Jas.kz

Елорданың іргесіндегі «Қазанат» атшабарында алғаш рет «Астана жұлдызы» республикалық турнирі өтті. Тәуелсіздіктің 25 жылдығына арналған дүбірлі доданы Астана қаласының әкімі Әсет Исекешев салтанатты түрде ашты, деп жазады қалалық әкімдіктің баспасөз қызметі.

Елордалық дәрігерлер халыққа көптеген мемлекетте денсаулық сақтау жүйесінің тиімді модельдерінің бірі ретінде танылған сақтандыру медицинасының артықшылықтары туралы айтуда. Ол азаматтарға медициналық көмектің барынша көп спектрін алуға мүмкіндік береді, деп жазады қалалық әкімдіктің баспасөз қызметі.

Елімізде мемлекеттің, жұмыс берушінің және әрбір адамның ортақ жауапкершілігіне негізделген озық халықаралық тәжірибені ескере отырып әзірленген міндетті медициналық сақтандыру жүйесі енгізіледі. Бұл ретте экономикалық белсенді емес адамдарға мемлекет тарапынан салымдар жасалады. Жұмыс берушілер – жалдамалы жұмыскерлер, ал жұмыскерлер мен салық органдарында тіркелген өзін-өзі жұмыспен қамтыған азаматтар өздері үшін жарналар енгізеді.

Сарапшылардың болжамынша, міндетті медициналық сақтандыру жүйесін енгізудің нәтижесінде елімізде медициналық көмек көрсету деңгейі айтарлықтай артады, сондай-ақ, дәрігерлердің еңбекақысын өсіру мүмкіндігі туады. Ауруханалар жоғары санаттағы жабдықтар мен қымбат дәрі-дәрмектер сатып алады. Міндетті әлеуметтік медициналық сақтандыру адамдарға тексеруден өтуге және қажет болған жағдайда өз қалтасынан ақша шығармай ем-дом қабылдауға мүмкіндік береді.

Астана қ. Жұмыспен қамту орталығында жұмыссыз азаматтарға арналған тегін семинар-тренингтер сериясы басталды. Мұндай кездесулер астаналықтарға кәсіпкерлік ойлауды дамытуға мүмкіндік береді, деп хабарлайды қалалық әкімдіктің баспасөз қызметі.

Бірінші сабақты психолог Айқын Дүйсембаев өткізді. Оның айтуынша, мұндай шаралар күшті қолдау көрсетеді, жұмыс іздеушілердің одан әрі дамуына жол ашады.

—  Ұзақ уақыт бойы жұмыс таба алмағандар терең дағдарысқа түседі, оларға көмек керек. Бұл шара Жұмыспен қамту орталығына жүгінген жұмыссыздардың кәсіпкерлік ойлау қабілетін дамытуға бағытталған,- дейді Айқын Дүйсембаев.

Астана қаласы Жұмыспен қамту орталығының директоры Олжас Омардың хабарлауынша, тренингтерде адамдарды өз ісін ашуға көндіреді.

—  Біз сабақтарға тәжірибе бөлісу үшін кәсіпкерлерді шақыруды жоспарлап отырмыз. Сонымен қатар, «Атамекен» ұлттық кәсіпкерлер палатасының мамандары өз бизнесіңді қалай бастау керек екендігі, мемлекеттік қолдау шаралары туралы айтады, — деді Олжас Омар.

Айта кетейік, семинар-тренингтер қалалық Жұмыспен қамту орталығында әр сәрсенбі сайын сағат 16.00 — 17.00 өткізіледі. Алдын ала жазылу телефоны: 95-44-19.

Биыл мұсылмандардың қасиетті мерекесі Құрбан айт 12 қыркүйектен бастап тойланады. Бұл күні қаланың барлық мешіттерінде сағат 7.30 мерекелік намаз оқылады. «Нұр Астана», «Әзірет Сұлтан» және «С. Ғылмани» мешіттерінде қайырымдылық акциялар, жәрмеңкелер және спорттық жарыстар ұйымдастырылады деп хабарлайды қалалық әкімдіктің баспасөз қызметі.

«Әлжан ана» мешітінің имамы Сәбит Қуаныштың айтуынша, мерекенің алғашқы күні 11 қыркүйек – қасиетті Арафа күні барша әлемнің мұсылмандары Мекке қаласында жиналып, ғибадат етеді.

