Jas.kz

Таңертеңнен бері қала тұрғындары мен қонақтары Б. Момышұлы даңғылындағы Оқушылар сарайының тұрағында өтіп жатқан ауыл шаруашылық жәрмеңкесіне асыға келуде. Мұнда Қызылорда облысынан әкелінген өнімдердің кең ассортименті төмен бағамен сатылады. Жалпы, 40 сауда шатыры орнатылып, 400 тоннаға жуық ауыл шаруашылық өнімі ұсынылып отыр, деп хабарлайды қалалық әкімдіктің баспасөз қызметі.

Жәрмеңке «Қуатты өңір – қуатты Қазақстан» Өңірлер күндері аясында өтіп жатыр. Астанаға Қызылорда қаласы мен өңірдегі 7 аудан өз өнімдерін әкелді.

Жәрмеңкеде жарма, көкөністер, жемістер, сүт, ет және шұжық өнімдері, балық, бал, нан-тоқаш, кондитерлік өнімдер сатылады. Бағасы да төмен.

— Азық-түлік бағалары қуантады. Мен күріш, болгар бұрышын, алма сатып алдым. Бәрі арзан. Осындай жәрмеңкелер жиі өткізілсе екен, — дейді Астана тұрғыны Гүлнар Әлімжанова.

Сонымен қатар, жиналған қауым қызылордалық өнер қайраткерлерінің «Ырысты, күрішті Қызылорда» концерттік бағдарламасын және академик Ыбырай Жақановтың туғанына 125 жыл толуына орайластырылған «Ақ күріштің атасы — Ыбырай» атты көрмені тамашалайды. Сондай-ақ, «Қазақстанда жасалған» маркасымен шығарылған отандық өнімдер көрмесі де көпшілік назарына ұсынылады.

Еске салайық, Қызылорда облысының мәдениет күндері аясында М. Әуезов атындағы орталық қалалық кітапханада өңірдің тарихымен және мәдениетімен таныстыратын «Туы биік, тұғыры берік Сыр елі» кітап көрмесі өтіп жатыр. Мерекелік шаралар Л.Н.Гумилев атындағы ЕҰУ студенттер мен қоғамдық қайраткерлердің, танымал тұлғалардың кездесуімен жалғасады.

Астана қаласының Балалар деревнясында «Бәрі де бақыт үшін» ұранымен қайырымдылық шарасы өтеді.

Конгресс-холлда аймақтың өнер иелері «Сыр — Алаштың анасы» атты мерекелік концертте өз шеберлігін ортаға салады. Сондай-ақ, фойеде «Тәуелсіздіктің дара жолы — Сыр елі жетістігі» фотокөрмесі мен ел тәуелсіздігіне арналған сурет көрмесі өтеді. ҚР Ұлттық академиялық кітапханасында кітап көрмесі, ал ҚР Ұлттық музейінде ҚР Тәуелсіздігінің 25 жылдығына арналған көрмелер мен экспозициялар ашылады.

Астана әкімі Әсет Исекешев мектеп түлектеріне – жетімдерге, мүгедектерге, балалар үйлерінің тәрбиеленушілеріне, көп балалы отбасылардан шыққан және ата-анасының қамқорлығынсыз қалған балаларға елордалық ЖОО-ларда оқу ақысын төлеу үшін әлеуметтік көмек көрсету туралы куәліктер табыс етті, деп хабарлайды қалалық әкімдіктің баспасөз қызметі.

«Бұл да мемлекеттің, Президентіміз Нұрсұлтан Назарбаевтың қамқорлығының бір белгісі екендігін атап өткеніміз жөн. Елбасы әрқашан да білімді ұлттың болашағы жарқын болады дейді. Білімнің арқасында біз бәсекеге қабілетті, күшті боламыз. Білім саласын дамыту – мемлекеттің басымдықтарының бірі болып табылады»,- деді Әсет Исекешев.

Астана әкімінің білім гранттары елордалық еңбек нарығындағы сұранысқа ие мамандықтар бойынша бөлінеді. Бұл ретте техникалық, педагогикалық және медициналық мамандықтарға басымдық берілген.

Анықтама: 2008 жылдан бастап 268 түлек диплом алған. 81 студент оқуын жалғастыруда, соның ішінде 34 студент – С. Сейфуллин атындағы ҚазАТУ, 13 – Қазақ экономика, қаржы және халықаралық сауда университетінде, 8 — Медицина университетінде, 2- Л.Н. Гумилев атындағы ЕҰУ, 21 — Еуразия гуманитарлық институтында, 1 – Астана университетінде, 2 — Технология және бизнес университеттінде.

Оқу жылы қарсаңында 41 өтініш қабылданды, соның ішінде 21-і республикалық грант бойынша, 20 өтініш арнайы комиссиямен қаралды. Нәтижесінде жалпы сомасы 7 210 000 теңгені құрайтын гранттар бөлінді.

