Jas.kz

«Даму-Көмек» мүмкіншілігі шектеулі адамдарға қолдау көрсету бағдарламасының арқасында Алматы облысының мүгедек кәсіпкерлері өздерінің бизнестерін құрып, дамыта алады.

«Даму-Көмек» бағдарламасы мүмкіндігі шектеулі кәсіпкерлер мен тұрғындарға олардың проблемалары мен оларға қажетті ресурстар (қаржылай көмек, мүлік, консультациялық қолдау, өзге қызметтер) туралы ақпарат дәрежесін арттыру жолымен қолдау көрсетуге бағытталған.

Меңсұлу Шілікбаева, Любовь Бурляева, Әлжан Үрпекбаева, Күләш Шалдыбекова, Айман Салкеева, Ольга Беликова және Бағдат Атантаева қорға жүгініп, тігін машинасын сатып алуға көмек сұраған.

Олардың әрқайсысы өздерін материалдық тұрғыда қамтамасыз етумен қатар мүмкіндігі шектеулі адамдардың да рухы мықты болатындығын іс жүзінде дәледеуге тырысады. Көмек сұраған адамдардың барлығының да іс тігуде мол тәжірибесі бар, өздерінің шеберліктерін көрсетіп, еңбексүйгіштік қырларын да көрсете алған.

Бұл жолы қайырымдылық көмек қолын «Қайнар — АКБ» ЖШС және «GLASMAN» ЖШС компаниялары созды. «Қайнар  АКБ» ЖШС зауыты негізінен автомобильдерге, ауыл шаруашылығы техникалары мен әскери техникаларға арналған аккумуляторлық батареялар шығарумен айналысады.

«GLASMAN» компаниясы ең талапшыл сатып алушылардың сұраныстарына сай келетін және мектеп оқушыларының нақты арманын іске асыруына көмектесетін классикалық ерлер киімін және мектеп киімі нысанын жасайды.  Өндірістің автоматтандырылған жүйесі сапасы жағынан шетелдік үздік бұйымдарға жол бермейтін, классикалық сәннің дүниежүзілік деңгейінің талаптарына сай келетін, өлшемдері саналуан, ал құны, бәсекеге қабілеттілігі жөнінен бәрінен басым бұйымдарды шығаруға мүмкіндік береді.

Бұл кәсіпорындар осыдан біраз уақыт бұрын «Бизнестің жол картасы-2020» бағдарламасы аясында мемлекеттік қолдауға ие болып, өз бизнестерін дамытқан болатын. Ендігі уақытта олар «Даму-Көмек» бағдарламасы арқылы түрлі көмек көрсетуге мүмкіншілік алып отыр.

Естеріңізге сала кетсек, бұған дейін «Даму-Көмек» бағдарламасы бойынша 154 мүгедек кәсіпкер демеушілік қолдауға ие болған еді.

ҚазАқпарат

8 шілдеде «Астана» Ұлттық сурет галереясында Астана күніне және Қазақстан Республикасы Тәуелсіздігінің 25-жылдығына арналған «Ғасырлар түкпірінен» атты жеке көрменің ашылу салтанаты өтеді.

Ұлттық музейдің қоғаммен байланыс бөлімінің хабарлауынша, көрмеге ресейлік суретші-график Әлібек Қойлақаевтың туындылары қойылады, сонымен қоса суретші көрме соңында келген қонақтарға графика өнерінен арнайы шеберлік дәрісін өткізеді.

Әлібек Қойлақаев — ноғай ұлтынан шыққан суретші. Краснодар Мемлекеттік мәдениет және өнер университетінің түлегі. Өзінің жылдар бойғы еңбегі мен білімінің арқасында суретші өзінің жеке әдісін жетілдірген: сурет салу кезінде Әлібек қауырсын мен тушь қолданады.

2016 жылы Әлібек Қойлақаев Түркияның Анкара, Ыстамбұл және Ескішехир қалаларында өзінің жеке көрмелерін өткізген болатын.

Бұған дейін суретші бүкілресейлік, республикалық форумдарға, іс-шараларға қатысып, Мәскеу (2010 ж.), Махачкала (2010-2012 жж.), Санкт-Петербор (2011 ж.), Ставрополь (2012-2013 жж.), Пятигорск (2010-2013 жж.) қалаларында жеке көрмелерін өткізген.

ҚазАқпарат

Ел Тәуелсіздігінің 25 жылдығы мерекесі аясында және «Астана» күні мерекесіне орай, ОҚО Сарыағаш ауданындағы Ақтөбе және Тегісшіл ауылдық округтерінде екі мәдениет үйі ел игілігіне берілді. Қос елдімекендегі ғимараттардың ашылуына облыстық мәдениет басқармасы басшысының орынбасары Е.Тілеубердиев пен Сарыағаш ауданы әкімінің орынбасарлары А.Есбаев пен Қ.Қыстаубаевтар қатысты. Пайдалануға берілген мәдениет нысандарының екеуі де толықтай құрал-жабдықтармен, компьютерлермен және жиһаздармен қамтамасыз етілген. Мәдениет үйлерінің жанында кітапхана, оқу залы, жоғары жылдамдықта істейтін интернет пен телефон байланыстары бар.

