. Олардың жағдайы қазір бірқалыпты, денсаулықтарына қатысты қауіп жоқ. Оқиға орнына «Дәулет Серпін» ЖШС өкілдері келіп, құрылыс жұмыстары басталды. Сонымен қатар қалпына келтіру және құрылыс жұмыстарына облыстың басқа да оқу орындарының мамандары тартылуда. Ас әзірлеу блогы стандартты режимде жұмыс істеп тұр, — деп атап өтті Л. Базарқұлова.

Жағдайды Алматы облысының әкімі тұрақты бақылауына алды.

«Бүгін Алматы облысының әкімі Амандық Баталов жағдайды ерекше  қадағалауға алып, қысқа мерзім ішінде ғимараттың жөндеу жұмыстарын сапалы жүргізу үшін Төтенше жағдайлар қорынан қаржы қарастыруды тапсырды. Балалар үйіне барлық қажетті көмек пен қолдау шаралары көрсетілуде», — деп қорытындылады сөзін Л. Базарқұлова.

21 қарашада Астанада «Астана ЭКСПО-2017» ҰК» АҚ Басқармасының Төрағасы Ахметжан Есімовтің Чехияның өңірлік даму министрі Карла Шлехтовамен кездесуі өтті.

Кездесуде тараптар Чехия Республикасының ЭКСПО-2017 Халықаралық мамандандырылған көрмесіне қатысуын талқылады.

Кездесу барысында А.Есімов Чехия делегациясын «ЭКСПО-2017» халықаралық көрмесіне дайындықтың қорытынды кезеңі туралы хабардар етті.

«Біздің Көрмеде Чехия елі өзінің баламалы энергия көздерін пайдалану саласындағы мықты дүниелерін көрсететіндігіне  қуаныштымыз. Бұл біздің елдер арасындағы достық қатынастарды нығайтатындығына және екі ел үшін туристік мүмкіндіктерді кеңейтетіндігіне сенемін», — деді Ахметжан Есімов.

«Көрме арқылы Қазақстан әлемдегі аса маңызды мәселелердің бірін – баламалы энергия көздерін пайдалану мәселесін көтеріп отыр. Біз өзіміздің осы бағыттағы ең жаңа технологияларымызбен таныстырамыз. Біздің министрлік осы мәселемен айналысуда. Көрмеге мейлінше дайындалып жатырмыз. 2017 жылы Көрме аумағында Чехия Республикасының Ұлттық күнін өткізетін боламыз», — деп атап көрсетті министр.

Чехияның Өнеркәсіп және сауда министрлігінің деректері бойынша, Чехиядағы жаңартылатын энергия көздерінің даму үлесі 13% құрайды. Чехия Республикасына ауданы 292,5 шаршы метр жеке павильон бөлінді.

Бүгінгі күнге Астанадағы ЭКСПО-2017 көрмесіне қатынасатындықтарын 106 ел растады, 101 ел өз комиссарларын тағайындады, 90 ел көрмеге қатысу шартына қол қойды.

Талдықорғанда «Жұлдызды 25 күн» акциясы аясында кең көлемде флешмоб ұйымдастырылды, хабарлайды ҚазАқпарат.

«Жастар» спорт сарайында өткен шараға 1 мыңға жуық жастар қатысты. Қатарында жоғары оқу орындарының студенттері мен Тәуелсіздік құрдастары бар. Олар түрлі-түсті қолшатырмен сап түзеп, 25 KZ және жүрек бейнелерін көрсетті.

Флешмобты облыстық жастар ресурстық орталығы мен «Жас Отан» белсенділері ұйымдастырды. Тәуелсіздіктің 25 жылдығына орай өткен шара  мақсаты — өскелең ұрпақ бойында еліне, Отанына деген сүйіспеншілікті қалыптастыру.