Жалпы биыл жергілікті бюджет есебінен 101 студентті оқытуға (оқуын жалғастырып жатқан 81 студент + биылғы 20 студент) 38,9 млн теңге жұмсалды. Қала әкімдігі ЖОО басшылықтарымен бірлесіп студенттердің үлгерімін тұрақты бақылауға алды.

Қазақстанда террористік қауіп-қатерге байланысты хабарламалар қабылдайтын бірыңғай номер белгіленді. Егер жоспарланып жатқан террористік актілері туралы білсеңіз, немесе радикалды топтардың адамдарды өзіне тарту, көндіру әрекеттеріне тап болсаңыз, не болмаса оның куәгері болсаңыз, терроризм мен діни экстремизмді насихаттайтын әдебиетті тарату туралы білсеңіз, «110» номеріне хабарласыңыздар. Осы номер бойынша Қазақстанның кез келген аймағынан келіп түскен қоңырау аумақтық белгісі бойынша ҰҚК департаменттерінің кезекшілік қызметтеріне жолданады, деп жазады қалалық әкімдіктің баспасөз қызметі.

Еске салайық, Қауіпсіздік кеңесінің 2016 жылғы 10 маусымдағы хаттамалық тапсырмасымен облыстардың, Астана мен Алматы қалаларының әкімдеріне ІІМ, ҰҚК, сондай-ақ, Ақпарат және коммуникация министрлігімен жергілікті жерлерде терроризмге қарсы «қауырт» желілер ашу бойынша шаралар қабылдау тапсырылды.

Қазіргі кезде ҰҚК келісімге қол жеткізген аудандық, қалалық телефондардан және «Beeline» мобильді операторының номерлерінен тегін қоңырау шалуға болады. Басқа байланыс операторларымен келіссөздер жүргізілуде.

Жастар практикасы оқыған мамандығы бойынша мемлекеттік мекемелерде және жеке меншікті ұйымдарда алғашқы жұмыс тәжірибесін алуға мүмкіндік береді. Жыл басынан бері Астана қаласы әкімдігінің Жұмыспен қамту орталығы 486 жас маманды жастар тәжірибесіне жіберді, деп хабарлайды қалалық әкімдіктің баспасөз қызметі. Бүгінде, олардын 335-і алғашқы тәжірибелерін алып, 182-і тұрақты жұмысқа қабылданды.

Жастар практикасы білім беру ұйымдарының түлектеріне оқыған мамандығы бойынша алғашқы жұмыс тәжірибесін алуға бағытталған. Жастар практикасына қатысушылардың еңбекақысы мемлекеттік бюджет есебінен төленеді. Бүгінде оның мөлшері айына 53 800 теңгені құрайды.

Айта кетейік, жұмыс орындарының саны шектелмеген, бұл уақытша ғана жасалып отыр. Бұл ретте соңғы үш жылда жұмыссыздар ретінде тіркелген түлектердің жасы 29-дан аспауы керек. Жас маманның Астанада тұрақты тіркеуі, жеке куәлігі мен дипломы болуы керек.

Жұмыссыз азаматты жұмысқа қабылдау туралы шешім шығарылған жағдайда жұмыс беруші Қазақстан Республикасының Еңбек кодексіне сәйкес онымен жеке еңбек келісімшартын жасайды. Жастар практикасының ұзақтығы – 6 айдан аспайды.

Толық ақпарат алу үшін Астана қаласы әкімдігінің Жұмыспен қамту орталығына мына мекен жай бойынша хабарласу керек: Астана қ., Бейбітшілік к-сі, 25, «Өркен» ІО. Анықтама телефондары: 57-86-47, 57-85-42, 26-65-18.

Елорда әкімдігі көлік жүйесінің сапасын жақсартуға бағыталған «Астана қаласының тұрақ кеңістігін басқару» жобасын қолға алды. Озық технологиялар алдымен Нұржол желегінде пайдаланылады. Әңгіме аумақты шлагбауммен жабу туралы емес. Бұл — Қазақстанда енгізіліп жатқан мүлдем жаңа технология.

Сынақ жұмыстары барысында Нұржол желегінде 910 тұрақ орны жасалады. Әрбір тұрақ орны арнайы жол белгісімен және тетіктермен жабдықталады. Аумаққа кірген кезде жүргізушілер электронды таблодан бос тұрақ орындары туралы мәліметті көреді. Көліктік бақылау қызметінің өкілдері көлік қою ережесін бұзу жағдайларын автоматтандырылған фото және бейне құралдардың көмегімен тіркейді.

Жүйе сынақтан өткізілгеннен кейін және халықты «Тұрақ кеңістігін басқару» жобасының іске қосылғандығы туралы ресми түрде хабардар етілген соң тұрақ кеңістігін пайдаланғаны үшін ақы алынатын болады.

Жоба бойынша ақы төлеудің бірнеше жолы қарастырылған, ол кезең-кезеңмен енгізілетін болады. Атап айтқанда, қолма-қол ақшамен және арнайы паркоматтар арқылы есеп айырысу, арнайы мобильдік қосымшаның көмегімен SMS-пен және сайттағы жеке кабинет арқылы төлеу.

