Қ. Қуанышбаев атындағы Мемлекеттік академиялық қазақ музыкалық драма театрының XXVI маусымының ашылуы өтті.
Елордамыздағы Қаллеки театрының XXVI маусымының шымылдығы «Абай» трагедиясымен ашылды. Көрермендер сүйікті актерлерімен сағыныса көрісіп, қошеметтерін аямады.
Театр жазғы маусымда күрделі жөндеу жұмыстарын жүргізіп, жаңа маусымның ашылуына айрықша дайындалған болатын.
Оңтүстік Қазақстан облысында ІІД ЖПҚ бастамасымен «Нөлдік төзімділік» акциясы өтті, деп жазады ОҚО әкімінің баспасөз қызметі. Акцияға Оңтүстік Қазақстан облыстық Жергілікті полиция қызметкерлерімен қатар, білім беру, денсаулық сақтау, еңбек және халықты әлеуметтік қорғау, прокуратура органдарының, үкіметтік емес ұйымдардың, «Нұр Отан» партиясының және қоғамдық құрылымдардың өкілдері қатысты. 3 күндік жұмыстың нәтижесінде барлығы 2703 әкімшілік құқық бұзушылықтың орын алған.
Аталған акцияға Жергілікті полицияның 1300-ден астам қызметкері жұмылдырылып, олардың 3 күндік жұмыстарының нәтижесінде барлығы 2703 әкімшілік құқық бұзушылықтың орын алғандығы, оның ішінде тыныштықты бұзған 53 азаматқа, қала және елдi мекендердің аумақтарын көрiктендiру ережелерiн бұзғаны үшін 254 азаматқа, спирттік ішімдік ішкен немесе қоғамдық орындарда мас күйінде жүрген 216 азаматқа, жекелеген қоғамдық орындарда темекі шеккені үшін 342 азаматқа, кәмелетке толмағандардың түн мезгілінде заңды өкілінсіз бей-берекет жүруіне жол берген 164 азаматқа және ұялы телефонмен сөйлесіп көлік басқарған 527 жүргізушіге, белгіленген жылдамдықты асырып көлік басқарған 78 азаматқа, қауіпсіздік белдігін тақпай көлік басқарған 577 адамға, жаяу жүргіншілерге жол бермеген 16 азаматқа, спирттік ішімдік ішіп, көлік басқарған 31 азаматқа, белгіленбеген жерден жолды кесіп өткен 66 жаяу жүргіншіге қатысты әкімшілік шара қолданылды.
Сондай-ақ акция аясында облыста 56 дөңгелек үстел, 8 брифинг, 18 семинар өткізілді. Білім беру ұйымдарында құқықтық тақырыпта 188 дәріс оқылып, 131 халықпен кездесу өтті.
Жергілікті полиция қызметкерлері, азаматтардың құқықтық танымын кеңейту, құқықтық мәдениетін арттыру және тәртіпсіздік пен ұсақ құқық бұзушылықтарға «нөлдік төзімділік» қағидатын қалыптастыру бағытындағы жұмыстарды одан әрі күшейтуде.
Астана әкімі Әсет Исекешев бірнеше инфрақұрылым нысандарының құрылысымен танысты, деп хабарлайды қалалық әкімдіктің баспасөз қызметі.
Елорда әкімі «Бәйтерек» қосалқы электрстанциясының құрылысымен танысты, оны 2017 жылы қаңтарда іске қосу көзделген. Шағын станция Жаңа вокзалды, №15, 16 сорғы станцияларын және әлемдік деңгейдегі «Кәсіпқор» колледжін электр энергиясымен жабдықтайтын болады.
Әсет Исекешев ғимаратының құрылысы аяқталған №15 сорғы станциясын да аралап көрді. Мұнда сорғыларды, құбырларды, инженерлік желілерді (су құбырын, кәріз, нөсер кәрізін) монтаждау жұмыстары жүргізілді. Электр және БӨҚжА, технологиялық процесті басқарудың автоматтандырылған жүйесін монтаждау, ішкі әрлеу жұмыстары жалғасуда.
