Бүгін Орталық коммуникациялар қызметінде өтіп жатқан баспасөз мәслихатында Алматы қаласының әкімі Бауыржан Байбек Тәуелсіздіктің 25 жылдығы мен Алматының мың жылдық мерейтойын атап өтуге арналған іс-шаралар жоспарына тоқталып өтті.
«Тәуелсіздіктің алғашқы жылдарында Алматы қаласында ең маңызды шешімдер қабылданды. Сондықтан Тәуелсіздіктің 25 жылдығын біз өте жақсы атап өтетін боламыз. Елбасы айтқандай, тоймен емес, оймен атаймыз. Адамдар осы 25 жылдың ішінде елімізде, әсіресе, Алматыда қандай жетістіктер болғанын көруі керек», — деді Б.Байбек тілшілердің сұрағына жауап бере отырып.
Жалпы, әкім жеткізгендей, арнайы қабылдаған жоспар бойынша Алматыда 250-ден астам іс-шара өтеді.
«Еліміздегі әрбір үшінші студент Алматы қаласында оқиды. G-38 деген жастардың ұйымы бар, оның құрамына 38 жоғары оқу орнының өкілдері кіреді. Олар Алматының мыңжылдығына арнап «1000 жақсы іс» деген жобаны бастады. ЮНЕСКО Қазақстанның ұсынысын қолдап, Алматы көне тарихы бар қала ретінде халықаралық күнтізбеге енді. Біз мерейтойға байланысты көп жоспар жасайтын боламыз. Дегенмен, қаражатты тиімді пайдаланамыз. Қаланың мерейтойын 22 наурызда тойлауды бастаймыз. Түркі елдерінің өкілдерін шақырып, Наурыз мейрамын түркі халықтарының мұрасы ретінде тойлайтын боламыз. Ал қыркүйек айының үшінші аптасында қаланың мерейтойы күні болады. Сол кезде үлкен шоу-көрсетілім жоспарланған. Өздеріңіз білетіндей, Елбасының тапсырмасы бойынша Универсиадаға дайындық барысында үлкен мұз айдындарын, атлетикалық қалашық салып жатырмыз. Осының бәрі тәуелсіздіктің 25 жылдығына, Алматының мың жылдығына арналып күзде тапсырылады», — деді Алматы қаласының басшысы.