Ауданның Ақтөбе ауылдық округіндегі Қызыләскер елді мекенінде орналасқан 150 орындық мәдениет үйінің құрылысына облыстық бюджеттен 91 млн. теңге қаржы жұмсалған, деп хабарлайды ОҚО әкімінің баспасөз қызметі.  Ал Тегісшіл ауылдық округіндегі Таскескен елді мекенінде орналасқан 75 орындық мәдениет үйіне облыс қазынасынан 61 млн. теңге қаралған.

Жалпы аудан бойынша осы жылы мәдениет нысандары жоқ ауылдық округтер мен елді мекендерге мәдениет нысандары, яғни, ауылдық клуб пен кітапханалардың құрылыстары жүргізілуде. Оның ішінде, Сарыағаш қаласы және Бірлік, Жібек жолы, Құркелес ауылдық округтерінде мәдениет нысандарының құрылысы осы жылы аяқталып, «ҚР Тәуелсіздігінің 25 жылдығы меркесіне орай, халыққа осы жылдың қыркүйек айына дейін толық пайдалануға беріледі деп күтілуде. Сонымен қатар, биыл 4 саябақ пен 1 мәдениет үйінің жобалық сметалық құжаттары дайындалып, облыстық салалық басқармаға тапсырылды.

Елордасы – Астана қаласының 18 жылдық туған күнінде Оңтүстік Қазақстан облысындағы Шардара қаласында бас қала күніне лайықты тарту жасалды. Мерекеде Шардара су қоймасы жағасынан екі қабатты, заманауи үлгіде салынған жаңа мұражай ғимараты салтанатты түрде ашылып, пайдалануға берілді. Облыстық бюджеттен бөлінген 107 млн. теңгеге ауданы 1800 шаршы метрді құрайтын мұражай құрылысы былтыр шілде айында басталып, осы жылғы шілдеге дейін «Жер-Су-Жол-Сервис» ЖШС-мен жүргізіліп, уәделі мерзімде тапсырылды, деп хабарлайды Шардара ауданы әкімінің баспасөз қызметі.

Жаңа ғимараттың ашылу салтанатына облыс әкімінің орынбасары  Ж.Бөкенбаев, облыстық мәслихаттың хатшысы Қ.Айтөреев, аудан әкімі А.Абдуллаев, облыстық тарихи-өлкетану мұражайының директоры Г.Аренова құттықтау сөз сөйлеп, жаңа мұражай халықтың игілігіне қызмет көрсете берсін деген тілектерін айтысты.

Құрылыс жұмысын өз дәрежесінде жүргізген «Жер-Су-Жол-Сервис» серіктестігінің бас инженері Қанат Ержігіт жаңа нысанның кілтін аудандық тарихи-өлкетану мұражайының директоры Нұрлан Сымайыловқа салтанатты түрде табыс етті. Ғимараттың ашылу салтанатына куә болған еңбек ардагерлері мен қала тұрғындары ел игілігіне беріліп отырған музей үйінің іші-сыртын аралап көрісті. Талапқа сай салынған қос қабатты ғимараттың көркіне көздері тойған еңбек ардагерлері «бұл нысан Астана күніне лайықты тарту болды» десті.

Адамдардың түс таңдауына қарап психологтар олардың мінезін, ішкі жан-дүниесіндегі құбылыстарды болжайды. Киім, автокөлік, жиһазды таңдауда әрқайсымыздың өз талғамымыз бар. Біреулердің бір ғана сүйікті түсі болады. Олар үнемі қандай зат алса да, сол түстегісін іздейді. Ал кейбіреулер киімнің жиі көк түстісін таңдап, автокөліктің қызылын, жиһаздың қоңырын ұнатады. Сонымен өзіңіздің немесе жаныңыздағылардың мінезін білуге тырысып көріңіз.

Ақ түс адамның аңқаулық, пәктік, албырттықтың мінезінен хабар береді. Көбінесе ақты жастар жөн көреді. Ал бұл түсті ересек жастағы жанның таңдағаны оның өзгеге көмектесуге ынтығып тұратынын аңғартады. Оның қолынан көп нәрсе келеді. Алдына мақсат қойғыш жан. Сонымен қатар ақ түсті киім кигенді қалайтын ересек адамдар қарапайым өмірді қалайды әрі жастық шағын жиі аңсайды.

Қызыл түс тасыған күшті білдіреді. Көбінесе қызуқанды адам киімді осы түстен таңдайды. Албырт, белсенді, тез шешім шығаратындар бір орында отырғанды қаламайды. Өмірден бәрін үйреніп, алға ұмтылғыштар қызылға құмар. Оларды бірқалыптылық тез жалықтырады. Айналасындағылардың қателігіне көз жұмып қарамайды. Шынайылықты жақсы көреді.