Сорғы станциясын 2016 жылдың 15 қазанында іске қосу жоспарланған. Сондай-ақ, Астана әкімі ЖЭО-2 жаңғырту және қалпына келтіру барысымен танысты.
Сапар соңында Әсет Исекешев №9 қалалық емханаға ат басын тіреді. Емхананың жалпы ауданы 9935,1 шаршы м, мекеме заманауи емдеу-диагностикалау жабдықтарымен жабдықталған білікті мамандар қызмет ететін 11 бөлімнен тұрады. 2016 жылдан бастап емханада Қазақстан Республикасында денсаулық сақтауды дамытудың 2016-2019 жж. арналған «Денсаулық» мемлекеттік бағдарламасы аясында аурудың алдын алу мен басқаруға интеграциялық тұрғыдан қарау негізінде қоғам денсаулығын қорғау бойынша жаңа саясат қолға алынып, эндоскопиялық полипэктомия мен гистероскопиялық операциялар практикаға енгізілді.
Мұндай келісімге «Ontustik Tourism-2016» Халықаралық туристік форумы барысында қол жеткізілді, деп хабарлайды ОҚО әкімінің баспасөз қызметі. «Сайрам-Өгем мемлекеттік ұлттық табиғи паркі» РММ аумағында салынатын «Эко Кэмпинг» жобасының құрылысы келер жылы басталады. Халыққа қол жетімді бағада ұсынылатын шатырлы қалашық туристке қажетті барлық жабдықтармен қамтылатын болады. Тағы бір айта кететін жайт, мұндағы жарықтандыру күн батареялары есебінен жүзеге асады. Оңтүстіктің туристік әлеуеті мен тау туризмін және альпинизмді дамыту мақсатында қолға алынған жобаны «Сайрам-Өгем мемлекеттік ұлттық табиғи паркі» РММ мен «Ontustik» альпинизм Федерациясы бірлесе іске асырмақ. Сонымен қатар, бүгінгі туристік форумда бірқатар шетелдік компаниялармен бірлескен жобаларды жүзеге асыру мақсатында 7 меморандумға қол қойылды. Олар, Сарыағашта жаңа курорт қалашығын салу, туризм мектебін құру жəне халықаралық автодəліз жолының бойында қызмет көрсететін бірқатар нысандарды салу жобалары болып табылады. Сондай-ақ, шара барысында өңірге инвестиция тарту бағытында бірқатар келісімдер жасалды.
Еске салайық, бүгін таңертең жұмысын бастаған «Ontustik Tourism-2016» туристік форумы туризм саласындағы өңіраралық және халықаралық серіктестіктерді дамытуға және іскерлік қатынастарды орнатуға мүмкіндік береді. Форумға 300-ден астам қазақстандық және шетелдік қонақтар қатысуда.
Астана қаласының ішкі істер департаментінде тұрғын үй құрылысына үлестік қатысу мәселелері бойынша жұмыс отырысы өтті, деп жазады қалалық әкімдіктің баспасөз қызметі. Кездесу барысында елордалық құрылыс салушылар 10 қазанда күшіне енетін жаңа заңнамамен және оны бұзғаны үшін жүктелетін жауапкершілікпен таныстырылды.
Астана қаласының ІІД Тергеу басқармасы басшысының орынбасары Асылжан Қалдарбековтың хабарлауынша, жыл басынан бері ІІД-де жосықсыз салушыларға қатысты 11 қылмыстық іс қарауға алынды, соның ішінде 4-уі сотқа жіберілді, 7 – өндіріске алынды.
«Алаяқтық» бабы бойынша алдау жолымен «Ақжол» ТК 101 үлескерінің 800 млн теңге көлеміндегі ақшалай қаражатын иеленген «Ақжол» ЖШС директоры Ербол Манашовқа қатысты іс; «Араби-1, 2» ТК, «Самал» ТК 183 үлескерінің 1 млрд 700 мың теңге көлеміндегі ақшасын иеленген «Квартира НС» ЖШС директоры Медет Бектеміровке қатысты іс; «Столичный-2», «Аниса-1», «Коктал-2», «Абат» ТК тиесілі «Төленді» ТҚК төрағасы Айдын Байжұмановқа қатысты пәтерлерді екі рет сату фактілері бойынша іс сотқа жіберілді.
