Jas.kz

Қазақ гуманитарлық заң университетінде ЭКСПО-2017 көрмесін жоғары деңгейде өткізу үшін елордада туристік саланы дамыту және ағылшын тілін жетілдіру мәселелері талқыланды, деп жазады қалалық әкімдіктің баспасөз қызметі.

«ЭКСПО-2017 арналған туризм және ағылшын тілі» тақырыбындағы форум көрмеге қатысушылар мен мүдделі тұлғалар арасындағы ынтымақтастыққа арналған алаңға айналды.

Шара барысында жиналғандар халықаралық көрме барысында ағылшын тілін қолдану дағдылары мен жекелеген әдістемелерін үйренді.

Қазақстан Республикасының Инвестициялар және даму министрлігінің туризм индустриясы департаментінің директоры Марат Игалиев студенттерді шет тілін меңгеруге шақырды.

— Туристік білім беретін ЖОО-лар көп. Олардың теориялық білімдері жақсы, басты мәселе – мамандардың ағылшын тілін білмейтіндігінде. Заманымыздың қойған талабымен бүгінде бәсекеге қабілетті болу үшін бірнеше тіл білу керек. Мысалы, ағылшын тілімен қатар қытай тілін де меңгерген абзал — дейді Марат Игалиев.

Оның айтуынша, ЭКСПО-2017 өзін-өзі танытуға лайықты алаң бомлақ. Департамент басшысы жастарға еріктілер қозғалысына қатысуды ұсынды.

«Астана ЭКСПО-2017» Ұлттық компаниясы» дамыту және туризм департаментінің менеджері Сәуле Бөлебаева халықаралық көрмеге толығырақ тоқталды.

—  Көрмеге 5 млн астам адам келеді деп күтілуде. Қаншама адамды қарсы алуымыз керек, оларға қызмет көрсетіп, еліміздің беделін түсірмеуіміз қажет. Қазіргі кезде 104 мемлекет, 17 халықаралық ұйым көрмеге қатысатындарын растады. Кейбір мемлекеттерде визалар алынып тасталды, қонақтарымыз елге еш қиындықсыз кіре алады. Әрине, бұл аса өзекті тақырып, біздің жасап жатқанымыздың барлығы болашақ энергиясын үнемдеуге байланысты, — деді Сәуле Бөлебаева.

Айта кетейік, бүгінде халықаралық көрмеге қатысатын мемлекеттерде белсенді дайындық жұмыстары жүргізілуде.

— Қазіргі кезде тұжырымдама әзірленіп жатыр, француз павильоны ең үлкен павильондардың бірі болады. Біз болашақ энергиясына қатыстының бәрін көрсетеміз – ескі энергиядан жаңасына өту – бұл күн, жел, су. Күн сайын мәдени және ғылыми шаралар өткізіледі,- деді Францияның Қазақстандағы елшілігінің өкілі Томас Хойт.

Сонымен қатар, литвалық павильон да үлкен болады. Литва Республикасының Қазақстандағы Елшілігінің өкілі Адомас Давалга Литвада әлемдегі ғылыми лазердің көп бөлігі шығарылатындықтан лазер тақырыбын таңдағандарын жеткізді.

Шара соңында туристік, аударма агенттіктерінің, сондай-ақ еріктілер ұйымдарының қатысуымен бос орындар жәрмеңкесі өткізілді.

Жыл сайын күн суығанда тыныс алу жолдарының вирусты инфекцияларына шалдыққан адамдар саны артады, деп хабарлайды қалалық әкімдіктің баспасөз қызметі.  Тұмаудан қорғанудың ең тиімді жолы екпе жасату болып табылады. Иммундау үшін ең қолайлы кезең — қазан-қараша айлары.

Астана қаласының денсаулық сақтау басқармасының хабарлауынша, қазіргі заманғы вакциналар аса тиімді, қауіпсіз және алты айдан асқан балалар мен ересектер арасында тұмаудың алдын алуға бағытталған. Иммунитетті күшейтуге 2 күннен 7-15 күнге дейін уақыт қажет және ол 6 айдан 12 айға дейін сақталады.

Вакциналау тұмауға жатпайтын басқа вирустық инфекцияға қарсы қорғауды қамтамасыз етпейді, бірақ вакцинация аурудың өте жеңіл түрде өтуіне сеп болады және оның асқынуына жол бермейді.

Тұмауға қарсы вакциналау екпенің Ұлттық күнтізбесіне жатпайды, оны ақылы екпе жасау пунктерінде салғызуға болады. Атап айтқанда, № 1, 2, 3, 4, 5, 6, 7, 8, 9 және 10 қалалық емханаларда, сондай-ақ «Интертич» ОДА (Кенесары, 1), «Медлайн» МО (Күмісбеков к-сі, 8), «Медикер» МО (Қабанбай батыр даңғ., 17), «Ореn Clinik» МО (Отырар к-сі, 8/2), «Фармаком» ҚФК ЖШС (Майлин к-сі, 15), «Интертич Астана Медициналық Ассистанс» МО (Мәскеу к-сі, 38 А), «Медикал Ассистанс групп» ЖШС (Сығанақ к-сі, 21/1), «Архимедес Қазақстан» ЖШС (Сарайшық к-сі, 5).

Айта кетейік, биыл Астана қаласы әкімдігінің қолдауымен халықтың әлеуметтік қорғалмаған топтарына екпе жасау үшін тұмауға қарсы «Гриппол» вакцинасының 15055 мөлшері сатып алынды. Екпе Балалар үйінің, нәрестелер үйінің тәрбиеленушілеріне, Мүгедектер үйіндегі тұлғалар мен соғыс ардагерлеріне, сондай-ақ, «тәуекел топқа» жататын балаларға, екінші және үшінші триместрдегі жүкті әйелдерге салынады.