Сары түсті еркіндікті қалайтындар және арманы биік, қиялға берілгіштер ұнатады. Олар күтпеген оқиғаларды жақсы көреді. Үнемі ізденісте жүреді. Мұндай мінезді адамдардың маңайында көбінесе әзілге жақын адамдар жүреді. Тың идеяларды талқылып, ой таразысына салғанды жаны қалайтын адамдар өзгені тыңдап, өз пікірін де ұмыт қалдырмайды. Бірақ кейде жауапкершіліктен қашады. Бұл өзін еркін сезінгісі келетін әрекеті.

Алқызыл, қызғылт түс нәзіктіктің белгісі. Көбінесе бұл түсті балалы болуды қалайтын әйелдер ұнатады. Айналасындағылардан қорғанып, тыныш өмірді қалайтын жандар алқызыл түске құмар. Олардың мінездері жұмсақ келеді.

Қызыл-қоңыр түсті ұнататындар өмірден мол тәжірбие алған жандар. Оның өз тәртібі бар, ойы кемелденген адам. Бұл түсті қалайтындар байсалды мінезімен тартымды келеді.

Жасыл түсті үйлесімділікті қалайтындар ұнатады. Бұл түс үмітті білдіреді. Жасылды жақсы көретіндер тыныштықты жаны қалайды. Дегенмен көпшілікпен араласқанға құмар. Шыдамды, тым байсалды. Ұжымның арасында өзін көрсеткенді қаламайды. Өйткені өзгелер жомарттығын пайдаланып кетеді деп қорқады.

Қызғылт сары, сарғылт түсті көбінесе көпшіл, үнемі көңілді жүруге тырысып, белсенді өмір салтын ұстанатындар ұнатады. Олар жүрген ортада ұйымдастырушылық қабілетін танытады. Кез келген ортада танымал. Дегенмен мінезі байсалды. Құбылмалылық, жігерсіздігі да бар. Бұл мінезін жеңу үшін әрекет те жасайды. Негізі қызғылт сары, сарғылт түс жастардың түсі.

Күлгін түсті өзінің талғамы орныққан, ақылды екенін сыртқа білдіруге тырысатындар жақсы көреді. Олар жұмыста аса белсенді, әртістік қабілеті бар, ұжымда абыройлы болуға талпынатындар. Олар өзгеге жаны ашығанымен өзін ғана ойлайды. Күлгін түсті қатты ұнататындардың осындай мінезі бар.

Көгілдір, көк түсті киімдерді көп киетіндер сараптама жасаудың шебері. Бірақ бұл мүмкіндігін жасырады. Аталған түсті қалайтындар өте қарапайым келеді. Сезімталдығы да бар. Бірақ іштей қатал мінезі де жоқ емес. Оны өзгелерге аңғартпауға тырысады. Көгілдір түсті жақсы көретіндер өте сақ адамдар.

Сұр түсті сақ адамдар жақсы көреді. Олар еңбекқор, жұмыста марапатқа ие болмаса да жұмысын тоқтатпай, жалғастыра береді. Сұр түске құмарларға бала күнінде ерекше көңіл бөлінбегенін аңғаруға болады. Сондықтан өзін көрсетуге келгенде тым жасқаншақ. Ол мұны қалыпты жағдай деп түсінеді.

Қара түсті көбіне жұмбақ, құпия болуға тырысатындар жақсы көреді. Олар өзінің ойын көп жерде айтпайды. Жасыруға тырысады. Қара түсті таңдайтындардың шын мәнінде жан-дүниесі бостау келеді дейді психологтар.

Мереке күні «Жастар» сарайының сахнасында «Бәрі де ән салады» Астана қаласы әкімінің кубогы чемпионатының финалы өтті. Вокалмен айналысатын 17 жасар қала тұрғыны Әнел Смайылова жеңімпаз атанды. Жарысқа кәсіпқой әншілер де, әуесқойлар да қатысты, деп хабарлайды қалалық әкімдіктің баспасөз қызметі.

Чемпионат Астанада екінші рет өткізіліп отыр және Елорда күніне орайластырылған. Жарысқа 16-дан 75-ке дейінгі адамдар қатысты.

— Кастинг 15 мамырда өтті. Оған 250 астам адам қатысты. Оның ішінен үш жас санатындағы 60 адам іріктелді: музыкалық білімі ба 16-30 жастағылар, музыкалық білімі жоқ 16-30 жастағылар және 31+, — дейді караокеден чемпионаттың қоюшы режиссері Бақытжан Таженов.

Бірнеше апта бойы қатысушылар вокалдан кәсіби оқытушылармен жұмыс істеп, шеберлік дәрістеріне қатысты. Байқаудың екінші туры 26 маусымда өтті. Оның қорытындысы бойынша әр топта 15 адамнан 45 адам ширек финалға жолдама алды.

Айта кетейік, караокеден чемпионат республикамызда ниет білдіргендердің барлығы қатыса алатын жалғыз байқау болып табылады.