2015 жылы 7 қылмыстық іс қаралды, соның ішінде екеуі сотқа жіберілді, олар бойынша құрылыс компанияларының басшылары айыпты деп танылып, әр түрлі мерзімдерге бас бостандығынан айырылды.
«Тұрғын үй құрылысына үлестік қатысу туралы» жаңа заң құрылысқа үлестік қатысу кезінде халыққа кепіл беруді күшейтуге бағытталған. Аталған заң күшіне енген соң үлескерлердің қаржысын тарту және қаржы тартуға рұқсат беру саласында бақылау күшейтіледі.
– 10 қазаннан бастап үлестік қатысу туралы заңға сәйкес тәуекелдерді азайтып, құрылыс саласындағы айқындылықты, үлескерлердің құқықтары мен заңды мүддесін қорғау, тұрғын үйдің қолжетімділігін қамтамасыз ету қарастырылған жаңа тетіктер іске қосылады. Мұнда үлескерлердің ақшасын тартуға рұқсат алудың үш жолы қарастырылған, атап айтқанда, кепілдендіру қорының кепілдігін алу;
екінші деңгейдегі банктің жобасына қатысу; тұрғын үй қорының (тұрғын үй ғимаратының) қаңқасы салынғаннан кейін ақша тарту, – деді Астана қ. МЕмлекеттік сәулет-құрылысты бақылау басқармасы басшысының орынбасары Дәулет Досқұлов.
Әр жағдайда үлескермен тұрғын үй құрылысына үлестік қатысудың типтік келісімі жасалуы тиіс. Бұл ретте үлескерлер салушылардың құрылыс құжаттарымен танысуға құқылы. Сонымен қатар, үлескерлердің қаржысын тартудың аталған жолдары құрылыс салушыға және уәкілетті компанияға жоғары біліктілік талаптары қояды. Құрылыс нарығындағы тәжірибе кем дегенде 3 жыл, ал тұрғызылған ғимараттардың жалпы ауданы кем дегенде 9 мың шаршы м, сондай-ақ, мешік құқығымен тиесілі жер учаскесі немесе ауыртпалықсыз жер пайдалану және т.б. болуы керек.
Дәулет Досқұловтың айтуынша, 10 қазаннан кейін заңға қайшы жасалған тұрғын үй құрылысына азаматтардың немесе заңды тұлғалардың қаржысын тарту қарастырылған барлық келісімдер жарамсыз деп танылады. Заң талаптарын орындамған құрылыс салушылар қылмыстық қудалауға ілігеді.
Таулы аймақ — Түлкібаста алманың «апорт» сортын өсіріп жүрген шаруашылықтардың саны артып келеді. Бүгінгі таңда аудан көлемінде апорт алмасын өсіретін алқаптардың көлемі 200 гектарға жетті, деп хабарлайды ОҚО әкімінің баспасөз қызметі.
Апорт алмасын өсіруді аудандағы «Көктал», «Арша» шаруашылықтары қолға алып, жыл сайын жаңа баулар отырғызуда. Сатылымда сұранысқа ие апорт алмасын егуге басқа да шаруашылықтар қызығушылық танытып отыр. Жалпылай айтқанда, аудандағы ірілі-ұсақты 20 шақты шаруашылық жеңсік жеміс түрін баптаумен айналысуда. Дегенмен, бағбандар, әзірге, өнім алған жоқ. Өйткені, жемістің бұл сұрыпы өнімді 7-8 жылдан соң береді. Ал түлкібастық апорттардың өсіріліп жатқанына 3 жылдан енді асты.
Айта кетейік, жемісі ірі келетін бір алманың салмағы 500-600 грамға дейін жетеді. Ал түсі алқызыл болып келеді. Бұл сорттың жемісі қыркүйек айында піседі, қаңтар ақпан айларына дейін еркін сақтауға болады.