Келер жылы сынақ жұмыстары оң нәтиже берген жағдайда Астана қаласының әкімдігі басқарылатын 9 000 жуық тұрақ орнын жасамақ. Басқарылатын тұрақ орындары 25 көшені, елорданың сол жағалауында Тұран – Сарайшық – Орынбор – Сығанақ «квадратын», оң жағалауда — Сарыарқа — Бөгенбай батыр, Республика – Есіл жағалауын қамтиды.

Анықтама: 2015 жылы Price Waterhouse Coopers халықаралық ұйымы Астананың Нұржол желегіндегі көлік айналымын зерттеді. Мониторинг нәтижесінде, жүргізушілердің 80% өз көліктерін жұмыс орындарының жанында орта есеппен 8-9 сағатқа қалдыратыны анықталды. Сондай-ақ, 13-14 сағат бойы машиналар тұрғын үй кешендерінің алдында тұрады және жүргізушілердің 15-20% ғана темір тұлпарларын жабық паркингтерге қоятыны белгілі болды. Яғни, елордалықтардың басым бөлігі күні бойы тұрақта тұрады.

Омбы облысының тарихи мұрағатында «Астана – Еуразия жүрегі» көрмесі ашылды. Экспозиция Астана қаласының мемлекеттік мұрағатымен ұйымдастырылды және ТМД-ның құрылғанына 25 жыл толуына орайластырылған, деп хабарлайды қалалық әкімдіктің баспасөз қызметі.

Көрменің ашылуында Қазақстан Республикасының Омбыдағы консулы Эльдар Қонаев, Омбы облысының мәдениет вице-министрі Людмила Чекалина және Астана қаласы мемлекеттік мұрағатының директоры Балқия Баймағанбетова сөз сөйледі.

Салтанатты шара барысында дәстүр бойынша «шашу» шашылды. Омбы Достар үйінің ұлттық музыкалық ұжымдары мен өңірдегі қазақ диаспорасы қонақтарға көтеріңкі көңіл күй сыйлады.

«Астана – Еуразия жүрегі» экспозициясы – мемлекетаралық мәдени-тарихи жоба, оған қазақстандық мұрағатшылар ерекше ықыласпен дайындалды. Шараның мақсаты Омбы тұрғындары мен қонақтарын Астананың тарихымен таныстыру және Қазақстан мен Ресейдің мәдени мекемелерінің арасындағы байланысты нығайту болып табылады.

Көрмеге 100 астам экспонат қойылған. Экспозицияның әрбір бөлімінде қаланың Акмолинск деп аталған 1832 жылдан бастап елорданың қалыптасуының барлық кезеңдері көрініс тапқан. Мұнда жәрмеңкелер, ауруханалар, мектептер, банктер және басқа да тіршілікті қамтамасыз ету үшін маңызды мекемелердің ашылуына қатысты материалдар, сондай-ақ, Акмолинск қаласының фотосуреттері ұсынылған. Тың игеру кезеңіндегі қаланың тыныс-тіршілігі туралы әңгімелейтін экспонаттар да бар. Тіпті, тың игеруге жіберу туралы жазылған өтініш, Акмолинск қаласына келген алғашқы тың игерушілердің ақ-қара фотосуреттері де қойылған. Бұдан бөлек, ҚазКСР Жоғары Кеңесі президиумының тың игеру өлкесі Акмолинск қаласын Целиноград қаласы деп атау туралы жарлығы, КСРО Министрлер Кеңесінің «Целиноград қаласын дамыту туралы» қаулысы, 60-шы жылдары қаланы салу барысының суреттері де көпшілік назарына ұсынылған.

Елорданы Алматыдан Астанаға көшіру туралы бөлек экспозиция жасалған. Көрмеге келушілер қаланы қайта атау туралы жарлықпен, елорданы салу барысы туралы материалдармен, қаланың төлқұжатымен, бас жоспарымен, Астананың суреттерімен және т.б. таныса алады.

Қазақ халқының қолданбалы өнер бұйымдары мен тұрмыстық заттары көрмеге ерекше көрік береді: әйелдің ұлттық киімі, авторлық зергерлік бұйымдар, панно, музыкалық аспаптар – домбыра, қобыз. Сонымен қатар, қонақтар отандық нумизматтардың коллекциясынан алғашқы қазақстандық банкноталарды, мерейтойлық монеталарды, қазақстандық филателисттердің пошталық маркаларын көре алады.

Қазақстандық мұрағатшылар Омбы облысының мәдениет министрлігінің атынан алғыс хаттармен марапатталды. Өз кезегінде, астаналық әріптестер ресейлік тарапқа елордалық Мәдениет және мұрағаттар басқармасы басшысының атынан алғыс хаттар табыс етті.

«Астана – Еуразия жүрегі» көрмесі 26 тамыз – 26 қыркүйек аралығында өтеді. Омбы облысының тарихи мұрағат қызметкерлерінің айтуынша, көрмеге келушілер саны күн сайын артып келеді.