— Мерекенің өзі қыркүйектің 12-сінен 15-не дейін тойланады. Қазіргі кезде Астанада дайындық жұмыстары жүріп жатыр. Намаздан кейін құрбандық шалуға болады. Малды 14 қыркүйекте күн батқанша құрбандыққа шалады. Мерекеге орай сиыр, түйе және қой союға болады, — дейді Сәбит Қуаныш.

Баспасөз мәслихатында мал союға арналған орындарда ветеринарлық бақылау қамтамасыз етілетіні айтылды.

— Мал соятын орындарда ветеринарлық бақылау қамтамасыз етіледі. Қалалық бекеттерде малды әкелу кезінде ІІД мен бірге кезекші дәрігерлер құжаттардың, анықтамалардың болуын тексереді. Құжаттар болмаса, олар қалаға жіберілмейді, — деді Астана қаласының Дін істері жөніндегі басқарманың мониторинг және талдау бөлімінің басшысы Арман Пирзадаев.

Елордада барлық санитарлық нормаларды сақтай отырып, мал союға арналған 8 орын белгіленді. Астана қ. ауыл шаруашылық басқармасының хабарлауынша, оның жетеуі қала аумағында («Темеш» ШҚ, «Шаушен» ШҚ, «Нұрбереке 555» ЖШС, «Жайлау» базары, «Мақсат 2007», «Метро» СҮ, «Саянұр» базары), біреуі Ақмола облысында орналасқан.

Айта кетейік, 12 қыркүйекте «Нұр Астана» мешітінен «Алтын таға» базарына дейін 1 сағат аралықпен сағат 14.00-ге дейін арнайы автобус қатынайды.

Бұрын хабарланғандай, өңірлерде адамдар мен жануарларға жұғатын аса қауіпті аурулар тіркеліп отырғандығын ескере келе, елорда тұрғындары мен қонақтарынан мал сатып алу кезінде мұқият болуларын сұраймыз.

2014 жылдан бері эпизоотикалық жағдайды сақтау мақсатында республиканың 5 өңірінен — Алматы, Жамбыл, Шығыс Қазақстан, Оңтүстік Қазақстан, Қызылорда облыстарынан. мал мен ет әкелуге тыйым салынды.

Малдарды тек аталған мекен жайлар бойынша ғана сатып алыңыздар. Сатып алу кезінде сатушыдан малға жасалған вакциналар туралы тиісті белгілер қойылған ветеринариялық анықтаманы көрсетуін сұраңыз.

Екпе жасалған күнге баса назар аударыңыз. Екпе жасалғаннан кейін мал кем дегенде 15 күн карантинде болады. Осылайша, соңғы екпе 15 күн бұрын жасалуы тиіс.

Заңнама нормаларына сәйкес, ішкі сауда объектілеріне, соның ішінде базарларға сату үшін түскен жануарлардан алынатын өнімдер оны тамаққа пайдаланудың қауіпсіз екендігін көрсететін ілеспе ветеринариялық құжаттар болмаса, тәркіленіп, жойылады.

Отбасы күні қарсаңында 11 қыркүйекте Студенттік саябақта «Біз отбасымызбен спортты сүйеміз» мерекелік шарасы өтеді. «Замандас» аула клубтарындағы балалар мен ата-аналар эстафетаға қатысып, түрлі шараларда күш сынасады, деп хабарлайды қалалық әкімдіктің баспасөз қызметі.

Мерекелік шара сағат 11.00 басталады. Алдымен «Денің сау болсын» үйірмесі қатысушыларға жаттығу жасатады, содан кейін аула клубтары эстафетада «Олимпиадалық отбасы» атағын сарапқа салады, түрлі ойындарда сайысқа түседі.

Сонымен қатар, флешмоб, «Арт-терапия» үйірмесіне баратын балалардың еңбектерінің, халықтық қолданбалы өнер көрмесі өтеді. «Замандас» аула клубтарының тәрбиеленушілері көпшілік назарына мерекелік концерт ұсынады.

Шара соңында жеңімпаздар жүлделермен және грамоталармен марапатталады.

Айта кетейік, шараны Samruk-Kazyna Trust жобаларды әлеуметтік дамыту қорының қолдауымен «Алматы» ауданы әкімі аппаратының қатысуымен «Замандас 21» ҚҚ ұйымдастырады.