Еске салайық, Түлкібас ауданы кезінде алманың «апорт» сұрыпын өсірумен аты шыққаны белгілі. Өйткені, жемістің бұл сортын өсіру үшін таңдалып алынған жер алқабы теңіз деңгейінен 900 метрден жоғары биіктікте болуы шарт. Ал, Түлкібас ауданы осындай аймақта орналасқан өңір.
Л.Н. Гумилев атындағы Еуразия ұлттық университетінде «Қазақстан халқы Ассамблеясы қызметін дамытудағы жастар әлеуеті» атты студенттер конференциясы өткізілді. Конференцияның басты мақсаты — Қазақстандағы этносаралық қарым-қатынас саласындағы саясат туралы түсінік қалыптастыру, студент жастар арасында жалпыұлттық бірегейлікті және патриоттық тәрбиені кеңінен насихаттау. Сонымен қатар, конференция қоғамдық келісім мен ұлттық бірлікті нығайтуға, жас ұрпақтың рухани-адамгершілігін дамыту мәселесі мен этносаралық қарым-қатынас жүйесіндегі жастардың жобаларын кеңінен таныстыруға бағытталды, деп хабарлайды қалалық әкімдіктің баспасөз қызметі.
Л.Н. Гумилев атындағы Еуразия ұлттық университеті ЮНЕСКО кафедрасының меңгерушісі Ғаділбек Шалахметов этносаралық қарым-қатынас жүйесіндегі ҚХА маңыздылығына тоқталды.
— Қазақстан халқы Ассамблеясы дегеніміз не?! Ол — симфониялық оркестр. Шын мәнінде, классикалық және симфониялық оркестрлер шамамен бірегей 50 аспаптан тұрады. Егер симфония музыкалық аспаптардан тұратын болса, онда дабылсыз симфония үні естілмеген болар еді. Осылайша біздің жағдайда, бұл дабыл кіші этникалық топ болып есептеледі. Сондықтан біз Қазақстан халқы Ассамблеясының қызметін ауызға алған кезде, еліміздің симфониялық оркестріне айрықша үміт артамыз!»,- деді ол.
Елордалық жоғары оқу орындары мен колледж студенттеріне патриотизм мен ұлтаралық бірлік тақырыбына баяндама жасап, өз ой-пікірлерін айтуға мүмкіндік жасалды.
«Еліміздің әрбір адамы патриот бола алады. Ол үшін оның қазақ болуы шарт емес. Ең бастысы, барлық игілікті істерді ел игілігі үшін жасайсың, — дейді Қазақ МЗУ студенті Дален Рахимжанов.
Іс-шараны қорытындылаған Астана қаласы Қазақстан халқы Ассамблеясы Хатшылығының меңгерушісі Ляззат Құсайынова ұлттық бірлікті құруда жастардың орны айрықша екенін тағы бір мәрте атап өтіп, елордалық жастарды ҚХА қызметіне белсенді қатысуға шақырды.
— Біз одақтастарды, соның ішінде Қазақстан халқы Ассамблеясы қызметін дамыту мәселесіне қатысты жастар арасынан өз достарымызды іздейміз. Этностардың тілін, мәдениетін құрметтей және дамыта отырып, біз өзімізді биікке көтереміз», — деді Л. Құсайынова.
Шара соңында конференцияға қатысушыларға алғыс хаттар табыс етілді.
ҚР Білім және ғылым министрлігі Қазақстан жоғары оқу орындары қауымдастығының президенті Рахман Алшановтың ЖОО-ларға қатысты ұсыныстарын қарастыруға уәде етті.
Бұл туралы ведомствоның баспасөз қызметінен мәлімдеді.
Еске салсақ, 4 қазан күні Орталық коммуникациялар қызметінде өткен баспасөз мәслихатында ҚР жоғары оқу орындары қауымдастығының президенті Рахман Алшанов ЖОО-ның профессорлық-оқытушылық құрамының ара-салмағын қайта қарау сондай-ақ, жоғары білімнің қолжетімділігін кеңейтуге байланысты бірқатар ұсыныс жасаған болатын.
