Jas.kz

Созақ ауданы Жуантөбе ауыл округінде 50 орындық «Алуа»  балабақшасы ашылып, ел игілігіне берілді, деп хабарлайды ОҚО әкімінің баспасөз қызметі. Бұл осы жылы пайдалануға берілген 7-ші бөбекжай. Осылайша «Балапан» бағдарламасы аясында ашылған балабақшаларда 660 бала балабақшамен қамтылып отыр. Нәтижесінде ауданда бағдарламаның орындалуы 84,5 пайызды құрады.

Ауыл тұрғындарының қуанышымен бөлісе келген аудан әкімі М.Исеав балалар тәрбиесі әрқашан басты назарда екеніне тоқталып, бүгінгі ұрпақ — еліміздің ертеңі екенін айтты. Сондай-ақ, ол аталған нысан кәсіпкердің жеке иелігінде болса да, мемлекеттік тапсырыс бойынша  жұмыс істейтінін жеткізді.

Елу бала тәрбиелетін мектепке дейінгі білім беру ұйымында жергілікті 10 адам жұмыспен қамтылып отыр. Соңғы үлгідегі жабдықтармен қамтылған балабақшада, екі жатын бөлме, асхана, демалыс бөлмесі, медбике  бөлмесі бар.

Айта кетейік, Созақта жыл соңына дейін «Балапан» бағдарламасы аясында тағы 5 балабақша ел игілігіне беріледі деп жоспарлануда.

Ордабасы ауданы экономикасының дамуындағы шағын және орта бизнестің үлесі 35 % құрайды, деп хабарлайды ОҚО әкімінің баспасөз қызметі. Өндірілген өнеркәсіп өнімінің көлемі 12 млрд. 555 млн. 200 мың теңгеге жетіп, нақты көлем индексі 109,5 пайызға тұрақтады. Осылайша облыс көлемінде аудан, қала арасында Ордабасы ауданы көш бастап тұр. Бұл туралы аудан әкімі Алмасбек Мамытбеков кәсіпкерлермен кездесуде айтты. Осы саладағы жұмыстарды одан әрі дамыту мақсатында өткен жиында кәсіпкерлікте кездесетін түйткілді мәселелер жайы қаралды.

Өнеркәсіп саласында жүйе құраушы локомативті жобалар олар «Ордабасы-нан» ЖШС, «Ордабасы құс», «Инфрастрой ЛТД», «Батсу водоканал», «Агро-V», «Сейтбек әулеті», «Шұбар асыл тұқым кешені», «Оңтүстік қыш» және «Строй-юг групп» ЖШС-рі болып келеді.

«Бизнестің жол картасы-2020» мемлекеттік бағдарламасы аясында осы жылдың 9 айында жалпы құны 7 млрд. 562 млн. теңгені құрайтын 8 жоба мақұлданды. Оның ішінде субсидиялау желісі бойынша жалпы құны 879 млн. теңгеге 3 жоба («Батсу Водоканал» ЖШС, ЖК «Жәнібек Сембек», ЖК «Сейтхан Серікқожа»), инфрақұрылымды дамыту желісі бойынша жалпы құны 6 680 млн. теңгеге 4 жоба («Аква Терм» ЖШС, «MEB Co» ЖШС,«KAZMERBLOCK» «Мерблок» ЖШС, «ФебСтрой» ЖШС), гранттық қаржыландыру бойынша 3 млн.теңге болатын 1 жоба мақұлданған.

Жиын барысында атқарылған жұмыстармен қатар, кәсіпкерлікті оңтайландыру бойынша жоспарлар мен ұсыныс-тілектер айтылды.

Бүгін Оңтүстік Қазақстан облысының әкімі Жансейіт Түймебаев кореялық «J&I Company Ltd» компаниясының төрағасы Чангсик Чонмен кездесті, деп хабарлайды ОҚО әкімінің баспасөз қызметі. Басқосуда тараптар Шымкент қаласын көгалдандыру жайын әңгімелеп, бірқатар жобалар бойынша пікір алмасты.

Атап айтқанда, корейлік кәсіпкер аймақ басшысына Өзбекстандағы декоративті ағаштар өсірумен айналысатын тұқымбағын таныстырып, ондағы жасыл желектерді баптаудың ерекшеліктерін баяндады. Шымкент қаласының климаттық жағдайын ескерген Жансейіт Қансейітұлы көшеттерді, алдымен, сынақ ретінде біздің аймақта өсіріп көру керектігін айтты.

Сонымен қатар, Оңтүстік Қазақстанға сапары барысында корейлік бизнесмен Шымкент қаласында гольф клубын, жастар саябағын, декоративті ағаштарға арналған тұқымбақ құру және ескек есу спорты бойынша спорт кешенін салуды ұсынды.

Өз кезегінде, облыс әкімі аталған ұсыныстарды қарастыратынын жеткізіп, компанияның Өзбекстандағы тұқымбағының жасыл желектерін зерттеуге Оңтүстіктен арнайы делегаттарды жіберетінін айтты.

Еске салайық, таяуда облыс әкімі Шымкент қаласын көгалдандыру бойынша қала әкімдігіне сын-ескертпелер айтып, осы бағыттағы жұмыстарды жандандыру мақсатында бірқатар тапсырмалар берген болатын. Еліміздің үшінші мегаполисі саналатын Шымкенттің көгалдандыру жұмыстарына ерекше мән берген әкім бұл мәселені жеке бақылауына алып отыр.

Айта кету керек, кореялық «J&I Company Ltd» компаниясы нарықта 10 жылдан бері көгалдандыру саласында қызмет етіп келе жатқан серіктестік. Оңтүстік Корея мен Өзбекстанда сәтті жобаларын бастаған компания Қазақстанда да өз бизнесін дамытуы жоспарлап отыр.