Атап айтқанда, білім беру және ғылыми жұмыстарға магистрлер мен өндіріс мамандарын тарту және олардың профессорлық-оқытушылық құрамдағы үлесін 70% дейіне жеткізу мүмкіндігін қарастыру; магистрлер мен PhD докторларын дайындауға мемлекеттік тапсырысты ұлғайту; ЖОО-ның ақылы бөлімдеріне түсуге ниетті талапкерлерді ҰБТ тапсырусыз, тек оқу орындарының ұйымдастырған емтихандарын тапсыру арқылы түсу мүмкіндіктерін қарастыру.
«ҚР білім және ғылым министрлігі Қазақстан жоғары оқу орындары қауымдастығының ұсыныстарын жұмыс барысына қабылдап, олардың нәтижелерін хабарлайтын болады», — делінген министрліктің таратқан хабарламасында.
2016 жылғы 6 қазан күні дарынды ер балаларға арналған облыстық қазақ-түрік лицейінде жасөспірімдер арасында бағдарламалаудан олимпиада өткізілді. Олимпиадада 30 оқушы бақ сынасты.
Жеңімпаздар мен жүлдегерлер І, ІІ, ІІІ дәрежелі дипломмен марапатталды.
Олимпиада қорытындысы бойынша І орынды дарынды балаларға арналған №8 лицей-мектебінің 8 сынып оқушылары Фридкин Даниил, Ходацкий Богдан, Высоцкая Валерия, Кошкарбаев Никита жеңіп алды.
ІІ орынға Павлодар қаласы «Жас дарын» мамандандырылған мектебінің 8 сынып оқушысы Ертаев Ансар, дарынды балаларға арналған № 8 лицей-мектебінің 8 сынып оқушы Измаилов Али ие болды.
ІІІ орынды Павлодар қаласы «Жас дарын» мамандандырылған мектебінің 8 сынып оқушысы Сарбупеев Сулейман, дарынды қыз балаларға арналған қазақ-түрік лицей-интернатының 8 сынып оқушысы Сембекова Дильназ, дарынды ер балаларға арналған қазақ-түрік лицей-интернатының 8 сынып оқушысы Тулегенов Айдархан иеленді.
Кұрмет грамотасымен Ы.Алтынсарин атындағы дарынды балаларға арналған облыстық қазақ гимназия-интернатының 7 сынып оқушысы Ондрис Бибисара, дарынды ер балаларға арналған қазақ-түрік лицей-интернатының 7 сынып оқушылары Абихас Алимхан және Хасанов Рустем, дарынды балаларға арналған Абай атындағы №10 лицей-мектебінің 6 сынып оқушысы Енсебек Мадияр марапатталды.
Алматы облысында донорлардың саны өзге аймақтармен салыстырғанда бес есеге аз. Бұл жөнінде облыстық қан орталығы директорының орынбасары Серік Әбдіразақов мәлімдеді.
«Денсаулық сақтау жүйесінің стандарттарына сәйкес, әр мың адамға 40 донордан болуы керек. Біздің көрсеткіш оған жетіңкіремейді. Алматы облысында 1000 адамға 8 донордан ғана келеді», — дейді облыстық қан орталығы директорының орынбасары.
Облыстық қан тапсыру орталығы Талдықорған қаласындағы ауруханалар мен 8 ауданды қамтамыз етеді. Күніне әр мекемеге 10 литрға жуық қан керек. Сол себепті халықты донор болуға шақырады. Еске сала кетер бір жайт, қан тапсыратын донорлардың денсаулығына қойылатын талап жоғары. Донор болғысы келетін адамдар алдын ала дәрігерлік және лабораториялық тексеруден өткізіледі. Сонымен қатар алкогольдік сусындарды қолдануға тыйым салынады. Мамандардың сөзінше тұрақты донор болу денсаулыққа өте пайдалы. Ағзадағы қан тазарып, адам өзін өте сергек және жеңіл сезінеді екен.
